ଆମ ଦେଶରେ ଏମିତି ଏକ ମନ୍ଦିର ଅଛି ଯେଉଁଠି ତେଲ ନୁହେଁ, ପାଣିରେ ଜଳିଥାଏ ଦୀପ। ଗାଦିଆଘାଟ ମାତାଜୀ ମନ୍ଦିର ଏହି ଚମତ୍କାର ପାଇଁ ଜଣାଶୁଣା। କାଲିସିନ୍ଧ ନଦୀ କୂଳରେ ନିର୍ମିତ ଏହି ମନ୍ଦିରର ଚମତ୍କାରିତା ଦେଖିବା ପାଇଁ ଲୋକେ ଆସିଥାନ୍ତି।
ଏହି ମନ୍ଦିର ମଧ୍ୟପ୍ରଦେଶରେ ଅବସ୍ଥିତ। ଗାଦିଆଘାଟ ଓ୍ବାଲି ମାତାଜୀ ଭାବରେ ଏହା ଜଣାଶୁଣା। ଏହି ମନ୍ଦିର ଆଗର-ମାଲଓ୍ବା ନାଲକେଡା ଗ୍ରାମଠାରୁ ପ୍ରାୟ ୧୫ କିଲୋମିଟର ଦୂରରେ ଥିବା ଗାଦିଆ ଗାଁ ନିକଟରେ ଅବସ୍ଥିତ। ଏହା ପଛରେ ଏକ କାହାଣୀ ରହିଛି। ଥରେ ପୁରୋହିତଙ୍କୁ ସ୍ବପ୍ନରେ ମା’ ଏହା କହିଥିଲେ। ମନ୍ଦିରରେ ପୂଜା କରୁଥିବା ପୁରୋହିତ କହିଛନ୍ତି ଯେ, ଏହାପୂର୍ବରୁ ଏଠାରେ ସର୍ବଦା ତେଲ ଦୀପ ଜାଳୁଥିଲେ, କିନ୍ତୁ ପ୍ରାୟ ୧୦ ବର୍ଷ ପୂର୍ବେ ତାଙ୍କୁ ମା’ପାଣିରେ ଦୀପ ଜାଳିବାକୁ କହିଥିଲେ। ପୁରୋହିତ ତା’ ପରଦିନ ସକାଳୁ ଉଠି ନିକଟସ୍ଥ କାଲିସିନ୍ଧ ନଦୀରୁ ପାଣି ଆଣି ଦୀପରେ ଦେଇଥିଲେ। ଏହି ଦୀପରେ ଥିବା କପା ସୂତାର ବଳିତାରେ ଦିଆସିଲି ମାରିବା ମାତ୍ରେ ଏହା ଜଳିବାକୁ ଲାଗିଥିଲା।
ଏହି ଚମତ୍କାରିତା ଦେଖି ପୁରୋହିତ ଭୟଭୀତ ହୋଇଯାଇଥିଲେ। ଯେତେବେଳେ ସେ ଏ ସମ୍ପର୍କରେ କିଛି ଗ୍ରାମବାସୀଙ୍କୁ କହିଥିଲେ, ସେମାନେ ମଧ୍ୟ ପ୍ରଥମେ ବିଶ୍ୱାସ କରି ନ ଥିଲେ। ମାତ୍ର ପରେ ଯେତେବେଳେ ସେ ଦୀପରେ ପାଣି ଢାଳି ନିଆଁ ଜଳାଇଥିଲେ, ସେତେବେଳେ ଦୀପ ଜଳିଥିଲା। ଏପରି ଚମତ୍କାରିତା ବିଷୟରେ ସମଗ୍ର ଗାଁରେ ବ୍ୟାପିଗଲା। ସେହିଦିନଠାରୁ ଏହି ମନ୍ଦିରରେ ପାଣିରେ ଦୀପ ଜଳୁଛି। ଏହାକୁ ଦେଖିବା ପାଇଁ ଦୂର ଦୂରାନ୍ତରୁ ଅନେକ ଶ୍ରଦ୍ଧାଳୁ ଆସୁଛନ୍ତି।