କେନ୍ଦୁଝର, ୨୨।୯(ସ୍ବ.ପ୍ର.): କେନ୍ଦୁଝର ଜିଲାର ପୁରାତନ ଜନଜାତି ହେଉଛନ୍ତି ଜୁଆଙ୍ଗ। ଜୁଆଙ୍ଗଙ୍କ ବିକାଶ ପାଇଁ ସରକାର ବିଭିନ୍ନ ଯୋଜନା ପ୍ରସ୍ତୁତ କରିଛନ୍ତି। ସେମାନଙ୍କ ସର୍ବାଙ୍ଗୀନ ବିକାଶ ପାଇଁ ୧୯୭୮ ମସିହାରେ ଗଠନ ହୋଇଛି ଜୁଆଙ୍ଗ ଉନ୍ନୟନ ସଂସ୍ଥା (ଜେଡିଏ)। ଏହା ମାଧ୍ୟମରେ କୋଟି କୋଟି ଟଙ୍କା ଖର୍ଚ୍ଚ ହୋଇଆସୁଛି। ବାଂଶପାଳ, ତେଲକୋଇ, ଘଟଗାଁ, ହରିଚନ୍ଦନପୁର ଆଦି ବ୍ଲକର ବଣପାହାଡ ଅଞ୍ଚଳରେ ରହୁଛନ୍ତି ଏହି ଜୁଆଙ୍ଗ ଜନଜାତି । କିନ୍ତୁ ଏହି ଜୁଆଙ୍ଗ ଉନ୍ନୟନ ସଂସ୍ଥା ପୂର୍ବରୁ ବାଂଶପାଳ ବ୍ଲକର ୩୫ଟି ଜୁଆଙ୍ଗ ଅଧ୍ୟୁଷିତ ଗ୍ରାମରେ କାମ କରିଆସୁଥିବା ବେଳେ ଏବେ ତେଲକୋଇ, ହରିଚନ୍ଦନପୁର, ଘଟଗାଁ ବ୍ଲକର ଜୁଆଙ୍ଗ ଗ୍ରାମକୁ ସାମିଲ କରାଯାଇଛି।
୨୦୧୮ ଜନଗଣନା ଅନୁଯାୟୀ ଏହି ସଂସ୍ଥା ଅଧୀନରେ ଉକ୍ତ ବ୍ଲକର ୫୪ଟି ଗ୍ରାମର ୫୦୭୮ ଜୁଆଙ୍ଗ ପରିବାର ବସବାସ କରୁଛନ୍ତି । ନିକଟରେ କୋଭିଡ ସହାୟତା ବାବଦକୁ ଏହି ପରିବାରର ଲୋକ ମାନେ ସହାୟତା ରାଶି ପାଇଥିଲେ ହେଁ ଆହୁରି ବହୁ ଗ୍ରାମର ଜୁଆଙ୍ଗ ମାନଙ୍କୁ ତାଲିକାଭୁକ୍ତ କରାଯାଇ ନ ଥିବାରୁ ସହାୟତା ରାଶି ପାଇବାରୁ ବଞ୍ଚିତ ରହିଥିବାରୁ ସେମାନେ ଜିଲାପାଳଙ୍କ ଠାରେ ଦାବିପତ୍ର ଦେଇଥିଲେ। ଦୀର୍ଘ ବର୍ଷ ଧରି ଜୁଆଙ୍ଗ ଉନ୍ନୟନ ସଂସ୍ଥା କାର୍ଯ୍ୟ କରୁଥିବା ଅଞ୍ଚଳର ଅବସ୍ଥା ଦେଖିଲେ ସେଭଳି ବିକାଶ ହୋଇଥିବା ଦେଖିବାକୁ ମିଳୁନାହିଁ। ଅନେକ ଜୁଆଙ୍ଗ ପରିବାର ଘର ପାଉନଥିବାରୁ ଭଙ୍ଗାଦଦରା ଘରେ ପଲା ମାରି ବହୁ କଷ୍ଟରେ ବର୍ଷା ଓ ଶୀତକାକରରେ ରହୁଛନ୍ତି।
ସେହିପରି ଜୁଆଙ୍ଗ ଅଞ୍ଚଳର ରାସ୍ତାଘାଟ, ଲୋକଙ୍କ ପାନୀୟ ସମସ୍ୟା, ଶିକ୍ଷା ବ୍ୟବସ୍ଥା ଅଦ୍ୟାବଧି ସମାଧାନ ହୋଇ ପାରୁନାହିଁ। ଏହା ଛଡା ସଚେତନତାର ଅଭାବ ଯୋଗୁ ଏବଂ ଏମ୍ଜିଏନ୍ଆର୍ଇଜିଏସ୍ ଯୋଜନାରେ କାମ ମିଳୁ ନ ଥିବାରୁ ପାରମ୍ପାରିକ ପୋଡୁ ଚାଷ ଉପରେ ଏବେ ମଧ୍ୟ ନିର୍ଭର କରୁଛନ୍ତି ା ଫଳରେ ଜଙ୍ଗଲ ଓ ପରିବେଶ ବହୁ ମାତ୍ରାରେ କ୍ଷତିଗ୍ରସ୍ତ ହେଉଛି। ଜୀବିକା ପ୍ରକଳ୍ପରେ ସେମାନଙ୍କୁ ସହାୟତା ମିଳୁଛି। କିନ୍ତୁ ଉପଯୁକ୍ତ ତଦାରଖର ଅଭାବ ଯୋଗୁ ଅନେକ ଏହାର ସୁଫଳ ପାଇପାରୁନାହାନ୍ତି। କେବଳ ଜେଡିଏ ନୁହେଁ ଉକ୍ତ ଅଞ୍ଚଳରେ ଆଇଟିଡିଏ, ବ୍ଲକ ଭଳି ସଂସ୍ଥା ମାନେ ମଧ୍ୟ ଉନ୍ନୟନମୂଳକ କାମ କରୁଥିଲେ ହେଁ ସେସବୁ ଅଞ୍ଚଳର ଚିତ୍ର ବଦଳୁ ନ ଥିବାରୁ ସାମାଜିକ କର୍ମୀ, ଜୁଆଙ୍ଗ ସର୍ଦ୍ଦାର ମାନେ ଉଦ୍ବେଗ ପ୍ରକାଶ କରୁଛନ୍ତି। ଏସମ୍ପର୍କରେ ଜେଡିଏର ପ୍ରକଳ୍ପ ପରିଚାଳକ ବନଜ ନାୟକ କହିଛନ୍ତି, ଜେଡିଏ ଆବାସ ଯୋଜନାରେ ଘର କରୁନାହିଁ। ବ୍ଲକ ମାଧ୍ୟମରେ ଆବାସ ଯୋଜନା କାର୍ଯ୍ୟକାରୀ ହେଉଛି। ସେହିପରି ରାସ୍ତାକାମ ମଧ୍ୟ ବ୍ଲକ କରିବ। ଜେଡିଏ ଜୀବିକା ପ୍ରକଳ୍ପ, କୃଷି, ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟ, ପାନୀୟଜଳ ବ୍ୟବସ୍ଥା କରୁଛି।