ପୁରୀ ଅଫିସ,୨୫ା୧୧: ଥାନାରେ ଅଭିଯୁକ୍ତଙ୍କୁ ଥାର୍ଡ ଡିଗ୍ରୀ ନେଇ ପୁରୀ ଜିଲା ଚର୍ଚ୍ଚାରେ ରହିଛି। ପୁରୀ ହାଜତ ମୃତ୍ୟୁର ତାତି ଥମି ନ ଥିବାବେଳେ ପିପିଲି ଓ ପୁରୀ ଟାଉନ ଥାନା ପୋଲିସ ନିର୍ଯାତନାର ଅଭିଯୋଗ ଆସିଛି। ଏହି ଦୁଇଟି ଥାର୍ଡ ଡିଗ୍ରୀ ଅଭିଯୋଗର ତଦନ୍ତ ଦାୟିତ୍ୱ କେନ୍ଦ୍ରାଞ୍ଚଳ ଡିଆଇଜି ଆଶିଷ ସିଂଙ୍କୁ ଦିଆଯାଇଛି। ମଙ୍ଗଳବାର ଡିଆଇଜି ସିଂ ପୁରୀ ଆସି ତଦନ୍ତ ଆରମ୍ଭ କରିଛନ୍ତି।
ଏହି ଅବସରରେ ଡିଆଇଜି ସିଂ କହିଛନ୍ତି, ପୁରୀ ବିଶ୍ୱର ଏକ ପ୍ରସିଦ୍ଧ ଧାର୍ମିକସ୍ଥଳ। ଏଠାକୁ ଦେଶ ବିଦେଶର ଯାତ୍ରୀ, ପର୍ଯ୍ୟଟକ ଆସିଥାନ୍ତି। ସେମାନଙ୍କୁ ସୁରକ୍ଷା ଯୋଗାଇଦେବା ସହିତ ପୁରୀକୁ ଶ୍ରେଷ୍ଠ ଧାମ ଓ ଅପରାଧମୁକ୍ତ କରିବା ପୋଲିସର ମୂଳ ଲକ୍ଷ୍ୟ। ପୁରୀ ଟାଉନ ଥାନା ଏବଂ ପିପିଲି ପୋଲିସ ବିରୋଧରେ ଆସିଥିବା ଥାର୍ଡ ଡିଗ୍ରୀ ଅଭିଯୋଗର ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ ହୋଇଛି। ଯଦି ଆଇନ ପରିଧି ବାହାରକୁ ଯାଇ ପୋଲିସ କିଛି କରିଥିବାର ପ୍ରମାଣ ମିଳେ ତେବେ ନିଶ୍ଚିତ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ଏହା ସମୟ ସାପେକ୍ଷ। ସବୁଦିଗକୁ ତଦନ୍ତ ପରିସରଭୁକ୍ତ କରାଯାଇଛି। ଆଇନର କେହି ଦୁରୁପଯୋଗ କିମ୍ବା ଭଙ୍ଗ କଲେ ବରଦାସ୍ତ କରାଯିବ ନାହିଁ। ଅପରପକ୍ଷେ ଅପରାଧୀ ତଥା ବେଆଇନ ନିଶା କାରବାରରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ପୋଲିସର କାର୍ଯ୍ୟାନୁଷ୍ଠାନ ବଳବତ୍ତର ରହିବ। ଆଇନ ପରିଧି ମଧ୍ୟରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପୋଲିସର କର୍ତ୍ତବ୍ୟ। ଏ ଦିଗରେ ପୁରୀ ପୋଲିସ ପ୍ରତିଶ୍ରୁତିବଦ୍ଧ। ସେହିପରି ବାସେଳିସାହି ଥାନା ହାଜତ ମୃତ୍ୟୁ ସଂକ୍ରାନ୍ତରେ ପ୍ରତିକ୍ରିୟା ରଖି ଡିଆଇଜି ସିଂ କହିଛନ୍ତି, ଏନ୍ଏଚ୍ଆର୍ସି ଗାଇଡ଼ଲାଇନ ଅନୁଯାୟୀ ଏହାର ତଦନ୍ତ ଚାଲିଛି। ପୋଲିସକୁ ଯେ କୌଣସି ତଥ୍ୟ ମଗାଯିବ ତାହା ଦିଆଯିବ। ପୋଲିସ ସମ୍ପୂର୍ଣ୍ଣ ଭାବେ ଏଥିରେ ସହଯୋଗ କରିବ।