ରାଜନଗର,୯।୮ (ଡି.ଏନ.ଏ.)ଚଳିତବର୍ଷ ଅନିୟମିତ ବୃଷ୍ଟିପାତ ଯୋଗୁ ଚାଷୀକୁଳ ହତାଶ ହୋଇପଡିଛନ୍ତି। ଜୁନ ପ୍ରଥମ ସପ୍ତାହରେ ମୌସୁମୀର ଆଗମନ ଚାଷୀମାନଙ୍କୁ ଆନନ୍ଦିତ କରିଥିଲା। ହଠାତ୍ ଜୁଲାଇ ପ୍ରଥମ ସପ୍ତାହରୁ ମୌସୁମୀ ଉଭାନ ହୋଇଗଲା। ଆଷାଢ଼ ଯାଇ ଶ୍ରାବଣ ଚାଲିଛି। ଶ୍ରାବଣରେ ବିଲ ପୋଖରୀ ବର୍ଷାଜଳରେ ବୁଡିଯିବା କଥା। କିନ୍ତୁ ଶ୍ରାବଣରେ ମୁଣ୍ଡ ଫଟା ଖରା ସାଙ୍ଗକୁ ଧାନତଳି ରୁଆ, ବେଉଷଣ ହେବାକୁ ଥିବା ବିଲଗୁଡିକ ଫାଟି ଆଁ କଲାଣି। ଚାଷୀଙ୍କ ମନରେ ଆଶଙ୍କା ଦେଖାଯିବା ସହିତ ଧୀରେ ଧୀରେ ଅନିୟମିତତା ବର୍ଷା ମରୁଡି ଆଡ଼କୁ ମୁହାଁଉଛି।
ଦିନଥିଲା କେନ୍ଦ୍ରାପଡ଼ାର ରାଜନଗରରୁ ଉତ୍ପାଦିତ ଧାନ କଟକ ସହ ରାଜ୍ୟର ବିଭିନ୍ନ ଜିଲାକୁ ଯୋଗାଣ ହେଉଥିଲା। କିନ୍ତୁ ଜଳବାୟୁର ପରିବର୍ତ୍ତନ ସାଙ୍ଗକୁ ୧୯୯୯ ମହାବାତ୍ୟା ପରଠାରୁ ଏହି ଅଞ୍ଚଳର ଚାଷୀମାନେ ପାଗ ଅନୁକୂଳ ନ ହେବାରୁ ଚାଷକାର୍ଯ୍ୟ ବାଧାପ୍ରାପ୍ତ ହୋଇଆସୁଛି। ଚାଷୀମାନେ ଧାନ ଅମଳ କଲେ ପରିବାର ଚଳାଇବା ସହ ପିଲାଙ୍କ ପାଠପଢା, ଝିଅ ବାହାଘର ଓ ଋଣ ଶୁଝିବାରେ ଚାଷ ଉପରେ ନିର୍ଭର କରିଥାନ୍ତି। ପରିସ୍ଥିତି ଏପରି ହୋଇଛି ଆଉ ସପ୍ତାହକ ମଧ୍ୟରେ ବର୍ଷା ନ ହେଲେ ସମ୍ପୂର୍ଣ୍ଣ ଖରିଫ ଧାନ ଚାଷ ଉଜୁଡି ଯିବ। ରାଜନଗରର ପ୍ରାୟ ୯୦ ପ୍ରତିଶତ ଚାଷୀ ଖରିଫ ଧାନ ଚାଷ କରି ପରିବାର ପ୍ରତିପୋଷଣ କରୁଛନ୍ତି। ଶ୍ରାବଣ ଅଧା ହେଲାଣି। ଓଡ଼ିଶାରେ ସ୍ବଭାବିକ ବର୍ଷା ହୋଇପାରୁନି। ଜଳବାୟୁର ଏଭଳି ପରିବର୍ତ୍ତନ ଏବେ ଚାଷୀକୁଳ ପାଇଁ କାଳ ସାଜିଛି। ବର୍ଷା ଅଭାବରୁ ରାଜନଗର ଅଞ୍ଚଳରେ ମରୁଡିର ପଦଧ୍ୱନି ଶୁଣିବାକୁ ମିଳିଲାଣି। ଜମିରେ ପାଣି ନ ଥିବାରୁ ଧାନ ତଳି ଜଳି ଗଲାଣି ତ ଆଉ କେଉଁଠି ମାଟି ଫାଟି ଆଁ କରିଛି। ବାତ୍ୟା ୟାସ୍ ଓ ଏହାପରେ ଭଲ ବର୍ଷା ହୋଇଥିଲା। ଚାଷୀମାନେ ଧାନ ତଳି ପକାଇବା ଆରମ୍ଭ କରିଥିଲେ। ମାତ୍ର ବିହନ ବୁଣିବାର ପରଠୁଁ ବର୍ଷା ଉଭାନ ହୋଇଯାଇଛି। ଧାରା ଶ୍ରାବଣରେ ବର୍ଷା ବଦଳରେ ପ୍ରଚଣ୍ଡ ଖରା ଯୋଗୁ ଧାନ ତଳି ମରିଯିବାକୁ ବସିଲାଣି। କେତେଜଣ ଚାଷୀ କେନାଲ ଓ ପୋଖରୀରୁ ପମ୍ପସେଟ୍ ସାହାଯ୍ୟରେ ପାଣି ତଳି ରୋଇଥିବା ବିଲକୁ ବୋହି ଚାଲିଛନ୍ତି। ଗତ ୨୦ ଦିନ ହେଲା ରାଜନଗର ଅଞ୍ଚଳରେ ବର୍ଷା ହୋଇନାହିଁ।
ରାଜନଗର ବ୍ଲକର ୨୯ଟି ପଞ୍ଚାୟତରେ ଚଳିତବର୍ଷ ୨୩ ହଜାର ହେକ୍ଟର ଜମିରେ ଖରିଫ ଧାନ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ରାଜନଗରରେ ଜଳସେଚନର ସୁବିଧା ନ ଥିବାବେଳେ ଉଠା ଜଳସେଚନ ପ୍ରକଳ୍ପ କାମ ନ କରିବା ଯୋଗୁ ଚାଷୀ ତଳି ଥିବା ବିଲକୁ ପାଣି ଅଣ୍ଟୁନି। କରୋନା ଯୋଗୁ ରାଜ୍ୟ ଓ ଦେଶ ବାହାରେ ଥିବା ପ୍ରବାସୀ ଶ୍ରମିକ ଗାଁକୁ ଫେରିଛନ୍ତି। ସେମାନଙ୍କ ରୋଜଗାରର ମାଧ୍ୟମ ବନ୍ଦ ହୋଇଯାଇଥିବା ବେଳେ ସେମାନେ ଖରିଫ ଧାନ ଚାଷ ଉପରେ ଭରସା କରିଥିଲେ। ଗର୍ହନପୁର ଗାଁର ବୁଦ୍ଧଦେବ ପ୍ରଧାନ, ଗୋସିଗାଁର କ୍ଷୀରୋଦ କୁମାର ରାଉତ, ଗୌରାଙ୍ଗ ରାଉତ, ଚକ୍ରଧର ବିଶ୍ୱାଳ, କାଙ୍ଗାଳି ଚରଣ ପ୍ରଧାନ ପ୍ରମୁଖ ଚାଷୀମାନେ ୩ରୁ ୪ ଦିନ ମଧ୍ୟରେ ଯଦି ବର୍ଷା ନ ହୁଏ ତେବେ ଧାନ ଚାଷ ଆଉ ସମ୍ଭବ ନୁହେଁ ବୋଲି କହିଛନ୍ତି।