ଭୁବନେଶ୍ୱର,୨୭ା୮(ବ୍ୟୁରୋ) : ରାଜଧାନୀରେ ଆତ୍ମହତ୍ୟା ଘଟଣା ଥମିବାରେ ନାଁ ଧରୁନି। ଗୋଟିଏ ଆତ୍ମହତ୍ୟାର କାରଣ ଖୋଜୁ ଖୋଜୁ ଆଉ ଗୋଟିଏ ଘଟଣା ପୋଲିସର ଚିନ୍ତା ବଢ଼ାଉଛି। ଗୁରୁବାର ଜଣେ ମହିଳା ଓ ଜଣେ ଯୁବତୀ ଫ୍ୟାନରେ ଝୁଲି ଆତ୍ମହତ୍ୟା କରିଥିବାବେଳେ ଶୁକ୍ରବାର ବଡଗଡ ଥାନା ତାରିଣୀ ବସ୍ତିରେ ଜଣେ ନାବାଳିକା ଛାତ୍ରୀ ଆତ୍ମହତ୍ୟା କରିଛନ୍ତି। ସେ ହେଲେ କେ. ଇନ୍ଦିରା ରାଓ (୧୭)। ଖବର ପାଇ ବଡଗଡ ଥାନା ପୋଲିସ ଛାତ୍ରୀଙ୍କ ମୃତଦେହକୁ ଜବତ କରିବା ସହ ଅପମୃତ୍ୟୁ ମାମଲା (ନଂ ୨୫/୨୨) ରୁଜୁ କରି ଘଟଣାର ତଦନ୍ତ ଚଳାଇଛି। ପାଠପଢ଼ିବାର ସ୍ବପ୍ନ ଓ ଆର୍ଥିକ ଅନଟନକୁ ନେଇ ପରିବାରରେ ଝଗଡ଼ାକୁ ନେଇ ନାବାଳିକା ଜଣକ ଏଭଳି ଚରମ ନିଷ୍ପତ୍ତି ନେଇଥାଇପାରନ୍ତି ବୋଲି ସନ୍ଦେହ କରାଯାଉଛି।
ସୂଚନାନୁସାରେ, ତାରିଣୀ ବସ୍ତିରେ ଲୋକନାଥ ରାଓ ସ୍ତ୍ରୀ ଓ ପିଲାଙ୍କ ସହ ରୁହନ୍ତି। ସେ ଶ୍ରମିକ ଭାବେ କାମ କରି ଯାହା ରୋଜଗାର କରନ୍ତି ସେଥିରେ ପରିବାର ଚଳିବା ସହ ପିଲାମାନେ ପାଠପଢ଼ନ୍ତି। ଲୋକନାଥଙ୍କ ଝିଅ କେ. ଇନ୍ଦିରା ଦଶମ ଶ୍ରେଣୀ ପାସ କରି +୨ରେ ନାମ ଲେଖାଇବାକୁ ଯୋଜନା କରିଥିଲେ। ହେଲେ ଆର୍ଥିକ ଅବସ୍ଥା ଭଲ ନ ଥିବାରୁ ପରିବାର ମଧ୍ୟରେ ଗତ କିଛିଦିନ ହେବ ଝଗଡା ଲାଗି ରହିଥିଲା। ଏହାକୁ ନେଇ ଛାତ୍ରୀ ଜଣଙ୍କ ଚିନ୍ତିତ ରହୁଥିଲେ। ଗୁରୁବାର ପରିବାର ଲୋକେ ଘରେ ନ ଥିବା ସମୟରେ ଛାତ୍ରୀ ଜଣକ ରାତି ୮ଟା ୩୦ରେ ଫ୍ୟାନରେ ଝୁଲି ପଡିଥିଲେ। ଲୋକନାଥ ଘରକୁ ଫେରିବା ପରେ ଝିଅ ଇନ୍ଦିରା ଫ୍ୟାନରେ ଝୁଲି ପଡିଥିବା ଦେଖିବାକୁ ପାଇଥିଲେ। ସଙ୍ଗେ ସଙ୍ଗେ ପରିବାର ଲୋକେ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ବ୍ୟବଚ୍ଛେଦ ପରେ ପୋଲିସ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିଥିଲେ ।
