ନୂଆଦିଲ୍ଲୀ,୩୧।୧୨(ପି.ଟି.): ଖୁବ୍ଶୀଘ୍ର ଭାରତୀୟ ମହିଳା ହକି ଦଳ ଅନ୍ତର୍ଜାତୀୟ ପ୍ରତିଯୋଗିତାକୁ ପ୍ରତ୍ୟାବର୍ତ୍ତନ କରିବାକୁ ଯାଉଛି। ଜାନୁୟାରୀରେ ମହିଳା ଦଳ ଆର୍ଜେଣ୍ଟିନା ଟୁର କରିବ। ଏଥିସହିତ ଭାରତୀୟ ମହିଳା ଦଳ ଅନ୍ତର୍ଜାତୀୟ ପ୍ରତିଯୋଗିତାକୁ ଫେରିବା ନିଶ୍ଚିତ ହୋଇଛି। କୋଭିଡ୍-୧୯ ମହାମାରୀ କାରଣରୁ ସାରା ବିଶ୍ୱରେ ହକି ପ୍ରତିଯୋଗିତା ଗୁରୁତରଭାବେ ପ୍ରଭାବିତ ହେବା ସହ ବନ୍ଦ ରହିଥିଲା।
୨୫ ଜଣ ଖେଳାଳିଙ୍କୁ ନେଇ ଏକ କୋର୍ ଗ୍ରୁପ୍ ଓ ୭ଜଣ ସପୋର୍ଟ ଷ୍ଟାଫ୍ ଜାନୁୟାରୀ ୩ ତାରିଖରେ ଭାରତୀୟ ଦଳ ନୂଆଦିଲ୍ଲୀରୁ ଆର୍ଜେଣ୍ଟିନା ଯାତ୍ରା କରିବ। ଆର୍ଜେଣ୍ଟିନା ବିପକ୍ଷରେ ଭାରତ ୮ଟି ମ୍ୟାଚ ଖେଳିବ ଓ ୧୭ ତାରିଖରୁ ଏହି ସିରିଜ ଆରମ୍ଭ ହେବ। ୨୦୨୧ରେ ଟୋକିଓ ଅଲିମ୍ପିକ୍ସ ଆରମ୍ଭ ହେବ। ଏହି ମେଗା ଇଭେଣ୍ଟ ଆରମ୍ଭ ହେବାକୁ ଆଉ ପାଖାପାଖି ୨୦୦ ଦିନ ରହିଛି। ତେଣୁ ଆର୍ଜେଣ୍ଟିନା ଭଳି ଶକ୍ତିଶାଳୀ ଦଳ ସହ ଖେଳିବା ନିଶ୍ଚିତ ଭାବେ ଗୁରୁତ୍ୱପୂର୍ଣ୍ଣ ବୋଲି ଭାରତୀୟ ଅଧିନାୟିକା ରାନୀ ରାମପାଲ କହିଛନ୍ତି। ଏହି ଗସ୍ତ ନେଇ ସାରା ଦଳ ବେଶ୍ ଉତ୍ସାହିତ ରହିଛି। ବେଙ୍ଗାଲୁରୁରେ ଦୀର୍ଘ ୫ ମାସଧରି ଜାତୀୟ କ୍ୟାମ୍ପରେ ରହିଥିଲୁ। ଏବେ ଏହି ଗସ୍ତରେ ଆମକୁ ଏକ୍ସପୋଜର ମିଳିବ ବୋଲି ସେ କହିଛନ୍ତି। ୨୦୨୦ ଜାନୁୟାରୀରେ ଭାରତ ଶେଷଥର ପାଇଁ ଅନ୍ତର୍ଜାତୀୟ ଗସ୍ତ କରିଥିଲା। ନ୍ୟୁଜିଲାଣ୍ଡ ଟୁରରେ ଯାଇ ଭାରତ ୫ ମ୍ୟାଚବିଶିଷ୍ଟ ସିରିଜ ଖେଳିଥିଲା। ଉଭୟ ନ୍ୟୁଜିଲାଣ୍ଡ ଓ ଗ୍ରେଟ ବ୍ରିଟେନ ବିପକ୍ଷ ମ୍ୟାଚ ଖେଳି ୩ଟିରେ ବିଜୟୀ ହୋଇଥିଲା। ପାଖାପାଖି ଗୋଟିଏ ବର୍ଷ ପରେ ଆମେ ପୁଣି ଥରେ ଅନ୍ତର୍ଜାତୀୟ ହକି ମ୍ୟାଚ ଖେଳିବାକୁ ଯାଉଛି। ତେଣୁ ଏହା ନିଶ୍ଚିତ ଭାବେ ଖୁସିର ବିଷୟ। ଅଲିମ୍ପିକ୍ସ ପ୍ରସ୍ତୁତିରେ ଏହି ଗସ୍ତ ସହାୟ ହେବ ବୋଲି ମୁଖ୍ୟ ଜୋଏର୍ଡ ମାରିଜନେ କହିଛନ୍ତି। ହକି ଇଣ୍ଡିଆ ଓ ଆର୍ଜେଣ୍ଟିନାର ଜାତୀୟ ଆସୋସିଏଶନ ଏହି ସିରିଜ ପାଇଁ ବାୟୋ ବବଲ ପ୍ରସ୍ତୁତ କରିବାକୁ ଯୋଜନା କରିଛନ୍ତି।
ହୋଟେଲରେ ଭାରତୀୟ ଖେଳାଳିଙ୍କୁ ସ୍ବତନ୍ତ୍ର ରୁମ୍ ମିଳିବ। ଖାଇବା, ଟିମ୍ ମିଟିଂ ଓ ବିଭିନ୍ନ ସେସନ ପାଇଁ ସ୍ବତନ୍ତ୍ର ଜୈବ ସୁରକ୍ଷିତ ପରିବେଶ ସୃଷ୍ଟି କରାଯିବ। ଗସ୍ତ ସାରା ଗୋଟିଏ ରୁମ୍ରେ ଦୁଇଜଣ ଖେଳାଳି ରହିବେ। ଏପରିକି ଟିମ୍ ବସ୍ରେ ମଧ୍ୟ ସମାନ ଦୁଇ ଖେଳାଳି ପାଖାପାଖି ବସିବେ। ଏହି ଗସ୍ତ ସତର୍କତା ସହ ଯୋଜନା କରାଯାଇଛି। ଖେଳାଳି ଓ ସପୋର୍ଟ ଷ୍ଟାଫ୍ଙ୍କ ନିରାପତ୍ତାକୁ ଗୁରୁତ୍ୱ ଦିଆଯାଇଛି। ଏଥିପାଇଁ ହକି ଇଣ୍ଡିଆ ଓ ସାଇକୁ ଆମେ କୃତଜ୍ଞତା ଜଣାଉଛୁ ବୋଲି ରାନୀ କହିଛନ୍ତି। ପ୍ରୋଟୋକଲ ଅନୁସାରେ ଦଳର କୌଣସି ସଦସ୍ୟଙ୍କୁ ବାୟୋ ବବଲ ବାହାରକୁ ଯିବା ପାଇଁ ଦିଆଯିବ ନାହିଁ। ଯାତ୍ରର ୭୨ ଘଣ୍ଟା ପୂର୍ବରୁ ଦଳର ସବୁ ସଦସ୍ୟ କୋଭିଡ୍-୧୯ ଆରଟି-ପିସିଆର ଟେଷ୍ଟର ସମ୍ମୁଖୀନ ହେବେ। ତେବେ ଆର୍ଜେଣ୍ଟିନାରେ ପହଞ୍ଚିବା ପରେ କ୍ୱାରାଣ୍ଟାଇନ୍ର ରହିବାର ଆବଶ୍ୟକତା ନାହିଁ ବୋଲି କୁହାଯାଇଛି।