ଟୋକିଓ,୧୫।୭(ପି.ଟି.): ଜପାନ ସମ୍ରାଟ ନରୁହିଟୋ ଜୁଲାଇ ୨୩ରେ ଅଲିମ୍ପିକ୍ସ ଉଦ୍ଘାଟନୀ ଉତ୍ସବରେ ଯୋଗ ଦେବେ। ସେ ଅଲିମ୍ପିକ୍ସ ଆରମ୍ଭ ହେଲା ବୋଲି ଘୋଷଣା କରିପାରନ୍ତି ବୋଲି ଏକ ରିପୋର୍ଟରୁ ଏ ନେଇ ସୂଚନା ମିଳିଛି। ନରୁହିଟୋ ଉଦ୍ଘାଟନୀ ଉତ୍ସବରେ ଯୋଗ ଦେବାର ସମ୍ଭାବନା ଥିବାରୁ ଆୟୋଜକମାନେ ସବୁ ପ୍ରକାର ବ୍ୟବସ୍ଥା ଗ୍ରହଣ କରିବାକୁ ପ୍ରୟାସ ଜାରି ରଖିଛି।
ରାଜ ପ୍ରାସାଦରେ ସେ ବିଦେଶୀ ଗଣମାନ୍ୟ ବ୍ୟକ୍ତିଙ୍କ ସହ ସାକ୍ଷାତ କରିବେ। ତେବେ କୋଭିଡ୍-୧୯ କାରଣରୁ ପ୍ରାୟ ସବୁ ଇଭେଣ୍ଟ ରୁଦ୍ଧଦ୍ୱାରରେ ଆୟୋଜନ ହେବାର କାର୍ଯ୍ୟକ୍ରମ ଥିବାରୁ ରାଜ ପରିବାରର ସଦସ୍ୟମାନେ ଅଲିମ୍ପିକ୍ସର ଅନ୍ୟ ଇଭେଣ୍ଟରେ ଅଂଶଗ୍ରହଣ କରିବେ ନାହିଁ ବୋଲି ଅନୁମାନ କରାଯାଉଛି। ୬୧ ବର୍ଷୀୟ ନରୁହିଟୋ ଟୋକିଓ ଅଲିମ୍ପିକ୍ସ ଓ ପାରା ଅଲିମ୍ପିକ୍ସର ସମ୍ମାନସ୍ପଦ ପୃଷ୍ଠପୋଷକ ରହିଛନ୍ତି। ପୂର୍ବରୁ କୋଭିଡ୍-୧୯ କାରଣରୁ ଅଲିମ୍ପିକ୍ ଆୟୋଜନ ନେଇ ନରୁହିଟୋ ଚିନ୍ତା ପ୍ରକଟ କରିଥିଲେ। ଅଲିମ୍ପିକ୍ ଆୟୋଜନ ଦ୍ୱାରା କରୋନ ସଂକ୍ରମଣରେ ବୃଦ୍ଧିଘଟିବ ବୋଲି ସେ ଆଶଙ୍କା ପ୍ରକାଶ କରିଥିଲେ। ତୃତୀୟ ସମ୍ରାଟ ଭାବେ ନରୁହିଟୋ ପୃଷ୍ଠପୋଷକର ଭୂମିକା ଗ୍ରହଣ କରିଛନ୍ତି। ଉଭୟ ଅଲିମ୍ପିକ ଓ ପାରା ଅଲିମ୍ପିକ୍ ପାଇଁ ସେ ପ୍ରଥମ ସମ୍ରାଟ ଭାବେ ଏହି ଭୂମିଗା ଗ୍ରହଣ କରିଛନ୍ତି। ତାଙ୍କ ବାପା ଅକିହିଟୋ ୧୯୯୮ ନାଗାନୋ ଓ୍ବିଣ୍ଟର ଅଲିମ୍ପିକ୍ସ ଓ ଜେଜେ ହିରୋହିଟୋ ୧୯୬୪ ଟୋକିଓ ଅଲମ୍ପିକ୍ସ ଓ ୧୯୭୨ ସାପ୍ପୋରୋ ଶୀତକାଳୀନ ଅଲିମ୍ପିକ୍ସ ଉଦ୍ଘାଟନ କରିଥିଲେ।
