ଓ୍ବାଶିଂଟନ୍,୧୬ା୧୧: ଆମ ପାଇଁ ଫୁଲରୁ ମହୁ ସଂଗ୍ରହ କରି ଫେଣାରେ ସଂରକ୍ଷିତ ରଖୁଥିବା ମହୁମାଛିର ଆୟୁଷ ଅଧା କମିଯାଇଛି। ପୂର୍ବରୁ ମହୁମାଛି ୩୪ ଦିନ ବଞ୍ଚୁଥିବାବେଳେ ଏବେ ୧୮ ଦିନ ଜୀବିତ ରହୁଥିବା ଏକ ଅଧ୍ୟୟନରୁ ଜଣାପଡ଼ିଛି।
ଗଛରେ ଫୁଲ ଫୁଟିବା ଓ ଫଳ ଫଳିବା ପ୍ରକ୍ରିୟା ପଲିନେଶନ୍ ଦ୍ୱାରା ସମ୍ଭବ ହୋଇଥାଏ। ଏହି ପଲିନେଶନ୍ (ଅଣ୍ଡିରା ଫୁଲର ପରାଗରେଣୁକୁ ମାଈ ଫୁଲକୁ ସ୍ଥାନାନ୍ତର କରିବା) ଭଳି ଏହି ଗୁରୁତ୍ୱପୂର୍ଣ୍ଣ ପ୍ରକ୍ରିୟା ପାଇଁ ମହୁମାଛି ଏକ ମାତ୍ର ମାଧ୍ୟମ। ମହୁମାଛିଙ୍କ
ସହଯୋଗ ବିନା ଗଛରେ ଫୁଲ କିମ୍ବା ଫଳ ଫଳିବା ପ୍ରାୟ ଅସମ୍ଭବ ବୋଲି ‘ସାଇନ୍ସ ଆଲର୍ଟ ମାଗାଜିନ୍’ରେ ରିପୋର୍ଟ ପ୍ରକାଶ ପାଇଛି। ପ୍ରକାଶିତ ରିପୋର୍ଟରେ ବୈଜ୍ଞାନିକମାନେ ଉଲ୍ଲେଖ କରିଛନ୍ତି, ଖାଦ୍ୟ ଉତ୍ପାଦନର ମୁଖ୍ୟ ମାଧ୍ୟମ ପାଲଟିଥିବା ମହୁମାଛିଙ୍କ ଆୟୁଷ କ୍ରମାଗତ କମିବାରେ ଲାଗିଛି। ବୈଜ୍ଞାନିକଙ୍କ ମତରେ ସେମାନଙ୍କ ଆୟୁ ୫୦% ହ୍ରାସ ପାଇଛି। ଅର୍ଥାତ୍ ପୂର୍ବରୁ ଗୋଟିଏ ମହୁମାଛି ହାରାହାରି ୩୪ ଦିନ ବଞ୍ଚୁଥିବାବେଳେ ଏବେ ମାତ୍ର ୧୮ ଦିନ ଜୀବିତ ରହୁଛି।
ମହୁମାଛିଙ୍କ ୧୦ ପ୍ରଜାତି ଭିତରୁ ଗୋଟିଏ ପ୍ରଜାତି ସମ୍ପୂର୍ଣ୍ଣ ଭାବେ ପରିବେଶରୁ ଉଭାନ ହୋଇଯିବା ପରେ ୟୁରୋପୀୟ ଦେଶଗୁଡ଼ିକ ମହୁମାଛିଙ୍କୁ ‘ରେଡ୍ ଲିଷ୍ଟ’ (ବିପଜ୍ଜନକ ତାଲିକା)ରେ ଅନ୍ତର୍ଭୁକ୍ତ କରିଛନ୍ତି। ମହୁମାଛିଙ୍କ ଜୀବନ ପ୍ରତି ବିପଦ ସୃଷ୍ଟି ଲାଗି ଜଳବାୟୁ ପରିବର୍ତ୍ତନକୁ ମୁଖ୍ୟତଃ ଦାୟୀ କରାଯାଉଛି। ଆମେରିକାରେ ୨୦୧୮ ଅକ୍ଟୋବରରୁ ୨୦୧୯ ଏପ୍ରିଲ ମଧ୍ୟରେ ୪୦% ମହୁମାଛିଙ୍କ ମୃତ୍ୟୁ ଘଟିଥିଲା। କାନାଡା, ଅଷ୍ଟ୍ରେଲିଆ, ବେଲଜିୟମ୍, ପର୍ତ୍ତୁଗାଲ, ସ୍ପେନ୍, ସୁଇଜରଲାଣ୍ଡ, ଜର୍ମାନୀ, ଫିନ୍ଲାଣ୍ଡ ଓ ପୋଲାଣ୍ଡରେ ମହୁମାଛି ବଂଶ ନିପାତ ହେବାରେ ଲାଗିଛି। ୨୦୧୨-୨୦୧୩ର ପ୍ରବଳ ଶୀତରେ ବ୍ରିଟେନ୍ରେ ୨୯% ମହୁମାଛିଙ୍କ ମୃତ୍ୟୁ ଘଟିଛି।