ବଇଣ୍ଡା,୯ା୭(ଡି.ଏନ.ଏ.) ଅନୁଗୋଳ ଜିଲା କିଶୋରନଗର ବ୍ଲକ ନାକିଚି ପଞ୍ଚାୟତ ଛେଳିଆଢିପଠାରେ ଥିବା ୩୩ କେଭି ବିଦ୍ୟୁତ୍ ସବ୍ଷ୍ଟେଶନ ଉଦ୍ଘାଟନର ୨ ବର୍ଷ ପରେ ବି କାର୍ଯ୍ୟକ୍ଷମ ହୋଇପାରି ନାହିଁ। ଦୀର୍ଘଦିନ ହେଲା ତାଲା ଝୁଲାଇ ଦିଆଯାଇଥିବାରୁ ଏହାକୁ ନେଇ ସ୍ଥାନୀୟ ବିଦ୍ୟୁତ୍ ଉପଭୋକ୍ତାମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ନାକିଚି, ଠେଲକନାଳୀ, କଟରଙ୍ଗା, ଅଙ୍ଗପଡ଼ା, ଉରୁକୁଳା, ଧଡ଼ରପାଳ, ହିମିତିରା ପଞ୍ଚାୟତର ଉପଭୋକ୍ତାଙ୍କୁ ୨୪ ଘଣ୍ଟିଆ ବିଦ୍ୟୁତ୍ ସେବା ଯୋଗାଇ ଦେବା ଲକ୍ଷ୍ୟରେ ରାଜ୍ୟ ସରକାରଙ୍କ ପକ୍ଷରୁ ଏହି ସବ୍ଷ୍ଟେଶନ ନିର୍ମାଣ କରାଯାଇଥିଲା। ୨୦୧୮ ଏପ୍ରିଲ ୧୮ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଉଦ୍ଘାଟନ କରିଥିଲେ। କିନ୍ତୁ ଏଯାଏ ଏହି ସବ୍ଷ୍ଟେଶନ କାର୍ଯ୍ୟକ୍ଷମ ହୋଇ ନ ଥିବାରୁ ପୂର୍ବପରି ବାମୁର ସବ୍ଷ୍ଟେଶନରୁ ସଂଯୋଗ ଦିଆଯାଉଛି। ଫଳରେ ଦୈନିକ ଘଣ୍ଟା ଘଣ୍ଟା ଧରି ବିଦ୍ୟୁତ୍ ବିଭ୍ରାଟ ଦେଖାଦେଉଛି। ରକ୍ଷଣାବେକ୍ଷଣ ପାଇଁ ନିଯୁକ୍ତ ବଇଣ୍ଡା ସବ୍ଷ୍ଟେଶନର ଲାଇନମ୍ୟାନ ପ୍ରହଲ୍ଲାଦ ମହାପାତ୍ର ୨୦୧୯ ଜୁଲାଇ ୨୩ରେ କାର୍ଯ୍ୟାଳୟରେ ପଡ଼ି ପ୍ରାଣ ହରାଇଥିଲେ। ସେବେଠାରୁ ଏଠାରେ ଆଉ କାହାକୁ ନିଯୁକ୍ତି ଦିଆଯାଇ ନ ଥିବାରୁ ଫାଟକରେ ତାଲା ଝୁଲୁଛି। ଏଥିପ୍ରତି ଜିଲାପାଳ, ରାଜ୍ୟ ଶକ୍ତି ବିଭାଗ ଦୃଷ୍ଟି ନ ଦେଲେ ଆନ୍ଦୋଳନ କରାଯିବ ବୋଲି ଉପଭୋକ୍ତାମାନେ ପ୍ରକାଶ କରିଛନ୍ତି। ବଇଣ୍ଡା ବିଦ୍ୟୁତ୍ ବିଭାଗ ଏସ୍ଡିଓ ସୀପକ ଦାସ କହିଛନ୍ତି, ନାକିଚି ସବ୍ଷ୍ଟେଶନରେ କୌଣସି କର୍ମଚାରୀ ନିଯୁକ୍ତି ହୋଇନାହାନ୍ତି। ଏହାକୁ ଖୁବ୍ଶୀଘ୍ର କାର୍ଯ୍ୟକାରୀ କରାଯିବାର ବ୍ୟବସ୍ଥା ହେବ।
