ନୂଆଦିଲ୍ଲୀ, ୨୬ା୮ (ପି.ଟି.)-ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ସେପ୍ଟେମ୍ବର ୧୯ରୁ ଆରମ୍ଭ ହେବାକୁଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ବେଳେ ଖେଳାଳିଙ୍କଠାରୁ ଡୋପ୍ ଟେଷ୍ଟ ପାଇଁ ସାମ୍ପଲ ସଂଗ୍ରହ ହେବ। ଏଥିପାଇଁ ନ୍ୟାଶନାଲ ଆଣ୍ଟି ଡୋପିଂ ଏଜେନ୍ସି (ନାଡା)ର ୩ଜଣ ଉଚ୍ଚ ପଦାଧିକାରୀ ଏବଂ ୬ଜଣ ଡୋପ୍ କଣ୍ଟ୍ରୋଲ ଅଫିସର ୟୁଏଇ ଯିବେ। ନଭେମ୍ବର ୧୦ରେ ଶେଷ ହେବାକୁଥିବା ଏହି ଟି୨୦ ଇଭେଣ୍ଟରେ ୬୦ଟି ମ୍ୟାଚ ଖେଳାଯିବ। ପ୍ରତିଯୋଗିତା ସମୟରେ ଏବଂ ପ୍ରତିଯୋଗିତା ବାହାରେ ଏଜେନ୍ସି ତରଫରୁ ଅତି କମ୍ରେ ୫୦ ସାମ୍ପଲ ସଂଗ୍ରହ ଲାଗି ଟାର୍ଗେଟ କରାଯାଇଛି। ଆବଶ୍ୟକ ପଡ଼ିଲେ ସେମାନେ ୟୁଏଇର ନ୍ୟାଶନାଲ ଆଣ୍ଟି ଡୋପିଂ ଅର୍ଗାନାଇଜେଶନର ସହାୟତା ନେଇ ପାରିବେ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ନାଡାର ୯ ଜଣିଆ ଟିମ୍ ମ୍ୟାଚ ଖେଳାଯିବାକୁ ଥିବା ତିନୋଟି ଭେନ୍ୟୁରେ କାର୍ଯ୍ୟକରିବେ। ପ୍ରତିଟିମ୍ରେ ଜଣେ ଅଫିସିଆଲ ଏବଂ ୨ଜଣ ଲେଖାଏଁ ଡୋପ୍ କଣ୍ଟ୍ରୋଲ ଅଫିସର ରହିବେ। ଭାରତ ବାହାରେ ଡୋପ୍ ସାମ୍ପଲ ସଂଗ୍ରହ କରିବାକୁ ଥିବାରୁ ଏବାବଦରେ ଖର୍ଚ୍ଚ ନାଡା ଅବା ବିସିସିଆଇ କିମ୍ବା ଉଭୟେ ବହନ କରିବେ ତାହା ସ୍ପଷ୍ଟ ହୋଇନାହିଁ। ଭାରତରେ କିନ୍ତୁ ନାଡା ସାମ୍ପଲ ସଂଗ୍ରହ, ପରିବହନ ଏବଂ ଟେଷ୍ଟିଂ ବାବଦରେ ସମସ୍ତ ଖର୍ଚ୍ଚବହନ କରିଥାଏ। ନାଡା ଅଫିସରମାନଙ୍କୁ ବିସିସିଆଇ ଦ୍ୱାରା ସୃଷ୍ଟି କରାଯାଇଥିବା ବାୟୋ ବବଲ ପରିବେଶରେ ରହିବାକୁ କୁହାଯିବ। ୟୁଏଇରେ ପୃଥକ୍ ପୃଥକ୍ ୫ଟି ଡୋପ୍ କଣ୍ଟ୍ରୋଲ ଷ୍ଟେଶନ ପ୍ରତିଷ୍ଠା ପାଇଁ ନାଡା ବିସିସିଆଇକୁ କହିଛି। ତନ୍ମଧ୍ୟରେ ତିନୋଟି ଭେନ୍ୟୁ ଯଥା ଆବୁଧାବି, ଶାରଜା ଓ ଦୁବାଇରେ ହେବାକୁଥିବା ବେଳେ ଅନ୍ୟ ଦୁଇଟି ପ୍ରାକ୍ଟିସ ସ୍ଥଳ ଦୁବାଇ ଓ ଆବୁଧାବିରେ ହେବ।
