କୋଲକାତା, ୨୩।୫(ପି.ଟି.)- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୪ତମ ସଂସ୍କରଣ ପାଇଁ ବାୟୋ-ବବ୍ଲ ଗତବର୍ଷ ୟୁଏଇ (ୟୁନାଇଟେଡ ଆରବ ଏମିରେଟ୍ସ)ପରି ସମ୍ପୂର୍ଣ୍ଣ ସୁରକ୍ଷିତ ନ ଥିଲା। ପ୍ରଥମ ଭାରତୀୟ ଖେଳାଳିଭାବେ ଏପରି କହି ମୁହଁ ଖୋଲିଛନ୍ତି ରିଦ୍ଧିମାନ ଶାହା। ଏକାଧିକ ଖେଳାଳି ଓ ସପୋର୍ଟ ଷ୍ଟାଫ୍ କରୋନାରେ ଆକ୍ରାନ୍ତ ହେବାରୁ ଆଇପିଏଲ୍-୧୪କୁ ଅଧାରୁ ସ୍ଥଗିତ ରଖିବାକୁ ପଡ଼ିଥିଲା। ସଂକ୍ରମିତ ଖେଳାଳିଙ୍କ ମଧ୍ୟରୁ ଅନ୍ୟତମ ଥିଲେ ୩୬ ବର୍ଷୀୟ ରିଦ୍ଧିମାନ। ଗତବର୍ଷ ଭଳି ଚଳିତ ବର୍ଷ ଆଇପିଏଲ୍ ୟୁଏଇରେ ହୋଇଥିଲେ ଭଲ ହୋଇଥାନ୍ତା ବୋଲି ସେ ଏକ ସାକ୍ଷାତକାରରେ କହିଛନ୍ତି। ଏହାକୁ ଅନୁଧ୍ୟାନ କରିବା ଅଂଶୀଦାରମାନଙ୍କର କାର୍ଯ୍ୟ। ତେବେ ଗତବର୍ଷ ଜଣେ ହେଲେ ଖେଳାଳି ଏପରିକି ଗ୍ରାଉଣ୍ଡ ଷ୍ଟାଫ୍ ମଧ୍ୟ ୟୁଏଇରେ ସଂକ୍ରମିତ ହୋଇ ନ ଥିଲେ ବୋଲି ସେ କହିଛନ୍ତି।
”ଭାରତରେ ଆଇପିଏଲ୍ ସମୟରେ ଲୋକମାନେ ଏବଂ ଛୋଟ ପିଲାମାନେ ନିକଟସ୍ଥ ପାଚେରି ଉପରୁ ଉଣ୍ଡିମାରି ଦେଖୁଥିଲେ। ଏ ସମ୍ପର୍କରେ ମୁଁ ଅଧିକ କିଛି କହିବାକୁ ଚାହୁଁନାହଁି, ମାତ୍ର ଭାରତରେ କରୋନା ସଂକ୍ରମଣ ବଢ଼ି ଚାଲିଥିବାବେଳେ ଏହି ପ୍ରତିଯୋଗିତା ଆରମ୍ଭ ହୋଇଥିଲା। ୨୦୨୦ରେ କିନ୍ତୁ ଏହି ଲିଗ୍ ଅତି ସୁନ୍ଦରଭାବେ ୟୁଏଇରେ ଆୟୋଜିତ ହୋଇଥିଲା“ ବୋଲି ସେ କହିଛନ୍ତି। ବେଙ୍ଗଲ ଭେଟେରାନ ରିଦ୍ଧିମାନ ଦିଲ୍ଲୀରେ ଏକ ହୋଟେଲରେ ୧୫ଦିନରୁ ଊର୍ଦ୍ଧ୍ୱ କ୍ୱାରାଣ୍ଟାଇନ୍ରେ ରହିବା ପରେ କୋଲକାତାସ୍ଥିତ ଘରକୁ ଫେରିଥିଲେ। କରୋନାମୁକ୍ତ ହୋଇଥିବାରୁ ସେ ଇଂଲଣ୍ଡ ଟୁର୍ ପାଇଁ ନିଜକୁ ଉପଲବ୍ଧ କରାଇଛନ୍ତି। କ’ଣ ପାଇଁ ସଂକ୍ରମଣ ବାୟୋ-ବବ୍ଲ ମଧ୍ୟରେ ପଶିଲା ସେ ସମ୍ପର୍କରେ ନିର୍ଦ୍ଦିଷ୍ଟଭାବେ କିଛି କହିପାରି ନ ଥିଲେ ହେଁ ୟୁଏଇ ପରି ଏଠାରେ ଟାଇଟ୍ ନ ଥିଲା ବୋଲି ସ୍ପଷ୍ଟ କରିଛନ୍ତି। ଆଇପିଏଲ୍ର ଅଂଶୀଦାରମାନେ ଏହା ଉପରେ ବିଶେଷ ଦୃଷ୍ଟି ପକାଇବା ଆବଶ୍ୟକ ବୋଲି ସେ କହିଛନ୍ତି। ମେ’ ୪ରେ ରିଦ୍ଧିମାନ କରୋନାରେ ଆକ୍ରାନ୍ତ ଜଣାପଡ଼ିବା ପରେ ଆଇପିଏଲ-୧୪କୁ ସ୍ଥଗିତ ଘୋଷଣା କରାଯାଇଥିଲା।
ରିଦ୍ଧିମାନ ଏବେ ସମ୍ପୂର୍ଣ୍ଣ ସୁସ୍ଥ ଏବଂ ଦୁର୍ବଳ ଅନୁଭବ କରୁ ନ ଥିବା ପ୍ରକାଶ କରିଛନ୍ତି। ଶରୀରରେ କ୍ଳାନ୍ତି କିମ୍ବା ଦୁର୍ବଳତା ଥିବା ସେ ଅନୁଭବ କରୁନାହାନ୍ତି। ତେବେ ମ୍ୟାଚ ପାଇଁ ଟ୍ରେନିଂ ଆରମ୍ଭ ହେଲେ ତାଙ୍କ ଶରୀର କିପରି ସପୋର୍ଟ କରୁଛି ତାହା ଜଣାପଡ଼ିବ ବୋଲି ସେ କହିଛନ୍ତି। ଏବେ ପରିବାର ଏବଂ ବନ୍ଧୁମାନଙ୍କ (ଭର୍ଚୁଆଲି) ସହ ସମୟ କଟାଇବାର ବେଳ। ମନରେ ଖୁସି ଆଣିପାରୁଥିବା ମୁଭି ଦେଖୁଛନ୍ତି। ସେ କେବେହେଲେ ମାନସିକ ସ୍ଥିରତା ହରାଇ ନାହାନ୍ତି, ସ୍ବାଭାବିକ ଜୀବନ ଅତିବାହିତ କରୁଛନ୍ତି ବୋଲି ରିଦ୍ଧିମାନ ପ୍ରକାଶ କରିଛନ୍ତି। ସେ ଏବେ ଘରେ ଫିଟ୍ନେସ ରୁଟିନ୍ କରୁଛନ୍ତି ା ମୁମ୍ବାଇରେ ଦଳ ସହ ଯୋଗଦେବା ପରେ ଫିଟ୍ନେସ ଟ୍ରେନିଂ ଆରମ୍ଭ ହେବ।