ଭୁବନେଶ୍ୱର,୭ା୨(ବ୍ୟୁରୋ):ରାଜଧାନୀରେ ଏକାଧିକ ଅଚିହ୍ନା ବ୍ୟକ୍ତିଙ୍କ ମୃତ୍ୟୁ ଘଟଣାରେ କମିଶନରେଟ ପୋଲିସ ରହସ୍ୟ ଉନ୍ମୋଚନ କରିପାରୁନାହିଁ। ଘଟଣାକୁ ବର୍ଷ ପରେ ବର୍ଷ ବିତିଯାଉଥିଲେ ମଧ୍ୟ ମୃତ ବ୍ୟକ୍ତିଙ୍କ ପ୍ରକୃତ ପରିଚୟ ପାଇପାରୁ ନାହିଁ। ଫଳରେ ତାହା ଆତ୍ମହତ୍ୟା ନା ହତ୍ୟା, ତାହା ସେମିତି ରହସ୍ୟ ହୋଇ ରହିଯାଉଛି। କିଛି ଚର୍ଚ୍ଚିତ ତଥା ଗୁରୁତ୍ୱପୂର୍ଣ୍ଣ ଘଟଣାରେ ପୋଲିସ ବିଭିନ୍ନ ସ୍ଥାନରେ ପୋଷ୍ଟର ମାରୁଛି। ହେଲେ ପରବର୍ତ୍ତୀ ସମୟରେ ଉକ୍ତ ପୋଷ୍ଟର ଚିରିଯାଉଥିବାବେଳେ ଥାନାଧିକାରୀ ବା ତଦନ୍ତକାରୀ ଅଧିକାରୀଙ୍କ ତଦନ୍ତ ବି ସେମିତି ଫାଇଲ ତଳେ ଚାପି ହୋଇ ରହିଯାଉଛି। ଘଟଣାସ୍ଥଳରୁ ମିଳିଥିବା ପ୍ରମାଣ, ବ୍ୟବଚ୍ଛେଦ ରିପୋର୍ଟ ଓ ସାଇଣ୍ଟିଫିକ୍ ରିପୋର୍ଟ ଆଦିକୁ ଆଧାର କରି ପୋଲିସ ତଦନ୍ତ କରୁଥିଲେ ମଧ୍ୟ ସଫଳ ହୋଇପାରୁ ନାହିଁ। ବିଭିନ୍ନ ପଦକ୍ଷେପ ଗ୍ରହଣ କରି ତଦନ୍ତ କରାଯାଉଥିଲେ ମଧ୍ୟ ପରିଚୟ ଖୋଜାରେ ପୋଲିସର ତଦନ୍ତ ଅଟକିଯାଉଛି। ରାଜଧାନୀରେ ବିଗତ ବର୍ଷରେ ଏଭଳି ବହୁ ଅଚିହ୍ନା ମୃତଦେହ ଜବତ ଘଟଣା ରହସ୍ୟ ହୋଇ ରହିଯାଉଥିବାରୁ ପୋଲିସର ପ୍ରକୃତ କାର୍ଯ୍ୟଧାରା ଉପରେ ପ୍ରଶ୍ନବାଚୀ ସୃଷ୍ଟି ହେଉଛି। ୨୦୧୨ ମେ’ ୨୭ରେ ଚନ୍ଦକା ଥାନା ଅନ୍ତର୍ଗତ ଗୋଠପାଟଣା କାଜୁ ଜଙ୍ଗଲରୁ ଜଣେ ମହିଳାଙ୍କ ମୃତଦେହକୁ ପୋଲିସ ଜବତ କରିଥିଲା। ତାଙ୍କୁ କେହି ତଣ୍ଟି କାଟି ହତ୍ୟା କରି ଜଙ୍ଗଲରେ ଫୋପାଡ଼ି ଦେଇଥିବା ଦେଖିବାକୁ ମିଳିଥିଲା। ଉକ୍ତ ମହିଳାଙ୍କ ବୟସ ୨୫ରୁ ୩୦ ବର୍ଷ ମଧ୍ୟରେ ହେବ ବୋଲି ପୋଲିସ ଅନୁମାନ କରିଥିଲା। ପାଖରେ ମିଳିଥିବା ଏକ ପଲିଥିନରୁ ମହିଳାଙ୍କ ଘର ଢ଼େଙ୍କାନାଳ ଜିଲା କାମାକ୍ଷାନଗର ଅଞ୍ଚଳର ହୋଇଥିବା ଜଣାପଡ଼ିଥିଲା। ୨୦୨୧ ଜୁନ ୧୬ରେ ତତ୍କାଳୀନ ଡିସିପି ଉମାଶଙ୍କର ଦାଶଙ୍କ ନିର୍ଦ୍ଦେଶକ୍ରମେ ପୁରୁଣା ରହସ୍ୟଜନକ ମୃତ୍ୟୁ ମାମଲାର ତଦନ୍ତ କରାଯାଇଥିଲା। ସେହି ସମୟରେ ଏହି ମାମଲାରେ ମଧ୍ୟ ପୋଷ୍ଟର ଲଗାଯାଇଥିଲା। ହେଲେ ଏପର୍ଯ୍ୟନ୍ତ ଉକ୍ତ ମହିଳାଙ୍କ ପରିଚୟ ମିଳିପାରି ନ ଥିବାବେଳେ ପୋଲିସ ଆଉ ମୁଣ୍ଡ ଖେଳାଉ ନାହିଁ। ୨୦୨୧ ଫେବୃୟାରୀ ୧୨ରେ ଜଟଣୀ ଥାନା ଅନ୍ତର୍ଗତ ଯାଆଁଳା ଫାଣ୍ଡି ପରିସରରେ ଥିବା ଏକ ଜବତ କାର୍ରୁ ଜଣେ ମହିଳାଙ୍କ କଙ୍କାଳ ଠାବ ହୋଇଥିଲା। ଏହି ଘଟଣାକୁ ନେଇ ଚର୍ଚ୍ଚା ସୃଷ୍ଟି ହେବା ପରେ ଫାଣ୍ଡି ଅଧିକାରୀଙ୍କୁ ନିଲମ୍ବିତ କରାଯାଇଥିଲା। ପରେ ପରିଚୟ ଜାଣିବା ପାଇଁ ଏକ ସମ୍ଭାବ୍ୟ ପୋଷ୍ଟର ପ୍ରସ୍ତୁତ କରାଯାଇ ବିଭିନ୍ନ ସ୍ଥାନରେ ଲଗାଯାଇଥିଲା। ହେଲେ ଉକ୍ତ ଘଟଣାକୁ ପାଖାପାଖି ୨ ବର୍ଷ ବିତିଯାଇଥିଲେ ମଧ୍ୟ ପୋଲିସ ମହିଳାଙ୍କ ପରିଚୟ ପାଇ ପାରିନାହିଁ। ସେହିପରି ଉକ୍ତବର୍ଷ ଜୁଲାଇ ୨୨ରେ ମଞ୍ଚେଶ୍ୱର ଥାନା ଅନ୍ତର୍ଗତ ବରିମୁଣ୍ଡ ଜରିପାଟଣା ଗ୍ରାମ ନିକଟ କୁଆଖାଇ ନଦୀପଠାରୁ ବାଲିରେ ପୋତାଯାଇଥିବା ଜଣେ ଯୁବକଙ୍କ ମୃତଦେକୁ ପୋଲିସ ଜବତ କରିଥିଲା। ତାଙ୍କୁ କେହି ତଣ୍ଟିଚିପି ହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିଲା। ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରିବା ସହ ଯୁବକଙ୍କ ପୋଷ୍ଟର ଲଗାଇଥିଲା। ହେଲେ ଏପର୍ଯ୍ୟନ୍ତ ଏହି ମାମଲା ଅସମାହିତ ରହିଥିବା ବେଳେ ପୋଲିସ ମଧ୍ୟ ନଜର ହଟେଇ ଦେଇଥିବା ଜଣାପଡ଼ୁଛି।
ଏନେଇ ଭୁବନେଶ୍ୱର ଡିସିପି ପ୍ରତୀକ ସିଂ କହିଛନ୍ତି, ଏସବୁ ମାମଲାରେ ମୃତ ବ୍ୟକ୍ତିଙ୍କର ପରିବାରରେ କେହି ରହୁ ନ ଥିବାରୁ ତାଙ୍କୁ ଖୋଜାଯାଉ ନାହିଁ। ସେହିପରି ମୃତ ବ୍ୟକ୍ତିଙ୍କୁ ଚିହ୍ନୁଥିବା ଲୋକମାନେ ମଧ୍ୟ ଖବରକାଗଜ କିମ୍ବା ଟିଭି ଦେଖୁ ନ ଥିବାରୁ ଏନେଇ ଜାଣିପାରୁନାହାନ୍ତି। ଏସବୁ ମାମଲାରେ ଆମ ପକ୍ଷରୁ ସମସ୍ତ ଜିଲା ପୋଲିସକୁ ଫଟୋ ପଠାଯିବା ସହ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ମୃତ ବ୍ୟକ୍ତିଙ୍କ ଫିଙ୍ଗର ପ୍ରିଣ୍ଟ୍ ମାଧ୍ୟମରେ ଆଧାର ଆକ୍ସେସ୍ କରି ପରିଚୟ ମିଳିପାରିବ। ହେଲେ ଏହା କରିବାକୁ ଆମକୁ ଅନୁମତି ଦିଆଯାଇ ନାହିଁ। ଆଧାର୍ ଆକ୍ସେସ୍ କରିବାକୁ ଅନୁମତି ମିଳିଲେ, ମୃତକଙ୍କ ପରିଚୟ ମିଳିବା ସହଜ ହୋଇପାରନ୍ତା ବୋଲି ଡିସିପି ସିଂ କହିଛନ୍ତି।