ଭୁବନେଶ୍ୱର,୧୫।୩(ବ୍ୟୁରୋ):ବହୁଚର୍ଚ୍ଚିତ ସଙ୍ଗୀତ ନିର୍ଦ୍ଦେଶକ ସୁମନ୍ତ ମହାନ୍ତି ହତ୍ୟା ଘଟଣାର ୧୨ ବର୍ଷ ପରେ ଶେଷ ଅଭିଯୁକ୍ତ ଶେଷରେ ଧରାପଡ଼ିଛନ୍ତି। କମିଶନରେଟ ପୋଲିସର ସ୍ପେଶାଲ ସ୍କ୍ବାଡ୍ ତାଙ୍କୁ ଭୁବନେଶ୍ୱର ମଞ୍ଚେଶ୍ୱର ଥାନା ଅଞ୍ଚଳରୁ ଗିରଫ କରିଛି। ଅଭିଯୁକ୍ତ ଜଣକ ହେଲେ ଲିଟୁଆ ଓରଫ ବିକ୍ରମାଦିତ୍ୟ ଜେନା (୪୫)। ଘଟଣା ପରଠୁ ଫେରାର ଥିବା ବିକ୍ରମାଦିତ୍ୟ ପୁଣେରେ ଲୁଚି ରହିଥିଲେ। ଗତ ମାସେ ହେବ ସେ ଲକ୍ଷ୍ମୀସାଗର ଥାନା ଅନ୍ତର୍ଗତ ବମିଖାଲ ଜେନାସାହିସ୍ଥିତ ଘରକୁ ଆସିଥିଲେ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ରବିବାର ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ୨୦୦୮ ଅକ୍ଟୋବର ୯ରେ ଏହି ଘଟଣା ଘଟିଥିବାବେଳେ ପୂର୍ବରୁ ମୁଖ୍ୟ ଅଭିଯୁକ୍ତ ମାନସ କୁମାର ବେଦାନ୍ତଙ୍କ ସମେତ ୪ଜଣଙ୍କୁ ଗିରଫ କରିଥିଲା ପୋଲିସ। ଅନ୍ୟ ଅଭିଯୁକ୍ତମାନେ ହେଲେ ସୁନିଲ କୁମାର ଜେନା, ସାଗର ଜେନା ଓ ସୁଶୀଲ ସାମନ୍ତରାୟ। ଅଭିଯୁକ୍ତମାନେ ସମସ୍ତେ ସମ୍ପର୍କୀୟ ହୋଇଥିବାବେଳେ ଏବେ ଗିରଫ ହୋଇଥିବା ବିକ୍ରମାଦିତ୍ୟ ହେଉଛନ୍ତି ସୁନିଲଙ୍କ ମାମୁଁ ପୁଅ ବୋଲି କମିଶନର କହିଛନ୍ତି। ଏଥିସହ ପୂରା ଘଟଣା ସମ୍ପର୍କରେ କହିଛନ୍ତି।
କଲେଜ ଶତ୍ରୁତାରୁ ପ୍ରତିଶୋଧ, ୭ବର୍ଷ ପରେ ମିଳିଥିଲା ସୁଯୋଗ
୨୦୦୧ରେ ମୁଖ୍ୟ ଅଭିଯୁକ୍ତ ମାନସ ସଙ୍ଗୀତ ମହାବିଦ୍ୟାଳୟର ଜଣେ ଛାତ୍ର ନେତା ଥିଲେ। ହତ୍ୟାର ଶିକାର ସୁମନ୍ତ ତାଙ୍କର ସିନିୟର ଥିଲେ। କଲେଜର କୌଣସି କଥାକୁ ନେଇ ମାନସ ଓ ସୁମନ୍ତଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ସୁମନ୍ତ ଖାରବେଳନଗର ଥାନାରେ ମାନସଙ୍କ ନାମରେ ଅଭିଯୋଗ କରିଥିଲେ। ମାନସ ଗିରଫ ହୋଇ ଜେଲ୍ ଯାଇଥିଲେ। ଏହାପରେ ମାନସଙ୍କୁ କଲେଜରୁ ବହିଷ୍କାର କରାଯାଇଥିଲା। ଏଥିରେ ମାନସ ପ୍ରତିଶୋଧ ପରାୟଣ ହୋଇଉଠିଥିଲେ। ସୁମନ୍ତଙ୍କୁ ହତ୍ୟା କରି ପ୍ରତିଶୋଧ ନେବାକୁ ୭ବର୍ଷ ଧରି ସୁଯୋଗ ଖୋଜୁଥିଲେ।
