ପୁରୀ ଅଫିସ,୨୦।୧୧: ପୋଲିସ ହେପାଜରେ ଯୁବକଙ୍କ ମୃତ୍ୟୁକୁ ନେଇ ଗଭୀର ଉଦ୍ବେଗ ପ୍ରକାଶ କରିଛି ଭାଜପା। ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ନେତୃତ୍ୱରେ ଗୁରୁବାର ସନ୍ଧ୍ୟାରେ ୨୦ଜଣ ବିଧାୟକଙ୍କ ଏକ ପ୍ରତିନିଧି ଦଳ ପୁରୀ ଆସି ମୃତକଙ୍କ ସମ୍ପର୍କୀୟଙ୍କୁ ଭେଟିଛନ୍ତି। ଏଥିପାଇଁ ପୋଲିସ ପ୍ରଶାସନ ଏବଂ ରାଜ୍ୟ ସରକାରଙ୍କୁ ଭାଜପା ଦାୟୀ କରିଛି। ସୁନ୍ଦରଗଡ଼ ଓ ପୁରୀରେ ହାଜତ ମୃତ୍ୟୁକୁ ନେଇ ଗୁରୁବାରକୁ କଳା ଦିବସ ଘୋଷଣା କରିଛନ୍ତି ପ୍ରଦୀପ୍ତ। ସେ କହିଛନ୍ତି, ରାଜ୍ୟରେ ଆଇନ ଶୃଙ୍ଖଳା ସମ୍ପୂର୍ଣ୍ଣ ଭୁଶୁଡି ପଡ଼ିିଛି। ଏହି ଘଟଣାକୁ ଭାଜପା ନିନ୍ଦା କରୁଛି। ପୋଲିସର ଏଭଳି ଆଚରଣକୁ ତୀବ୍ର ବିରୋଧ କରୁଛୁ। ମୃତକଙ୍କ ପରିବାରକୁ ୧ କୋଟି ଟଙ୍କା କ୍ଷତିପୂରଣ ସହ ସିଟିଂ ଜଜ୍ଙ୍କ ଦ୍ୱାରା ଏହାର ତଦନ୍ତ କରାଯାଉ। ପୁରୀ ଏସ୍ପିଙ୍କୁ କାର୍ଯ୍ୟାନ୍ତର ସହ ତାଙ୍କୁ ଅନ୍ୟ କୌଣସି ଜିଲାରେ ଏହି ପଦବୀରେ ରଖା ନ ଯାଉ। ଏହି ପ୍ରସଙ୍ଗକୁ ଭାଜପା ବିଧାନସଭାରେ ଉଠାଇବ ବୋଲି ପ୍ରଦୀପ୍ତ କହିଛନ୍ତି। ସେହିପରି ବିଧାୟକ ଜୟନାରାୟଣ ମିଶ୍ର ଏହି ଘଟଣାରେ ଏସ୍ପିଙ୍କ କାର୍ଯ୍ୟକୁ ନେଇ ପ୍ରଶ୍ନ ଉଠାଇଛନ୍ତି। ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ୩୦୨ ଦଫାରେ ମାମଲା ରୁଜୁ କରି ଗିରଫ କରାଯାଉ। ଫଳରେ ଭବିଷ୍ୟତରେ ଯେପରି ଆଉକେହି ଏଭଳି କାମ କରିବାକୁ ସାହସ କରିବେ ନାହିଁ। ବିଧାୟକ ଜୟନ୍ତ ଷଡ଼ଙ୍ଗୀ କହିଛନ୍ତି,ଏହା ପୋଲିସର ବର୍ବରତା। ବୋଧେ ପାକିସ୍ତାନ ଲୋକେ ପୁରୀକୁ ପଳାଇ ଆସିଥିବା ଭାବି ପୋଲିସ ଏଭଳି କାର୍ଯ୍ୟାନୁଷ୍ଠାନ କଲା। ଭାଜପାର ଏହି ପ୍ରତିନିଧି ଦଳରେ ଥିବା ଜିଲା ସଭାପତି ଆଶ୍ରିତ ପଟ୍ଟନାୟକ, ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, କୁସୁମ ଟେଟେ ପ୍ରମୁଖ ଏସ୍ପିଙ୍କ ଅଫିସ୍ ଆଗରେ ବିକ୍ଷୋଭ ପ୍ରଦର୍ଶନ କରିବା ପରେ ମୃତକଙ୍କ ପରିବାରକୁ ଭେଟିଥିଲେ।
