ବ୍ରହ୍ମପୁର ଅଫିସ,୩୧।୧: ଗଞ୍ଜାମ ଜିଲା ଉତ୍କଳ ବାଳାଶ୍ରମରେ ପାଳିତ ହେଉଥିବା ଶିଶୁ କନ୍ୟାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିବାକୁ ବିଦେଶୀମାନେ ପସନ୍ଦ କରୁଛନ୍ତି। ଗତ ଡିସେମ୍ବର ୧୦ରେ ସ୍ପେନର ଏକ ଦମ୍ପତି ଜଣେ ଶିଶୁକନ୍ୟାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଥିଲେ। ସେହିଭଳି ଶନିବାର ଇଟାଲୀ ଜେନେଭା ସହରର ଦମ୍ପତି ଗାମ୍ବୋଲା ନିକେଲ ଓ ଉବେଜିଓ ଏଲିମା ମଧ୍ୟ ଏକ ଶିଶୁକନ୍ୟାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଛନ୍ତି। ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ଉପସ୍ଥିତିରେ ଇଟାଲୀ ଦମ୍ପତି ଏହି ଶିଶୁକନ୍ୟାଟିକୁ ପୋଷ୍ୟ ଗ୍ରହଣ କରିଛନ୍ତି। ୨୦୧୭ ଡିସେମ୍ବର ୧୬ରେ ଏମ୍କେସିଜି ମେଡିକାଲ ରାସ୍ତା କଡ଼ରୁ ଉଦ୍ଧାର ହୋଇଥିବା ନବଜାତ ଶିଶୁକନ୍ୟାଟି ଗୋଷାଣୀନୂଆଗଁା ଉତ୍କଳ ବାଳାଶ୍ରମରେ ରହି ସ୍ପେଶାଲ ଆଡ୍ପଶନ ଏଜେନ୍ସି (ସା) ଦ୍ୱାରା ଲାଳନ ପାଳନ ହେଉଥିଲା। ଝିଅଟି ନାମ ସ୍ନେହା। ତା’ର ଜନ୍ମ ସ୍ଥାନ ବ୍ରହ୍ମପୁର ହୋଇଥିବା ବେଳେ ସେ ଏବେ ଇଟାଲୀରେ ରହି ନିଜ ଭବିଷ୍ୟତ ଗଢ଼ିବ ବୋଲି ମା’ ଏଲିମା କହିଛନ୍ତି। ସ୍ନେହା ଏବେ ୨/୩ ଦିନ ଭିତରେ ଇଟାଲୀରେ ନୂତନ ସୂର୍ଯ୍ୟ ଦେଖିବ।
ସୂଚନାଯୋଗ୍ୟ, ସା’ରେ ରହୁଥିବା ଶିଶୁ କନ୍ୟାକୁ ପୋଷ୍ୟ ଭାବେ ଗ୍ରହଣ କରିବାକୁ ପୂର୍ବରୁ ଇଟାଲୀ ଦମ୍ପତି ସମସ୍ତ ପ୍ରକାର ଆଇନଗତ ପ୍ରକ୍ରିୟା ଶେଷ କରିଥିଲେ ବୋଲି ସା’ର ଅଧ୍ୟକ୍ଷ ସିବିୟନ ପ୍ରଧାନ କହିଛନ୍ତି। ଶିଶୁ ହସ୍ତାନ୍ତର ବେଳେ ଶିଶୁ ମଙ୍ଗଳ କମିଟି ସଦସ୍ୟା ସିଏଚ୍ ଜ୍ୟୋତି, ସଦସ୍ୟ ଶ୍ୟାମକାନ୍ତ ଜେନା, ଡିସିପିଓ ସୁବୋଧ ଷଡଙ୍ଗୀ, ଜିଲା ସମାଜ ମଙ୍ଗଳ ଅଧିକାରୀ ସୁରେଖା ସୁନ୍ଦରୀ ମଲ୍ଲିକ, ବାଳାଶ୍ରମ ସୁପରିଣ୍ଟେଣ୍ଡେଣ୍ଟ ସସ୍ମିତା ପାଢୀ ପ୍ରମୁଖ ଉପସ୍ଥିତ ଥିଲେ।