ଜମ୍ମୁ/ଶ୍ରୀନଗର,୨୬ା୧୨: ଆତଙ୍କବାଦୀଙ୍କ ଆକ୍ରମଣରେ ୪ ଯବାନ ଶହୀଦ ହେବା ପରେ ସେନା ୩ ଜଣଙ୍କୁ ଜେରା ପାଇଁ ଉଠାଇନେଇଥିଲା। ସେମାନଙ୍କର ମୃତଦେହ ମିଳିବା ପରେ ସୈନ୍ୟମାନେ ସେମାନଙ୍କୁ ଜେରା ବେଳେ ମାଡ଼ ମାରି ହତ୍ୟା କରିଥିବା ବିରୋଧୀ ଅଭିଯୋଗ କରିଥିଲେ। ନାଗରିକ ହତ୍ୟା ଅଭିଯୋଗର ତଦନ୍ତ ସେନା ପକ୍ଷରୁ ଆରମ୍ଭ ହୋଇଥିବାବେଳେ ଜଣେ ବ୍ରିଗେଡିୟର ସ୍ତରର ଅଫିସରଙ୍କୁ ଡ୍ୟୁଟିରୁ ହଟାଇଦିଆଯିବା ସହ ପୁଞ୍ଚ୍ରୁ ବିଦା କରିଦିଆଯାଇଛି। ଦୁଇଟି ସେନା ଗାଡ଼ି ଉପରେ ଆତଙ୍କବାଦୀଙ୍କ ଆକ୍ରମଣ ପରେ କଶ୍ମୀରରେ ଆତଙ୍କବାଦ ନିରୋଧୀ ଅଭିଯାନକୁ ଜୋର୍ଦାର କରାଯାଇଛି। ଜଙ୍ଗଲ ଅଞ୍ଚଳ ଡେରା କୀ ଗଲି ଏବଂ ବାଫ୍ଲିୟାଜ୍ରେ କୋମ୍ବିଂ ଅପରେଶନକୁ ଜୋର୍ଦାର କରାଯିବା ସହ ଆକାଶମାର୍ଗରୁ ନଜର ରଖାଯାଇଛି। ଏଥିସହିତ କେତେଜଣ ସେନା ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁ୍ଷ୍ଠାନ ଗ୍ରହଣ କରାଯିବା ସହ କେତେଜଣଙ୍କୁ ବଦଳି କରାଯାଇଛି।
ସ୍ଥିତି ଅନୁଧ୍ୟାନ ପାଇଁ ସେନାମୁଖ୍ୟ ଜେନେରାଲ ମନୋଜ ପାଣ୍ଡେ ଉକ୍ତ ଅଞ୍ଚଳକୁ ଯାଇଥିବାବେଳେ ଜମ୍ମୁର ନାଗ୍ରୋଟାଠାରେ ଥିବା ହ୍ବାଇଟ୍ ନାଇଟ୍ କର୍ପସ୍ ମୁଖ୍ୟାଳୟରେ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକରେ ଅଧ୍ୟକ୍ଷତା କରିବେ। ରାଜୌରୀ-ପୁଞ୍ଚ୍ ଜିଲାରେ କ୍ରମାଗତ ତୃତୀୟ ଦିନ ପାଇଁ ମୋବାଇଲ ଇଣ୍ଟରନେଟ୍ ସେବା ବନ୍ଦ ରହିଛି। ଗତ ସପ୍ତାହର ଆକ୍ରମଣ ପାଇଁ ଜୈଶ-ଇ-ମହମ୍ମଦ ସହ ସମ୍ପୃକ୍ତ ପିପୁଲ୍ସ ଆଣ୍ଟି-ଫାସିଷ୍ଟ ଫ୍ରଣ୍ଟ (ପିଏଏଫ୍ଏଫ୍) ନିଜକୁ ଦାୟୀ କରିଛି। ଆକ୍ରମଣରେ ଅତ୍ୟାଧୁନିକ ଆମେରିକା ନିର୍ମିତ ଏମ୍୪ କାର୍ବାଇନ୍ ଅସ୍ତ୍ର ବ୍ୟବହାର କରାଯାଇଥିବାର ଫଟୋ ସେମାନେ ସୋସିଆଲ ମିଡିଆରେ ଶେୟାର କରିଛନ୍ତି।
ସେନା ହାଜତରେ ୩ ନାଗରିକଙ୍କ ମୃତ୍ୟୁ ଘଟିଥିବା ପୁଞ୍ଚ୍ ଜିଲାର ସୁରାନକୋଟ୍କୁ ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫ୍ତି ଯିବାକୁ ଥିବାବେଳେ ତାଙ୍କୁ ଗୃହବନ୍ଦୀ କରାଯାଇଥିବା ପିଡିପି ସୋମବାର ଅଭିଯୋଗ କରିଛି। ମେହବୁବା ମୃତକଙ୍କ ପରିବାରକୁ ଭେଟି ସମବେଦନା ଜଣାଇଥାନ୍ତେ ଓ ସେଠାର ସ୍ଥିତି ଅନୁଧ୍ୟାନ କରିଥାନ୍ତେ। ଏହା ପୂର୍ବରୁ ତାଙ୍କୁ ଜୋର ଜବରଦସ୍ତ ଗୃହବନ୍ଦୀ କରି ରଖାଯାଇଥିବା ପିଡିପି ଏକ୍ସ’ରେ ପୋଷ୍ଟ କରିଛି। ସରକାରଙ୍କ ଏଭଳି ପଦକ୍ଷେପକୁ ଦଳ ନିନ୍ଦା କରିଛି।