ଗଞ୍ଜାମ,୧୦ା୬(ଡି.ଏନ୍.ଏ.): ହାତରୁ ମେହେନ୍ଦୀ ଓ ପାଦରୁ ଅଳତା ଲିଭିନି ହେଲେ ଜଳିଲା ଜୁଇ l ଏମିତି ଏକ ହୃଦୟ ବିଦାରକ ଘଟଣା ଗଞ୍ଜାମ ଜିଲା ରମ୍ଭା ସହରରେ ଘଟିଥିବା ଦେଖିବାକୁ ମିଳିଛି। ବିବାହକୁ ମାସେ ପୂରିନି ଏକ ନବବଧୂକୁ ଯୌତୁକ ଜନିତ ହତ୍ୟା କରାଯାଇଥିବା ନେଇ ଖୋଦ୍ ନବବଧୂଙ୍କ ମା’ ରମ୍ଭା ଥାନାରେ ଅଭିଯୋଗ କରିଛନ୍ତି।
ଖବର ନେବାରେ ଜଣାପଡ଼ିଛି, କୋଦଳା ଥାନା ଅଧିନସ୍ଥ ସଂକୁ ଗ୍ରାମର ଯୋଗେନ୍ଦ୍ର ସାହୁଙ୍କ ଝିଅ ଶ୍ରଦ୍ଧାଞ୍ଜଳି ସାହୁ ମେ’ ୧୯ର ହିନ୍ଦୁ ରୀତିନୀତି ଅନୁଯାୟୀ ରମ୍ଭା ସହର ବଡ଼ ଉପୁଲିଆ ସାହିର ଭୀମ ନାହାକଙ୍କ ପୁଅ ରମେଶଙ୍କୁ ବିବାହ କରିଥିଲେ। ହେଲେ ମଙ୍ଗଳବାର ରାତିରେ ଶ୍ରଦ୍ଧାଞ୍ଜଳି ଆତ୍ମହତ୍ୟା କରିଥିବା ପୁଅଘର ପକ୍ଷରୁ ଶ୍ରଦ୍ଧାଞ୍ଜଳିଙ୍କ ପରିବାରକୁ ଖବର ଦିଆଯାଇଥିଲା। ଏ ନେଇ ଶ୍ରଦ୍ଧାଞ୍ଜଳିଙ୍କ ମା’ ସୁଜ୍ଞାନୀ ସାହୁ ରମ୍ଭା ଥାନାରେ ତାଙ୍କ ଝିଅକୁ ଯୌତୁକ ଜନିତ ହତ୍ୟା କରାଯାଇଥିବା ନେଇ ଅଭିଯୋଗ କରିଥିବା ଜଣାପଡ଼ିଛି। ଅଭିଯୋଗକୁ ଭିତ୍ତି କରି ପୋଲିସ ପକ୍ଷରୁ ୨୭୩/୨୧ରେ ଏକ ମାମଲା ରୁଜୁ କରାଯାଇ ତଦନ୍ତ କରାଯାଉଛି। ଅଭିଯୁକ୍ତଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି। ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତ ରହସ୍ୟ ଜଣାପଡ଼ିବ ବୋଲି ରମ୍ଭା ଥାନାଧିକାରୀ ଦିପ୍ତୀ ରଞ୍ଜନ ବେହେରା କହିଛନ୍ତି।
