ଖଣ୍ଡପଡ଼ା,୧୭ା୪(ସ୍ବ.ପ୍ର.): କୁଆଁରିଆ ନଦୀରେ ବନ୍ୟା ଆସିଲେ ପଠାରୁ ଅତଡା ଖସୁଛି। ଏହି ସମସ୍ୟା କୁଆଁରିଆ ନଦୀ ତଟବର୍ତ୍ତୀ ଖଣ୍ଡପଡ଼ା ବ୍ଲକ ଅଧୀନ ବଳଭଦ୍ରପ୍ରସାଦ, କୁମ୍ଭାରପଡ଼ା, ରୟତଢୋଲମରା, କୋସକା, କିଆଝର ଓ ଗଡିଆସାହି ଆଦି ୬ ପଞ୍ଚାୟତବାସୀଙ୍କ ପାଇଁ ସମସ୍ୟା ସୃଷ୍ଟି କରିଛି। କୁଆଁରିଆ ନଦୀର ପ୍ରଖରସ୍ରୋତ ଯୋଗୁ ଅଞ୍ଚଳବାସୀଙ୍କ ଘରଡିହ ଓ ଜମି ସମୟାନୁକ୍ରମେ ନଦୀ ଗର୍ଭରେ ଲୀନ ହେବାରେ ଲାଗିଛି। ସେହିପରି ପ୍ରତିବର୍ଷ ନଦୀର ଗତିପଥରେ ପରିବର୍ତ୍ତନ ଯୋଗୁ ଉପରୋକ୍ତ ପଞ୍ଚାୟତବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବନ୍ୟା ସମୟରେ ନଦୀ ପାର୍ଶ୍ୱସ୍ଥ ମାଳବନ୍ଧରୁ ପଥରପ୍ୟାକିଂ ନଦୀଗର୍ଭରେ ଖସି ପଡୁଛି। ଏଥିପାଇଁ ମାଳବନ୍ଧ ଦୁର୍ବଳ ହେବାରେ ଲାଗିଛି। କୁଆଁରିଆ ମାଳବନ୍ଧର ଦୁର୍ବଳସ୍ଥାନଗୁଡିକୁ ଚିହ୍ନଟ କରି ପଥର ପ୍ୟାକିଂ କରିବା ନିମନ୍ତେ କଣ୍ଟିଲୋ ଜଳସେଚନ ବିଭାଗ କତ୍ତୃପକ୍ଷ ଦୃଷ୍ଟିଦେବାକୁ ଅଞ୍ଚଳବାସୀ ଦାବି କରିଛନ୍ତି। ସେହିପରି ଖଣ୍ଡପଡ଼ା ବ୍ଲକ ଅଧୀନ କୋସକା-ଆଡକଟା ରାସ୍ତାର କୁଆଁରିଆ ସେତୁ ନିକଟସ୍ଥ ନଦୀର ଉଭୟ ପାର୍ଶ୍ୱରେ ପଥରପ୍ୟାକିଂ ନଷ୍ଟ ହୋଇଛି। ଦିନକୁ ଦିନ ପଠା ଖାଇଯାଇ ନଦୀ ଗର୍ଭ ଓସାରିଆ ହେବାରେ ଲାଗିଛି। ନଦୀର ଉଭୟ ପାର୍ଶ୍ୱରେ ପଥରପ୍ୟାକିଂ ନିମନ୍ତେ ଜଳସେଚନ ବିଭାଗ ଉଚ୍ଚ କତ୍ତୃପକ୍ଷ ଦୃଷ୍ଟିଦେବାକୁ ଦାବି ହେଉଛି। ଏ ସମ୍ପର୍କରେ ଖଣ୍ଡପଡା ଜଳ ସମ୍ପଦ ବିଭାଗ ସେକ୍ସନ ଅଫିସର ସସ୍ମିତା ସାହୁଙ୍କ ସହ ଯୋଗାଯୋଗ କରିବାରେ ଏ ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ସେ ସୂଚନା ଦେଇଛନ୍ତି।