ଭୁବନେଶ୍ବର, ୧ା୪(ବ୍ୟୁରୋ): ଟାଟା ଷ୍ଟିଲ୍ ଲଙ୍ଗ୍ ପ୍ରଡକ୍ଟ ଲିମିଟେଡ୍ (ଟିଏସ୍ଏଲ୍ପିଏଲ୍) କୁ ନେଇ ଗୃହରେ ସରକାରଙ୍କ ଉପରେ ବର୍ଷିଛନ୍ତି ବିରୋଧୀ। ଉକ୍ତ କମ୍ପାନୀର କାରଖାନା ଯୋଡ଼ା ବ୍ଲକ ବିରିକଳା ପଞ୍ଚାୟତର ବିଲେଇପଦା ଏବଂ ଝାଡ଼ଖଣ୍ଡର ଜାମ୍ଶେଦପୁରଠାରେ ରହିଛି। କିନ୍ତୁ ବିଲେଇପଦା କାରଖାନା ପାଇଁ ଆବଶ୍ୟକ ନିଯୁକ୍ତି ନିମନ୍ତେ ବାହାରିଥିବା ବିଜ୍ଞପ୍ତିରେ ଝାଡ଼ଖଣ୍ଡ ଡୋମିସାଇଲ ନିୟମ ଅନୁଯାୟୀ ଆବେଦନ କରିବାକୁ କୁହାଯାଇଥିଲା। ଏଥିରେ ଓଡ଼ିଶାକୁ ଅଣଦେଖା କରାଯାଇଥିବାରୁ ବିରିକଳା ଅଞ୍ଚଳରେ ଜନ ଅସନ୍ତୋଷ ପ୍ରକାଶ ପାଇଥିଲା। ଏନେଇ ଗତ ୧୩ ତାରିଖରେ ଧରିତ୍ରୀରେ ଖବର ପ୍ରକାଶ ପାଇଥିଲା। ଶୁକ୍ରବାର ବିଧାନସଭାରେ ପ୍ରଶ୍ନକାଳ ଚାଲିଥିବାବେଳେ କଂଗ୍ରେସ ସଦସ୍ୟ ସନ୍ତୋଷ ସିଂ ସାଲୁଜା ଏହି ପ୍ରସଙ୍ଗ ଉଠାଇ ରାଜ୍ୟ ସରକାରଙ୍କୁ ସିଧାସଳଖ ଟାର୍ଗେଟ କରିଛନ୍ତି।
ସାଲୁଜା ପ୍ରଶ୍ନକାଳରେ କହିଛନ୍ତି ଯେ, ରାଜ୍ୟରେ ମେକ୍ ଇନ୍ ଓଡ଼ିଶା ବା ଓଡ଼ିଶା କନ୍କ୍ଲେଭ୍ କରନ୍ତୁ କିମ୍ବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାପାନ୍ରୁ ଇନ୍ଭେଷ୍ଟମେଣ୍ଟ ଆଣନ୍ତୁ ସେସବୁ ନେଇ ବିରୋଧୀ ସଦସ୍ୟ ଦଳ ମତ ନିର୍ବିଶେଷରେ ସ୍ବାଗତ କରୁଛନ୍ତି। କୌଣସି ଦଳ ଏହାକୁ ବିରୋଧ କରନ୍ତି ନାହିଁ। ହେଲେ ସ୍ଥାନୀୟ ଯୁବତୀ ଯୁବକ ଯେଉଁମାନେ ଚାକିରି ଆଶାରେ ଅଛନ୍ତି ସେମାନେ କ’ଣ କରିବେ। ରାଜ୍ୟରେ ୮ ଲକ୍ଷ ୮୦ ହଜାର ୧୭୫ ବେକାର ଯୁବତୀ ଯୁବକ ୪୦ଟି ଏମ୍ପ୍ଲୟମେଣ୍ଟ ଏକ୍ସଚେଞ୍ଜରେ ଆବେଦନ କରିଛନ୍ତି। ଓଡ଼ିଶା ଏବଂ ଝାଡ଼ଖଣ୍ଡ ସୀମାରେ ଟାଟା ଷ୍ଟିଲ୍ ଲଙ୍ଗ୍ ପ୍ରଡକ୍ଟସ୍ ଲିମିଟେଡ୍ ଏକ ପ୍ଲାଣ୍ଟ ବସାଇବାକୁ ଯାଉଛି। ଓଡ଼ିଶା ସରକାରଙ୍କଠାରୁ ଏବଂ ଆମ ରାଜ୍ୟରୁ ଯାହାସବୁ ସୁବିଧା ନେବା କଥା ସେମାନେ ପାଉଛନ୍ତି। ବିରିକଳା ପାଖରେ ଏହି ପ୍ଲାଣ୍ଟ ବସିବ। ଆଶ୍ଚର୍ଯ୍ୟର ବିଷୟ, ସେହି ଟାଟା କମ୍ପାନୀ ଚାକିରି ବିଜ୍ଞାପନରେ ଉଲ୍ଲେଖ କରିଛି ଯେ, ଝାଡ଼ଖଣ୍ଡର ମୂଳବାସିନ୍ଦା ଏଥିରେ ଆବେଦନ କରିପାରିବେ। ଏହିଭଳି ନ ହେବା ଦରକାର। ଓଡ଼ିଶାର ବେକାର ଯୁବତୀ ଯୁବକ ଯେଉଁମାନେ ପଢ଼ିଛନ୍ତି ସେମାନଙ୍କୁ ଚାକିରି ଦିଆଯାଉ। ନ ହେଲେ ବଲାଙ୍ଗୀର ଜାଲ୍ ସାର୍ଟିଫିକେଟ ଏବଂ ବଣିକ କୋଚିଂ ଯେମିତି ଚାଲିଛି ସେହିଭଳି ପରିସ୍ଥିତି ଉପୁଯିବ ବୋଲି ସାଲୁଜା କହିଛନ୍ତି। ମନ୍ତ୍ରୀ ପ୍ରତାପ କେଶରୀ ଦେବ ଏହା ଉପରେ ଉତ୍ତର ରଖି କହିଛନ୍ତି, ମାନ୍ୟବର ସଦସ୍ୟ ଯେଉଁ ପରାମର୍ଶ ଦେଉଛନ୍ତି, ସେନେଇ ସରକାର ସଚେତନ ଅଛନ୍ତି। ଏହାସହ ଗୃହକୁ ମଧ୍ୟ ବିଶ୍ୱାସ ଦେବାକୁ ଚାହୁଁଛି ଯେ, ଆଇନ ପରିସର ଭିତରେ ଯେତିକି ଓଡ଼ିଆ ଯୁବତୀ ଯୁବକ ଚାକିରି ପାଇବା କଥା ନିଶ୍ଚୟ ପାଇବେ। କେବଳ ସେତିକି ନୁହେଁ, ଓଡ଼ିଆ ଯୁବତୀ ଯୁବକଙ୍କୁ ଅଧିକ ଗୁରୁତ୍ୱ ଦେବା ଲାଗି କେତେକ ଶିଳ୍ପକୁ ନିର୍ଦ୍ଦେଶ ଦେବୁ ।