ଭୁବନେଶ୍ୱର,୨୧ା୩(ବ୍ୟୁରୋ):ସୋମବାର ଥିଲା ପଖାଳ ଦିବସ। ରାଜ୍ୟର ବିଭିନ୍ନ ସ୍ଥାନରେ ପଖାଳପ୍ରିୟ ଲୋକମାନେ ଏହାକୁ ଭିନ୍ନ ଭିନ୍ନ ଢଙ୍ଗରେ ପାଳନ କରିଛନ୍ତି। ପଖାଳର ସୁସ୍ବାଦରେ କେବଳ ସାଧାରଣ ଲୋକ ନୁହନ୍ତି ରାଜନେତା, ବିଧାୟକ, ମନ୍ତ୍ରୀ, ଖବରଦାତା, ବ୍ୟବସାୟୀ ମଧ୍ୟ ମସ୍ଗୁଲ। ଭଳିକି ଭଳି ଓଡ଼ିଆ ଘରର ବ୍ୟଞ୍ଜନ ସମାହାରରେ ପଖାଳ ଅଧିକ ମନୋଲୋଭା ହୋଇଥିଲା। କଂଗ୍ରେସର ବରିଷ୍ଠ ସଦସ୍ୟ ତଥା ମୁଖପାତ୍ର ମନୋରଞ୍ଜନ ଦାଶଙ୍କ ଦ୍ୱାରା ଶହୀଦନଗର ଦୁର୍ଗାପୂଜା ମଣ୍ଡପରେ ଆୟୋଜିତ ପଖାଳ ଦିବସ ପାଳନ ଥିଲା ଟିକେ ନିଆରା। ଏଠାରେ ବିଭିନ୍ନ ଦଳର କର୍ପୋରେଟର୍, ମେୟର, ରାଜନେତା, ପୂର୍ବତନ ମନ୍ତ୍ରୀ, ବିଧାୟକ, ମନ୍ତ୍ରୀ, ଯୋଗଦେଇଥିଲେ। ସୋମବାର ଥିବାରୁ ପଖାଳ କଂସାରେ ଥିଲା ନିରାମିଷର ପରଷା। ସାଗଭଜା, ବଡ଼ିଚୂରା, ଆଳୁଭର୍ତ୍ତା, ବାଇଗଣ ଭର୍ତ୍ତା, ସଜନା ଛୁଇଁ ଭଜା, ଲାଉମଞ୍ଜି ବଡ଼ି, କଖାରୁପତ୍ର ଭଜା ସହିତ ଆହୁରି କେତେ ବ୍ୟଞ୍ଜନ ସାଙ୍ଗକୁ ଦହି ପଖାଳର ମଜା ନେଇଥିଲେ। ଦଳକୁ ଭୁଲି ବିଜେଡି, କଂଗ୍ରେସ, ଭାଜପାର ନେତାମାନେ ଏକାଠି ହୋଇଥିଲେ। ପଖାଳ କଂସା ପାଖରେ ବସି ଖୋଲାଖୋଲି କଥା ହେଉଥିବା ଦେଖିବାକୁ ମିଳିଥିଲା। କେହି କେହି କହୁଥିଲେ ଏଠାରେ ରାଜନୀତି ନାହିଁ, ଆମେ ସବୁ ପଖାଳଖିଆ ଓଡ଼ିଆ। ଯିଏ ପଖାଳ ଚାଖିନି ସେ ଓଡ଼ିଆ ନୁହେଁ। ମନୁଭାଇଙ୍କ ପଖାଳ ସମାବେଶକୁ ମାନିବାକୁ ହେବ। ଏଭଳି ହାଲୁକାଫୁଲ୍କା କଥାରେ ବିଭିନ୍ନ ବର୍ଗର ଲୋକମାନେ ପଖାଳର ମଜା ନେଇଥିଲେ। ଆୟୋଜକଙ୍କୁ ପ୍ରଶଂସା କରିବାକୁ କେହି ଭୁଲି ନ ଥିଲେ। ମଧ୍ୟାହ୍ନ ୧୨ଟାରୁ ପଖାଳ ଦିବସ ଆରମ୍ଭ ହୋଇ ଅପରାହ୍ନ ୪ଟା ଯାଏ ଚାଲିଥିଲା।
