ଚମ୍ପୁଆ, ୩।୩ (ଡି.ଏନ.ଏ)-ପ୍ଲାଷ୍ଟିକ ବ୍ୟବହାର ଯୋଗୁ ପ୍ରଦୂଷଣ ସମସ୍ୟାକୁ ରୋକିବା ପାଇଁ ସରକାରୀ ସ୍ତରରେ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ମାତ୍ର କେନ୍ଦୁଝର ଜିଲା ଚମ୍ପୁଆ ବିଜ୍ଞାପିତ ଅଞ୍ଚଳରେ ପ୍ଲାଷ୍ଟିକ ବ୍ୟବହାର କମିବା ବଦଳରେ ବଢ଼ିବାରେ ଲାଗିଛି। ଚମ୍ପୁଆ ସହରକୁ ପ୍ଲାଷ୍ଟିକମୁକ୍ତ କରି ସୁନ୍ଦର ସହର ଗଢ଼ିବାର ସ୍ବପ୍ନ ପ୍ରହସନରେ ପରିଣତ ହୋଇଛି। ଯାହାକି ସହରରେ କୁଢ଼ କୁଢ଼ ପ୍ଲାଷ୍ଟିକକୁ ଦେଖି ସ୍ପଷ୍ଟ ଜଣାପଡୁଛି।
ପ୍ରକାଶ ଯେ, ଗତବର୍ଷ ଫେବୃୟାରୀ ଓ ମାର୍ଚ୍ଚରେ ସରକାରଙ୍କ ପକ୍ଷରୁ ପ୍ଲାଷ୍ଟିକ ଉପରେ କଟକଣା ଲାଗୁ ହୋଇଥିଲା। ଏହାପରେ ଚମ୍ପୁଆ ଏନ୍ଏସି ପକ୍ଷରୁ ବିଭିନ୍ନ ଦୋକାନ ବଜାର ସହିତ ପଲିଥିନ ବିକୁଥିବା ଦୋକାନରେ ଚଢ଼ାଉ କରାଯାଇଥିଲା। ୪୦ରୁ ୭୦ କେଜି ପର୍ଯ୍ୟନ୍ତ ପଲିଥିନ ଓ ଥର୍ମକଲ ଆଦି ଜବତ ସହ ଜରିମାନା ଆଦାୟ କରାଯାଇ ସରକାରଙ୍କ ଦ୍ୱାରା ନିର୍ଦ୍ଧାରିତ ମାନର ପଲିଥିନ ବ୍ୟବହାର ଲାଗି ପରାମର୍ଶ ଦିଆଯାଇଥିଲା। ମାତ୍ର ଏବେ ସହରରେ ପୁଣି ପୂର୍ବ ଅବସ୍ଥା। ବହୁଳ ମାତ୍ରାରେ ପଲିଥିନ ବ୍ୟବହାର ହେଉଥିବା ଦେଖିବାକୁ ମିଳୁଛି। ମାତ୍ର ୩ରୁ ୪ ଥର ଚଢ଼ାଉ କରି ସହରକୁ ପ୍ଲାଷ୍ଟିକମୁକ୍ତ କରିବାର ଡିଣ୍ଡିମ ପିଟୁଥିବା ଏହି ଏନଏସିରେ ବର୍ତ୍ତମାନ ପ୍ଲାଷ୍ଟିକ ଯୋଗୁ ପରିସ୍ଥିତି ବିଗିଡ଼ିବାରେ ଲାଗିଛି ବୋଲି ସ୍ଥାନୀୟ ବୁଦ୍ଧିଜୀବୀ ମହଲରେ କୁହାଯାଉଛି। ଦୈନଦିନ ଡଷ୍ଟବିନରେ ଶହ ଶହ ପଲିଥିନ ଓ ଥର୍ମକଲ ପଡ଼ିରହୁଥିବା ବେଳେ ପ୍ରାଣୀଙ୍କ ଆହାର ପାଲଟୁଛି। ଯାହାକି ପ୍ରାଣୀ ସମ୍ପଦକୁ ବିପଦ ମୁଖକୁ ଟାଣି ନେଉଛି। ଏପରିକି ଛୋଟରୁ ବଡ଼ ଦୋକାନ ପଲିଥିନ ମାଧ୍ୟମରେ ଖାଦ୍ୟ ପାର୍ଶଲ ଆକାରରେ ଦେଉଛନ୍ତି। ଏ ସମ୍ପର୍କରେ ନିର୍ବାହୀ ଅଧିକାରୀ ଗୌରହରି ବେହେରାଙ୍କୁ ପଚାରିବାରୁ କହିଛନ୍ତି, ନିକଟ ଭବିଷ୍ୟତରେ ଏନେଇ ଚଢ଼ାଉ କରାଯିବାର ଯୋଜନା ରହିଛି। ଖୁବ୍ଶିଘ୍ର ଦୃଢ଼ କାର୍ଯ୍ୟାନୁଷ୍ଠାନ ପୂର୍ବକ ପଲିଥିନ ଉପରେ ରୋକ୍ ଲଗାଯିବ।