କେନ୍ଦ୍ରାପଡ଼ା ଅଫିସ, ୩୦।୧: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରାର୍ଥୀଙ୍କ ପ୍ରଚାର ଆରମ୍ଭ ହୋଇଛି। ପ୍ରତି ଗ୍ରାମରେ ଭୋଜିଭାତ ଚାଲିଛି। ସମର୍ଥିତ ପ୍ରାର୍ଥୀଙ୍କ ସହ ରାଜନେତାମାନେ ପ୍ରଚାର କାର୍ଯ୍ୟରେ ସାମିଲ ହୋଇ ତୃଣମୂଳସ୍ତରର ସ୍ଥିତି ପରଖୁଛନ୍ତି। ଆଞ୍ଚଳିକ ସମସ୍ୟା ସହ ଦଳୀୟ ନିଷ୍ପତ୍ତିରେ ଅସନ୍ତୁଷ୍ଟ ହୋଇ ବିଦ୍ରୋହୀ ପ୍ରାର୍ଥୀ ସମସ୍ୟା ସୃଷ୍ଟି କରୁଛନ୍ତି। ଚଳିତ ନିର୍ବାଚନରେ ପ୍ରାୟ ୩୦ ପ୍ରତିଶତ ବିଜେଡିରେ ଥିବାବେଳେ ଭାଜପାରେ ପ୍ରାୟ ୨୦ ଓ କଂଗ୍ରେସରେ ପ୍ରାୟ ୧୫ ପ୍ରତିଶତ ବିଦ୍ରୋହୀ ପ୍ରାର୍ଥୀ ହୋଇଛନ୍ତି। ପ୍ରାର୍ଥୀଙ୍କ କଳେବର ବୃଦ୍ଧି ପାଇଥିବାରୁ ଚଳିତ ଥର ଲଢ଼େଇ ଜୋର୍ଦାର୍ ହେବ ବୋଲି ଆଲୋଚନା ହେଉଛି।
ଏ ସମ୍ପର୍କରେ ବିଜେଡି ଜିଲା ସଭାପତି ଉତ୍କଳ କେଶରୀ ପରିଡ଼ା କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଚାଲିଥିବା ଶାସନ ବ୍ୟବସ୍ଥାରେ ରାଜ୍ୟର ବହୁ ଉନ୍ନତି ହୋଇଛି । ବିଭିନ୍ନ ଉନ୍ନୟନ ଯୋଜନା ତୃଣମୂଳସ୍ତରରେ ପହଞ୍ଚତ୍ ଥିବାରୁ ଜନମତ ବିଜେଡି ସପକ୍ଷରେ ଅଛି। କରୋନା ସଂକ୍ରମଣ ସମୟରେ ପ୍ରତି ପଞ୍ଚାୟତରେ କୋଭିଡ୍ ସେଣ୍ଟର ନିର୍ମାଣଠାରୁ ଆରମ୍ଭ କରି ଟିକାକରଣ, ବିଭିନ୍ନ ସହାୟତା ରାଶି ପ୍ରଦାନ କରାଯାଇଛି। ମୌଳିକ ସମସ୍ୟାର ସମାଧାନ ସହିତ ୧୫୦୦ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ଉନ୍ନୟନ ଯୋଜନା କାର୍ଯ୍ୟକାରୀ ହେଉଛି । କେନ୍ଦ୍ରାପଡ଼ା ଭଳି ଶିଳ୍ପ ବିହୀନ ଜିଲାରେ ଇସ୍ପାତ୍ ଓ ସିମେଣ୍ଟ ଶିଳ୍ପ ପ୍ରତିଷ୍ଠା, ନଦୀଭିତ୍ତିକ ବନ୍ଦର ନିର୍ମାଣ ପରି ଯୋଜନା କାର୍ଯ୍ୟକାରୀ ପ୍ରକ୍ରିୟା ଜାରି ରହିଛି । ବିଗତ ନିର୍ବାଚନ ପରି ଚଳିତ ଥର ଶତ ପ୍ରତିଶତ ବ୍ଲକ ଓ ଜିଲା ପରିଷଦ ଅଧ୍ୟକ୍ଷ ପଦ ବିଜେଡି ହାତକୁ ଆସିବ ବୋଲି ସେ ପ୍ରକାଶ କରିଛନ୍ତି ।
