କର୍ଲାମୁଣ୍ଡା, ୧୭।୧୦ (ଡି.ଏନ୍.ଏ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ପଞ୍ଚାୟତ ସମିତିର ଅଧ୍ୟକ୍ଷାଙ୍କ ବିପକ୍ଷରେ ଆଗତ ଅନାସ୍ଥାପ୍ରସ୍ଥାବରେ ଭୋଟର ଗଣତି ପରେ ଅଧ୍ୟକ୍ଷାଙ୍କ ପରାଜୟ ହୋଇଥିବାରୁ ଗତ ୧୨ ତାରିଖ ଠାରୁ ଅଧ୍ୟକ୍ଷା ପଦବୀ ଖାଲି ପଡିଥିଲା। ଏ ନେଇ ଓଡିଶା ପଞ୍ଚାୟତ ସମିତି ଆଇନ ୧୯୫୯ ଧାରା ୨୦ କ(୩) ଅନୁଯାୟୀ, ତୁରନ୍ତ କର୍ଲାମୁଣ୍ଡା ଉପାଧ୍ୟକ୍ଷାଙ୍କୁ ଅଧ୍ୟକ୍ଷା ଦାୟିତ୍ୱ ଦେବା ନେଇ ସମିତି ସଭ୍ୟା/ସଭ୍ୟମାନେ ଜିଲାପାଳଙ୍କ ଦୃଷ୍ଟି ଆର୍କଷଣ କରିଥିଲେ। ତେବେ ପ୍ରଶାସନ ନୀରବଦ୍ରଷ୍ଟା ହେବାରୁ ଗୁରୁବାର ଅପରାହ୍ନଠାରୁ ଶୁକ୍ରବାର ରାତି ପର୍ଯ୍ୟନ୍ତ ଉପାଧ୍ୟକ୍ଷାଙ୍କ ନେତୃତ୍ୱରେ ସମିତି ସଭ୍ୟା/ସଭ୍ୟମାନେ ବ୍ଲକ ପରିସରରେ ଆମରଣ ଅନଶନରେ ବସିଥିଲେ। ଶୁକ୍ରବାର ବିଳମ୍ବିତ ରାତିରେ ଜିଲାପାଳଙ୍କ ଅଫିସ ଅର୍ଡର ସଂଖ୍ୟା- ୯୫୬, ତା. ୧୬.୧୦.୨୦୨୦ ଅନୁଯାୟୀ ଉପାଧ୍ୟକ୍ଷା ଆନନ୍ଦିନୀ ଭୋଇଙ୍କୁ ଅଧ୍ୟକ୍ଷା ଦାୟିତ୍ୱ ମିଳିବା ନେଇ ଚିଠି ପାଇବା ପରେ ଆମରଣ ଅନଶନକାରୀ ମାନେ ଧାରଣାକୁ ପ୍ରତ୍ୟାହାର କରିଥିବା ଜଣାପଡିଛି। ଅନ୍ୟପଟେ ପୂର୍ବତନ ବ୍ଲକ ଅଧ୍ୟକ୍ଷା ଅମୃତା ସାହୁ ଭୁଲ ପଦ୍ଧତିରେ ଗୁପ୍ତମତଦାନର ଭୋଟ ଗଣତି ହୋଇଥିବାର ଅଭିଯୋଗ କରି ୧୫.୧୦.୨୦୨୦ ରେ କୋର୍ଟର ଦ୍ୱାରସ୍ଥ ହୋଇଥିବା ପ୍ରକାଶ କରିଛନ୍ତି।