କେମିତି ହତ୍ୟା କରିଥିଲେ
ସୁମନ୍ତଙ୍କୁ ହତ୍ୟା କରିବାକୁ ମାନସ ସହଯୋଗୀ ତଥା ସମ୍ପର୍କୀୟ ସାଗର, ସୁନୀଲ, ସୁଶୀଲ ଓ ବିକ୍ରମାଦିତ୍ୟଙ୍କ ସହ ମିଶି ଯୋଜନା ପ୍ରସ୍ତୁତ କରିଥିଲେ। ସେମାନେ ସୁମନ୍ତଙ୍କୁ ଏକ ମ୍ୟୁଜିକ୍ ଷ୍ଟୁଡିଓ ତିଆରି କରିବା ବାବଦ ଆଲୋଚନା କରିବାକୁ ଏକାମ୍ର ଟକିଜ୍ ନିକଟରେ ଥିବା ମାନସଙ୍କ ଘରକୁ ଡାକିଥିଲେ। ସୁମନ୍ତ ପହଞ୍ଚତ୍ବା ପରେ ତାଙ୍କୁ ଏକ କୋଠରୀରେ ବନ୍ଦ କରି ହାତକୁ ରଶିରେ ବାନ୍ଧି ବାଡି ଓ ଭୁଜାଲିରେ ଆକ୍ରମଣ କରିଥିଲେ। ସୁମନ୍ତ ଜୀବନ ବଞ୍ଚାଇବାକୁ ଅଭିଯୁକ୍ତଙ୍କ ପାଦତଳେ ପଡିଯାଇଥିଲେ। ପକେଟ୍ରେ ଥିବା ୨୨ହଜାର ଟଙ୍କା ନେଇ ତାଙ୍କୁ ଛାଡିଦେବାକୁ କାକୁତି ମିନତି ହୋଇଥିଲେ। ହେଲେ ଅଭିଯୁକ୍ତମାନେ କିଛି ଶୁଣି ନ ଥିଲେ। ସୁମନ୍ତଙ୍କୁ ଉଲଗ୍ନ କରିବା ସହ ଭୁଜାଲିରେ ବିଭିନ୍ନ ଅଙ୍ଗକୁ ହାଣି ଅତି ନୃଶଂସ ଭାବେ ହତ୍ୟା କରିଥିଲେ। ପରେ ସୁମନ୍ତ ଆସିଥିବା ମାରୁତି କାର ଡିକିରେ ମୃତଦେହକୁ ଭର୍ତ୍ତି କରି ଚକେଇସିଆଣି ନିକଟ କେନାଲ ବ୍ରିଜ୍ ତଳକୁ ଗଡ଼ାଇ ଦେଇ ଦୁର୍ଘଟଣାର ରୂପ ଦେଇଥିଲେ। ସୁମନ୍ତ ଘରକୁ ନ ଫେରିବାରୁ ତାଙ୍କ ବାପା ମଞ୍ଚେଶ୍ୱର ଥାନାରେ ଅଭିଯୋଗ କରିଥିଲେ। ପୋଲିସ ତଦନ୍ତ କରି ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ ମଧ୍ୟ ବିକ୍ରମାଦିତ୍ୟ ଫେରାର ହୋଇଯାଇଥିଲେ।
ପୁଣେରେ ଜିମ୍ ଟ୍ରେନର, ଆଇଟି କମ୍ପାନୀରେ କାର୍ଯ୍ୟ କରୁଥିଲେ
ବିକ୍ରମାଦିତ୍ୟ ପୋଲିସକୁ ଚକ୍ମା ଦେଇ ରାଜ୍ୟ ବାହାରକୁ ଚାଲିଯାଇଥିଲେ। ପୁଣେରେ ଆତ୍ମଗୋପନ କରିବା ସହ ସେଠାରେ ଜିମ୍ ଟ୍ରେନର ଭାବେ କାର୍ଯ୍ୟ କରୁଥିଲେ। ଏଥିସହିତ ସେ ଜଣେ ଆଇଟି ଛାତ୍ର ହୋଇଥିବାରୁ ସେଠାରେ ଥିବା ଏକ ଆଇଟି କମ୍ପାନୀରେ ମଧ୍ୟ କାର୍ଯ୍ୟ କରୁଥିଲେ। ଭୁବନେଶ୍ୱର ଓ ତାଙ୍କ ପରିବାର ସହ ସମସ୍ତ ସମ୍ପର୍କ କାଟିଦେଇଥିବାରୁ ପୋଲିସ ତାଙ୍କର ସୁରାକ ପାଇପାରି ନ ଥିଲା। କିଛିବର୍ଷ ପରେ ତାଙ୍କ ମା’ ଅସୁସ୍ଥ ହୋଇପଡ଼ିଥିବା ଶୁଣି ଘରକୁ କଲ୍ କରି କଥା ହେଉଥିଲେ।
