ପାରଳାଖେମୁଣ୍ଡି,୩୧।୮(ଡି.ଏନ୍.ଏ.): ଗୋଷାଣୀ ବ୍ଲକ ଅନ୍ତର୍ଗତ ଉପଲଡା-ଲିଙ୍ଗିପୁର-ଗୁରାଣ୍ଡି ରାସ୍ତା ଅବସ୍ଥା ଶୋଚନୀୟ ହୋଇପଡିଛି। ଏହି ରାସ୍ତାରେ ଦୈନନ୍ଦିନ ଯାତ୍ରା କରୁଥିବା ପଥଚାରୀ ତଥା ଯାନବାହନଗୁଡିକ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ଉପଲଡା-ଲିଙ୍ଗିପୁର-ଗୁରାଣ୍ଡି-ଗୋଷାଣୀ ରାସ୍ତାରେ ବହୁ ଗ୍ରାମାଞ୍ଚଳ ରହିଛି। ଏଥିସହ ଉକ୍ତ ପଥଟି ପାରଳାଖେମୁଣ୍ଡିରୁ ଗୋଷାଣୀ କମ୍ ଦୂରାନ୍ତ ଏବଂ ଜାତୀୟ ରାଜପଥ ୩୨୬-ଏରୁ ରାଜ୍ୟ ରାଜପଥକୁ ସଂଯୋଗୀ କରୁଛି। ତେଣୁ ବହୁ ଲୋକ ଏହି ରାସ୍ତା ଦେଇ ଗୋଷାଣୀ ଛକରେ ବାହାରି ଗାରବନ୍ଧ ଆଦି ଗ୍ରାମ ଦେଇ ବ୍ରହ୍ମପୁରକୁ ଯାତାୟାତ କରିଥା’ନ୍ତି। ସେହିଭଳି ଉକ୍ତ ରାସ୍ତା ଅଞ୍ଚଳରେ ବହୁ ଜମିଜମା ରହୁଥିବାରୁ ଚାଷୀମାନଙ୍କର ଜୀବନରେଖା ଅଟେ। ଏହି ରାସ୍ତାର ଅବସ୍ଥା ଅତି ଶୋଚନୀୟ ହୋଇ ପଡିବାରୁ ଗତ ପ୍ରାୟ ୩ବର୍ଷ ପୂର୍ବେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ବର୍ଷକ ମଧ୍ୟରେ ରାସ୍ତା ନିର୍ମାଣ ସରିଥିଲା। ମାତ୍ର ଦୁଇବର୍ଷ ହେଲା ନିର୍ମିତ ରାସ୍ତାଟି ବର୍ତ୍ତମାନ ଜରାଜୀର୍ଣ୍ଣ ହୋଇପଡିଛି। ସ୍ଥାନେ ସ୍ଥାନେ ଖାଲଖମା ସୃଷ୍ଟି ହେବା ସହ ପିଚୁ ଉଠିଯାଇ ଚିପ୍ସଗୁଡିକ ବିଛାଡି ହୋଇପଡିଛି। ଫଳରେ ଗାଡି ଚଳାଚଳରେ ବହୁ ବାଧା ଉପୁଜୁଥିବାର ଅଞ୍ଚଳବାସୀ କହିଛନ୍ତି। ଅନ୍ୟପକ୍ଷରେ ଉକ୍ତ ରାସ୍ତା କାମଟି ଠିକାଦାର ଜଣକ ନିମ୍ନମାନର କରିଥିବାର ମଧ୍ୟ ଅଭିଯୋଗ ହୋଇଛି। ଏଥିସହ ଏହି ରାସ୍ତାରେ ସେହି ଅଞ୍ଚଳରେ ଥିବା କେତେକ କ୍ରଶର, ପଥର ଖାଦାନର ଭାରିଯାନଗୁଡିକ ଦୈନିକ ଯାତାୟାତ କରୁଥିବାରୁ ଏପରି ରାସ୍ତା ଖରାପ ହୋଇଯାଇଛି ବୋଲି ଚର୍ଚ୍ଚା ହେଉଛି । ତେଣୁ ଉକ୍ତ ରାସ୍ତା ପ୍ରତି ପ୍ରଶାସନ ଧ୍ୟାନ ଦେବା ଜରୁରୀ ହୋଇପଡିଛି ବୋଲି
ସାଧାରଣରେ ମତ ପ୍ରକାଶ ପାଇଛି ।