କାଳିଆପାଣି,୨୯ା୧(ଡି.ଏନ୍.ଏ.): ଯାଜପୁର ଜିଲା କାଳିଆପାଣି ଥାନା ଅନ୍ତର୍ଗତ ଦୈତାରୀ ସଂରକ୍ଷିତ ଜଙ୍ଗଲ ନାତୋର ଗାଁ ନିକଟରେ ଥିବା ମହୁଲି ମଦଭାଟିକୁ ଶନିବାର କାଳିଆପାଣି ପୋଲିସ ଭାଙ୍ଗିଥିବା ବେଳେ ବହୁ ହାଣ୍ଡି ମହୁଲ ପୋଚ ନଷ୍ଟ ହୋଇଯାଇଥିବା ଜଣାପଡ଼ିଛି ।
ସୂଚନାନୁଯାୟୀ, କାଳିଆପାଣି ନିକଟରେ ଦୀର୍ଘଦିନ ହେବ ଚିଙ୍ଗୁଡିପାଳ ପଞ୍ଚାୟତର ନାତୋର ଓ ଡ୍ୟାମ୍ ନିକଟ ଜଙ୍ଗଲରେ ମଦ ମାଫିଆମାନେ ମହୁଲି ମଦ ରାନ୍ଧୁଥିବା ଅଭିଯୋଗ ହୋଇ ଆସୁଥିଲା। ତେବେ ପୋଲିସର ନିଷ୍କ୍ରିୟତା ଯୋଗୁ ମାଫିଆମାନେ ବେଧଡ଼କ ଭାବେ ମଦ ରାନ୍ଧୁଥିଲେ। ବାରମ୍ବାର ଅଭିଯୋଗ ପରେ ଶନିବାର କାଳିଆପାଣି ପୋଲିସ ପକ୍ଷରୁ ଏସ୍ଆଇ ସୁଦାମ ନନ୍ଦି ଓ ଏଏସ୍ଆଇ ତ୍ରିଲୋଚନ ସାହୁଙ୍କ ନେତୃତ୍ୱରେ ଏକ ଟିମ୍ ସଂପୃକ୍ତ ସ୍ଥାନରେ ଚଢାଉ କରିଥିଲା। ତେବେ ପୋଲିସର ଚଢ଼ାଉ ଖବର ପାଇ ମଦ ମାଫିଆମାନେ ଜଙ୍ଗଲ ଭିତରକୁ ଦୌଡ଼ି ପଳାଇଥିଲେ। ମଦ ମାଫିଆମାନଙ୍କୁ ପୋଲିସ କାବୁ କରିବାରେ ସକ୍ଷମ ହୋଇ ନ ଥିବା ବେଳେ ସେଠାରେ ରନ୍ଧା ହେଉଥିବା ମହୁଲ ପୋଚକୁ ନଷ୍ଟ କରିଥିଲା। ଏନେଇ କାଳିଆପାଣି ପୋଲିସ କୌଣସି କେସ୍ ରୁଜୁ କରି ନ ଥିବା ଏସ୍ଆଇ ପ୍ରକାଶ କରିଛନ୍ତି।