ଦାରିଙ୍ଗବାଡ଼ି,୧୬ା୧୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସିମନବାଡ଼ି ଦେଇ ଯାଇଥିବା ୫୯ ନଂ ଜାତୀୟ ରାଜପଥର ଜହନପଲ୍ଲୀଠାରେ ଏକ ଲୁହା ବୋଝେଇ ଟ୍ରାକ୍ଟର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ କେବଳ ଚାଳକ ରହିଥିବାବେଳେ ସେ ଅଳ୍ପକେ ବଡ଼ ଅଘଟଣରୁ ବର୍ତ୍ତି ଯାଇଥିବା ଜଣାପଡ଼ିଛି।
ପ୍ରକାଶ ଯେ, ଏକ ନମ୍ବରବିହୀନ ଟ୍ରାକ୍ଟର ସିମନବାଡ଼ିରୁ ଲୁହାଛଡ଼ ବୋଝେଇ କରି ଦୁର୍ଗମ ସୋନପୁର ପଞ୍ଚାୟତ ଅଭିମୁଖେ ଯାତ୍ରା କରୁଥିଲା। ମାତ୍ର ୪ ଶହ ମିଟର ଦୂରତା ଯାଇଛି ଲୁହାଛଡ଼ ବୋଝେଇ ଡାଲାଟିର କିଛି ଅଂଶ ଭାଙ୍ଗି ଯାଇଥିଲା ଓ ଟ୍ରାକ୍ଟରଟି ଭାରସାମ୍ୟ ହରାଇ ବସିଥିଲା ବୋଲି ଟ୍ରାକ୍ଟର ଚାଳକ ଅନିଲ ପ୍ରଧାନ କହିଛନ୍ତି। ତେବେ ଚାଳକ ମଦ୍ୟପାନ କରି ଦ୍ରୁତଗତିରେ ଟ୍ରାକ୍ଟର ଚଳାଉଥିବା ନେଇ ଚାପା ଉତ୍ତେଜନା ଦେଖାଯାଇଛି। ଖବର ପାଇ ଦାରିଙ୍ଗବାଡ଼ି ଆଇଆଇସି ଅଶୋକ କୁମାର ହାଁସଦା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
