ଭଞ୍ଜନଗର,୨୪।୧୧(ଡି.ଏନ.ଏ.)-ଜଙ୍ଗଲ ଓ ପରିବେଶ ଏବଂ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ ଶନିବାର ପୂର୍ବାହ୍ନରେ ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ (କେଏସ୍ୟୁବି) କଲେଜ ପରିଦର୍ଶନରେ ଯାଇଥିଲେ। ସେଠାରେ କଲେଜର ଭିତ୍ତିଭୂମି ଅନୁଧ୍ୟାନ କରି ଏହାକୁ କିଭଳି ଅଧିକ ସୁଦୃଢ଼ କରାଯାଇପାରିବ ସେ ନେଇ ବିଭାଗୀୟ ଅଧିକାରୀଙ୍କୁ ଆବଶ୍ୟକ ପଦକ୍ଷେପ ନେବାପାଇଁ ନିର୍ଦ୍ଦେଶ ଦେଇଥିଲେ। କଲେଜର କିଛି ଅଞ୍ଚଳ ପାଚେରି ନ ଥିବାରୁ ଅସାମାଜିକ ଯୁବକମାନେ ବିଭିନ୍ନ ସମୟରେ କଲେଜ ଭିତରକୁ ପ୍ରବେଶ କରୁଛନ୍ତି । ପାଚେରି କାମ କିଭଳି ପୂର୍ଣ୍ଣାଙ୍ଗ ହେବ ସେ ନେଇ ପଦକ୍ଷେପ ନିଆଯିବ। ଏଥିସହ ସାଇକେଲ ଷ୍ଟାଣ୍ଡ ରେଡ୍କ୍ରସ ମଣ୍ଡପ ନିକଟରେ ନିର୍ମାଣ କରାଯିବ। ଆଗାମୀ ଦିନରେ ହେବାକୁ ଥିବା ନୂତନ କୋଠା କାମ ମଧ୍ୟ ନିର୍ଦ୍ଧାରିତ ସମୟରେ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହା ପରେ ମନ୍ତ୍ରୀ ଶ୍ରୀରାମନଗର ଅଞ୍ଚଳରେ ହେଉଥିବା ସରକାରୀ ଶିଳ୍ପ ତାଲିମ କେନ୍ଦ୍ର ଓ ଆଞ୍ଚଳିକ ପରିବହନ କାର୍ଯ୍ୟାଳୟର ନୂତନ କୋଠା କାମ ବୁଲି ଦେଖିଥିଲେ। ମନ୍ତ୍ରୀଙ୍କ ଗସ୍ତ ସମୟରେ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ରମେଶ ପ୍ରସାଦ ସ୍ବାଇଁ, କଲେଜ ଅଧ୍ୟକ୍ଷ ଡ.ନୀଳାଞ୍ଚଳ ମୁନି ପ୍ରମୁଖ ଉପସ୍ଥିତ ଥିଲେ ।
