*ଡିସେମ୍ବର ୧୪ରୁ ୨୨ ଟୁର୍ନାମେଣ୍ଟ
* ମୋଟ୍ ୩୭ ଦଳ ଅଂଶଗ୍ରହଣ କରିବେ
* ୧୦୩ ମ୍ୟାଚ୍ ଖେଳାଯିବ
* ବାରବାଟୀରେ ଫାଇନାଲ
ଭୁବନେଶ୍ୱର,୧୪।୧୨(ସ୍ପୋଟର୍ସ ବ୍ୟୁରୋ): ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ ଆନ୍ତଃ ଜିଲା ସିନିୟର ପୁରୁଷ ଟି୨୦ ଲିଗ୍ ଆସନ୍ତା ୧୪ରୁ ୨୨ ତାରିଖ ମଧ୍ୟରେ ଆୟୋଜନ ହେବ। ଓସିଏର ଅନୁବନ୍ଧିତ ୟୁନିଟ୍ଗୁଡିକରୁ ମୋଟ୍ ୩୭ଟି ଦଳ ଏଥିରେ ଭାଗ ନେବେ। କୋଭିଡ୍-୧୯ ଗାଇଡ୍ଲାଇନ୍ ଅନୁସାରେ କଟକ ଓ ଭୁବନେଶ୍ୱରରେ ସବୁ ଦଳ ରହିବେ। କଟକ ଜୋନ୍ରେ ୧୯ ଓ ଭୁବନେଶ୍ୱର ଜୋନ୍ରେ ୧୮ ଦଳ ରହିବେ।
ଟି୨୦ ପର୍ଯ୍ୟାୟରେ ୩ଟି ଫର୍ମାଟ୍ରେ ଟୁର୍ନାମେଣ୍ଟ ଆୟୋଜନ ହେବ। ପ୍ରିଲିମିନାରୀ ଲିଗ୍ ପରେ ସୁପର ଲିଗ୍ ଓ ଶେଷରେ ଫାଇନାଲ ମ୍ୟାଚ୍ ଖେଳାଯିବ। ପ୍ରିଲିମିନାରୀ ଲିଗ୍ରେ ଦଳଗୁଡିକୁ ୬ଟି ଗ୍ରୁପ୍ରେ ବିଭକ୍ତ କରାଯିବ। ତେବେ କେବଳ ଗୋଟିଏ ଗ୍ରୁପ୍ରେ ୭ଟି ଦଳ ସାମିଲ ହେବେ। ପ୍ରତ୍ୟେକ ଗ୍ରୁପ୍ର ଶ୍ରେଷ୍ଠ ଦଳ ଏପରି ୬ଟି ଦଳ ସୁପରଲିଗ୍କୁ ଉନ୍ନୀତ ହେବେ। ଏହି ୬ ଦଳକୁ ଦୁଇଟି ଗ୍ରୁପ୍ରେ ବିଭକ୍ତ କରାଯିବ। ଏହି ଦୁଇ ଗ୍ରୁପ୍ର ଶ୍ରେଷ୍ଠ ଦୁଇଟି ଦଳ ଫାଇନାଲ ଖେଳିବାକୁ ଯୋଗ୍ୟତା ହାସଲ କରିବେ।
୯୬ଟି ପ୍ରିଲିମିନାରୀ ଲିଗ୍ ମ୍ୟାଚ୍, ୬ଟି ସୁପର ଲିଗ୍ ଓ ଫାଇନାଲ ମ୍ୟାଚ୍ ସହ ମୋଟ୍ ୧୦୩ଟି ମ୍ୟାଚ ଖେଳାଯିବ। କଟକ ଓ ଭୁବନେଶ୍ୱରର ୯ଟି ଭେନ୍ୟୁରେ ମ୍ୟାଚ୍ଗୁଡିକ ଆୟୋଜନ ହେବ। ଏହି ଭେନ୍ୟୁଗୁଡିକ ହେଲା ବାରବାଟୀ, ଡ୍ରିମ୍ସ, ନିମପୁର, ବିଡ଼ାନାସୀ, ରେଭେନ୍ସା, କିଟ୍, ବିକାଶ, ସେଞ୍ଜୁରିଅନ ଓ ଟାଉନ୍ କ୍ଲବ। ଫାଇନାଲ ମ୍ୟାଚ ବାରବାଟୀ ଷ୍ଟାଡିୟମରେ ଫ୍ଲଡ୍ ଲାଇଟ୍ ତଳେ ଖେଳାଯିବ।
ମ୍ୟାଚ୍ଗୁଡିକର ସଫଳ ଅୟୋଜନ ପାଇଁ ୪୦ଜଣ ଅମ୍ପାୟର, ୨୦ଜଣ ସ୍କୋରର, ୨୦ଜଣ ଭିଡିଓ ଆନାଲିଷ୍ଟଙ୍କୁ ଚୟନ କରାଯାଇଛି ବୋଲି ଆସୋସିଏଶନ ତରଫରୁ କୁହାଯାଇଛି। ଟୁର୍ନାମେଣ୍ଟ ଆୟୋଜନ ପାଇଁ ରହିବା ସ୍ଥାନ, ଗ୍ରାଉଣ୍ଡ ଓ ଯାତ୍ର ପାଇଁ ଜୈବ ସୁରକ୍ଷିତ ପରିବେଶ ତଥା ବାୟୋ ବବଲ୍ ସୃଷ୍ଟି କରାଯିବ। ସବୁ ଖେଳାଳିଙ୍କ ସମେତ ମ୍ୟାଚ ଓ ଓସିଏ ଅଫିସିଆଲଙ୍କ ଏଣ୍ଟ୍ରି ଓ ରିହିବା ଅବସରରେ କୋଭିଡ୍ ଗାଇଡ୍ଲାଇନ ଅନୁଯାୟୀ ନିୟମିତ ଟେଷ୍ଟ କରାଯିବ। ଟୁର୍ନାମେଣ୍ଟ ପ୍ରଦର୍ଶନ ଭିତ୍ତିରେ ୮୪ ଜଣ ଖେଳାଳିଙ୍କୁ ଚୟନ କରାଯିବ ଓ ଏମାନେ ଓଡ଼ିଶା କ୍ରିକେଟ ଲିଗ୍ (ଓସିଏଲ୍)୨୦୨୦-୨୧ରେ ଅଂଶଗ୍ରହଣ କରିବେ। ଏଥିସହିତ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ଦ୍ୱାରା ଆୟୋଜନ ହେବାକୁ ଥିବା ସୟଦ ମୁସ୍ତାକ ଅଲି ଟି୨୦ ଟ୍ରଫି ପାଇଁ ଶ୍ରେଷ୍ଠ ୪୦ଜଣ ଖେଳାଳିଙ୍କୁ ଏହି ଟୁର୍ନାମେଣ୍ଟ ମାଧ୍ୟମରେ ଚୟନ କରାଯିବ। ଏକ ମେଡିକାଲ କମିଟିକୁ ଦାୟିତ୍ୱ ଦିଆଯିବ। ଜରୁରୀ ସ୍ଥିତି ଉପୁଜିଲେ କଟକ ଓ ଭୁବନେଶ୍ୱରରେ ଦୁଇଟି ହସ୍ପିଟାଲ୍ର ସହାୟତା ନିଆଯିବ ବୋଲି ଓସିଏ ତରଫରୁ କୁହାଯାଇଛି।