ନୂଆଦିଲ୍ଲୀ,୧୯।୯ – ଇଣ୍ଡିଆନ ରେଲୱେ କ୍ୟାଟରିଂ ଆଣ୍ଡ ଟୁରିଜିମ କର୍ପୋରେସନ (ଆଇଆରସିଟିସି) ପକ୍ଷରୁ ଶନିବାର ଦେଶର ପ୍ରଥମ ସ୍ବଦେଶୀ ପର୍ଯ୍ୟଟକ ଜଳଜାହାଜ ‘ଲକଜରୀ କ୍ରୁଜ ଲାଇନର’ର ଶୁଭାରମ୍ଭ କରାଯାଇଛି। ଏହି କ୍ରୁଜ୍ ସେବା ସ୍ଥାନୀୟ ଗୋଆ, ଡ୍ୟୁ, କୋଚ୍ଚି, ଲାକ୍ଷାଦ୍ୱୀପ ଓ ଶ୍ରୀଲଙ୍କା ସମେତ ଭାରତର ପ୍ରମୁଖ ଜଳରାଶି ଏବଂ ଆକର୍ଷଣୀୟ ପର୍ଯ୍ୟଟନ ସ୍ଥଳ ଆଦି ପରିଦର୍ଶନ କରାଇବ ବୋଲି ଜଣାପଡିଛି। ଉକ୍ତ କ୍ରୁଜରେ ରେଷ୍ଟୁରାଣ୍ଟ, ବାର, ସୁଇମିଂପୁଲ, ଓପନ ସିନେମା ଓ ଥିଏଟର ଭଳି ସୁବିଧା ମଧ୍ୟ ଉପଲବ୍ଧ ରହିଛି। ଏହା ଛଡା ପିଲାଙ୍କ ଲାଗି କିଡସ୍ ଏରିଆ ଓ ଅନେକ ମନୋରଞ୍ଜନ ସମ୍ପର୍ଣ୍ଣ ଆକ୍ଟିଭିଟିଜ ମଧ୍ୟ ଏଥିରେ ସାମିଲ କରାଯାଇଛି। ସେହିଭଳି ଆଇଆରସିଟିସି କ୍ରୋଡେଲିଆ କ୍ରୁସିସ ନାମକ ସଂସ୍ଥା ସହ ମିଶି କାର୍ଯ୍ୟ କରିବ ଏବଂ ଏହାକୁ ଏମଏସ ଓ୍ବାଟର ଓ୍ବେଏ ମାର୍କେଟିଙ୍ଗ କରିବ ବୋଲି ଜଣାପଡିଛି। ଦେଶରେ ଏବେବି କରୋନା ମହାମାରୀର ପ୍ରକୋପ ଜାରି ରହିଛି। ଏହି ପରିପ୍ରେୀରେ କ୍ରୁଜରେ କୋଭିଡ-୧୯ କଟକଣାକୁ କଡାକଡି ପାଳନ କରାଯାଉଛି। ଏହାର ବେସ୍ ଷ୍ଟେସନ ବର୍ତ୍ତମାନ ସମୟରେ ମୁମ୍ବାଇ ରହିଛି। ୨୦୨୨ରେ ଏହାକୁ ଚେନ୍ନାଇକୁ ସ୍ଥାନାନ୍ତରଣ କରିଦିଆଯିବ ବୋଲି ସୂଚନା ମିଳିଛି। ବେସ୍ ଷ୍ଟେସନ ସିଫ୍ଟ ହେବା ପରେ ପର୍ଯ୍ୟଟକ ଶ୍ରୀଲଙ୍କାର କଲମ୍ବୋ, ଗାଲେ, ତ୍ରିଙ୍କୋମାଲୀ ଓ ଜାଫନା ମଧ୍ୟ ପର୍ଯ୍ୟଟନରେ ଯାଇପାରିବେ। ଆଗକୁ ପାର୍ବଣ ଓ ନୂଆ ବର୍ଷ ଆସୁଛି ଏହାକୁ ନଜରରେ ରଖି ଏହାର ଚାହିଦ ବଢିବ ବୋଲି ଆଇଆରସିଟିସି ପକ୍ଷରୁ କୁହାଯାଇଛି।