ଅନୁଗୋଳ,୨୮।୪ (ଅମିତ କୁମାର ସାମଲ)ଅନୁଗୋଳ ଦେଇ ଯାଇଥିବା ୫୫ ନମ୍ବର ଜାତୀୟ ରାଜପଥ ଅବସ୍ଥା ଶୋଚନୀୟ ହୋଇପଡ଼ିଛି। ଦୀର୍ଘବର୍ଷ ହେଲା କାର୍ଯ୍ୟ ଚାଲିଥିଲେ ମଧ୍ୟ ଶେଷ ହେଉନାହିଁ। ଅନେକ ସ୍ଥାନରେ ଅଧାପନ୍ତରିଆ ନିର୍ମାଣ ଯୋଗୁ ଦୈନିକ ଦୁର୍ଘଟଣା ଘଟୁଛି। ବିଶେଷକରି ଅନୁଗୋଳ ଜିଲାରେ ଅଧିକ ଜୀବନହାନି ହେଉଛି। ଏପରି କି ଅନୁଗୋଳ ସହର ଓ ଏହାର ଉପକଣ୍ଠରେ କିଛି ଦିନ ମଧ୍ୟରେ ଏକାଧିକ ଦୁର୍ଘଟଣା ଘଟି ଜୀବନହାନି ହୋଇଥିଲେ ମଧ୍ୟ ସେଠାକୁ କୌଣସି ନେତାଙ୍କ ପାଦ ପଡ଼ି ନ ଥିଲା। ଘଣ୍ଟା ଘଣ୍ଟା ଧରି ଲୋକେ ଆନ୍ଦୋଳନ କରିଥିଲେ ବି ସ୍ଥାନୀୟ ଅଞ୍ଚଳର ରାଜନେତାଙ୍କ ଦେଖା ମିଳୁ ନ ଥିଲା। ରାଜପଥ ନିର୍ମାଣ କାହଁିକି ଶେଷ ହେଉନାହିଁ, କେଉଁଠି ଅସୁବିଧା ରହିଛି ତାହାକୁ ନେଇ ରାଜନୈତିକ ଦଳ ଓ ନେତୃବୃନ୍ଦଙ୍କ ପାଟି ଫିଟୁ ନ ଥିଲା। ହେଲେ ଏବେ ନିର୍ବାଚନ ସମୟ ହୋଇଥିବାରୁ ରାଜପଥକୁ ନେଇ ରାଜନୀତି ଆରମ୍ଭ ହୋଇଛି। ମାଳ ମାଳ ନେତା ପଞ୍ଚମହଲାଠାରେ ଶନିବାର ଘଟିଥିବା ଦୁର୍ଘଟଣାସ୍ଥଳକୁ ଯିବା, ମେଡିକାଲରେ ମୃତକଙ୍କ ପରିବାରକୁ ଭେଟିବା କେବଳ ଲୋକ ଦେଖାଣିଆ ବୋଲି ସହରବାସୀ କହିଛନ୍ତି। ଏମିତି ଶସ୍ତା ରାଜନୀତି ନ କରି ସ୍ଥାୟୀ ପ୍ରତିକାର କରାଯିବା ଆବଶ୍ୟକ। ନଚେତ୍ ଏହାର ଉଚିତ୍ ଜବାବ୍ ଚଳିତ ନିର୍ବାଚନରେ ଦିଆଯିବ ବୋଲି ସହରବାସୀ ପ୍ରକାଶ କରିଛନ୍ତି। ସୂଚନାଯୋଗ୍ୟ, କିଛି ଦିନ ତଳେ ତୁରଙ୍ଗରେ ସଡ଼କ ଦୁର୍ଘଟଣାରେ ଜଣଙ୍କ ଜୀବନ ଯାଇଥିଲା। ଦୁର୍ଘଟଣା ପରେ ରାସ୍ତା ଅବରୋଧ ହୋଇଥିଲା। କିନ୍ତୁ କୌଣସି ନେତାଙ୍କ ଦେଖିବାକୁ ମିଳି ନ ଥିଲା। ଏଭଳି କି ବୁଢ଼ୀ ଠାକୁରାଣୀ ଛକରେ ମଧ୍ୟ ଦୁର୍ଘଟଣାରେ ଜଣଙ୍କ ମୃତ୍ୟୁ ହୋଇଥିଲା। ଉତ୍ତ୍ୟକ୍ତ ଲୋକମାନେ ଟ୍ରକ୍ ଜାଳି ଦେଇଥିଲେ। କିନ୍ତୁ ରାଜନେତାଙ୍କ ଦେଖା ନ ଥିଲା। ସେତେବେଳେ ରାଜନେତା କେଉଁଆଡ଼େ ଯାଇଥିଲେ ବୋଲି ଅନୁଗୋଳବାସୀ ପ୍ରଶ୍ନ କରିଛନ୍ତି।