ଜିଲା କଂଗ୍ରେସ ସଭାପତି ଅଂଶୁମାନ ମହାନ୍ତି କହିଛନ୍ତି, କେନ୍ଦ୍ର ଓ ରାଜ୍ୟ ସରକାରଙ୍କ ଶାସନ ସମୟରେ କେନ୍ଦ୍ରାପଡ଼ା ଜିଲାର ବିକାଶ ଅପେକ୍ଷା ଅଧୋଗତି ଅଧିକ ହୋଇଛି । ଶିକ୍ଷା, ସ୍ବାସ୍ଥ୍ୟ, କୃଷି, ଗମନାଗମନ, ଶିଳ୍ପ, ଯାତ୍ରୀବାହୀ ଟ୍ରେନ ଆଦି ସମସ୍ୟା ଗତ ୨୦ ବର୍ଷ ମଧ୍ୟରେ ପରିବର୍ତ୍ତନ ହୋଇନାହିଁ । ଭିତ୍ତିଭୂମି ଅଭାବରୁ ଜିଲାର ମାନବ ସମ୍ବଳ ଏବେ ଦାଦନ ଶ୍ରମିକ ପାଲଟିଛନ୍ତି । ଅନୁଦାନ ଅର୍ଥକୁ ଶାସକ ଦଳର ନେତା ଓ କର୍ମୀ ଲୁଟ୍ କରିଥିବା ବେଳେ ଜିଲାରେ ଉପାନ୍ତରେ ଥିବା ଆଳି, ରାଜକନିକା, ରାଜନଗର, ମହାକାଳପଡ଼ା ବ୍ଲକ ଅଞ୍ଚଳବାସୀ ବିଭିନ୍ନ ସମସ୍ୟାରେ ଅଛନ୍ତି। ଖରସ୍ରୋତା ପାଣି ବିବାଦଠାରୁ ଆରମ୍ଭ କରି ଗ୍ରାମ୍ୟ ରାସ୍ତା ନିର୍ମାଣ, ପାନୀୟ ଜଳ, ରାଶନ, ଭତ୍ତା ପରି ସମସ୍ୟାକୁ ଦଳୀୟ ସମର୍ଥିତ ପ୍ରାର୍ଥୀ ମୁଖ୍ୟ ପ୍ରସଙ୍ଗ କରିଛନ୍ତି। ସ୍ଥାନୀୟ ଅଞ୍ଚଳର ବିକାଶ ଓ ବ୍ୟକ୍ତିତ୍ୱକୁ ଗୁରୁତ୍ୱ ଦେଇ ପ୍ରାର୍ଥୀ ଚୟନ ହୋଇଥିବାରୁ ନିର୍ବାଚନରେ ଆଶାତୀତ ସୁଫଳ ମିଳିବ ବୋଲି ସେ ପ୍ରକାଶ କରିଛନ୍ତି ।
ଜିଲା ଭାଜପା ସଭାପତି କିଶୋର ଚନ୍ଦ୍ର ପଣ୍ଡା କହିଛନ୍ତି, ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଦଳୀୟ ପ୍ରାର୍ଥୀ ବହୁ ସଂଖ୍ୟାରେ ନିର୍ବାଚିତ ହୋଇଥିଲେ । ଜିଲାର ୩୨ ଜିଲା ପରିଷଦରୁ ୧୦ ଆସନ ଭାଜପାର ଥିବା ବେଳେ ଭୋଟ ସଂଗ୍ରହ କ୍ଷେତ୍ରରେ ଦ୍ୱିତୀୟ ନମ୍ବରରେ ଥିଲା । ଚଳିତ ଥର ପ୍ରାର୍ଥମାନେ ବହୁ ସଂଖ୍ୟାରେ ଜିତି ବିଭିନ୍ନ ବ୍ଲକ ଓ ଜିଲା ପରିଷଦ ଅଧ୍ୟକ୍ଷ ପଦ ଅକ୍ତିଆର କରିବେ । ଦେଶ ଶାସନ ଆରମ୍ଭରୁ କେନ୍ଦ୍ରାପଡ଼ା ଜିଲାର ବିକାଶକୁ ନେଇ ଶାସକ ବିଜେଡି ଓ କଂଗ୍ରେସ ସମ୍ବେଦନଶୀଳ ନୁହନ୍ତି। କୃଷି ଏଠାରେ ମୁଖ୍ୟ ସମସ୍ୟା ହୋଇଥିଲେ ମଧ୍ୟ ଜଳ ପରିଚାଳନା ଯୋଜନା ଦୀର୍ଘ ୭୫ ବର୍ଷ ମଧ୍ୟରେ ହୋଇନାହିଁ । ସେହିପରି ପ୍ରତି ନିର୍ବାଚନ ଆରମ୍ଭ ପୂର୍ବରୁ ଶାସକ ବିଜେଡି ପକ୍ଷରୁ ଶିଳ୍ପ, ବନ୍ଦର, ଥର୍ମାଲ ପ୍ଲାଣ୍ଟ ପ୍ରତିଷ୍ଠାକୁ ନେଇ ପ୍ରତିଶ୍ରୁତିକୁ ତୃଣମୂଳସ୍ତରର ଭୋଟର ବୁଝିଛନ୍ତି । କେନ୍ଦ୍ରୀୟ ଅନୁଦାନକୁ ବାଟମାରଣା କରାଯାଉଥିବା ନେଇ ହୋଇଥିବା ଆନ୍ଦୋଳନ ଯୋଗୁ ଭାଜପା ପ୍ରତି ଭୋଟର ଆକୃଷ୍ଟ ଥିବା ସେ ମତ ଦେଇଛନ୍ତି।