ଏକାକୀ ରହିବା ଯେକୌଣସି ମଣିଷ ପାଇଁ ସବୁଠାରୁ କଷ୍ଟକର କାର୍ଯ୍ୟ, ହେଲେ ସାଇବେରିଆର ଏକ ଜଙ୍ଗଲରେ ରୁହନ୍ତି ଦୁନିଆର ଏକମାତ୍ର ଏକାକି ମହିଳା। ତାଙ୍କର କୌଣସି ସମ୍ପର୍କୀୟ କିମ୍ବା ପରିବାର ନାହିଁ। ୭୬ ବର୍ଷ ବୟସ୍କା ଏହି ମହିଳା ଜନ୍ମରୁ ଏହି ଜଙ୍ଗଲରେ ଏକୁଟିଆ ରହିଆସୁଛନ୍ତି। ସେ ହେଲେ ଆଗାଫ୍ୟା। ଜଣେ କୋଟିପତି ବ୍ୟବସାୟୀ ମହିଳାଙ୍କ ବିଷୟରେ ଜାଣି ତାଙ୍କୁ ସାହାଯ୍ୟ କରିଛନ୍ତି।ଏବେ ସାଇବେରିଆରେ ତାଙ୍କ ନୂତନ ଘର ର୍ନିମାଣ କରାଯାଉଛି। ଏହି ଘର ସହରାଞ୍ଚଳଠାରୁ ଶହ ଶହ ମାଇଲ ଦୂରରେ ଅବସ୍ଥିତ।
୧୯୩୬ ମସିହାରେ ଷ୍ଟାଲିନଙ୍କ ଶାସନ କାଳରେ ଧାର୍ମିକ ନିର୍ଯାତନାକୁ ଏଡାଇବା ପାଇଁ ଆଗାଫ୍ୟାଙ୍କ ପରିବାର ଜଙ୍ଗଲକୁ ପଳାଇଥିଲେ। ସେହି ସମୟରେ ଆଗାଫ୍ୟା ଜଙ୍ଗଲରେ ଜନ୍ମଗ୍ରହଣ କରିଥିଲେ। ଏତେ ଦିନ ଧରି ଏକୁଟିଆ ରହିଥିବା ଆଗାଫ୍ୟା ବର୍ତ୍ତମାନ ନୂଆ ଘରକୁ ଯିବାକୁ ପ୍ରସ୍ତୁତ ହେଉଛନ୍ତି। ସେ ଆଉ ଏକୁଟିଆ ରହିବାକୁ ଚାହୁଁ ନ ଥିବା କହିଛନ୍ତି।
ଆଗାଫ୍ୟା ଜୀବନର ଅଧିକାଂଶ ସମୟ ଉକ୍ତ ଜଙ୍ଗଲରେ କୃଷକ ଭାବରେ ଅତିବାହିତ କରିଛନ୍ତି। ନିଜ ଖାଦ୍ୟ ପାଇଁ ମଧ୍ୟ ନିଜେ ଚାଷ କରୁଛନ୍ତି। କିନ୍ତୁ ବର୍ତ୍ତମାନ ବାର୍ଦ୍ଧକ୍ୟ ଯୋଗୁ ସ୍ବାସ୍ଥ୍ୟଗତ ସମସ୍ୟା କାରଣରୁ ଜଙ୍ଗଲରେ ରହିବା ତାଙ୍କ ପାଇଁ ନିରାପଦ ନୁହେଁ। ରୁଷିଆର ଆଲୁମିନିୟମ ବ୍ୟବସାୟ ଜଡ଼ିତ ବ୍ୟବସାୟୀ ଓଲେଗ୍ ଡେରିପାସ୍କା ତାଙ୍କ ବିଷୟରେ ଜାଣିବା ପରେ ସହଯୋଗର ହାତ ବଢ଼ାଇଛନ୍ତି। ମହିଳାଜଣଙ୍କ ସହରରେ ନିର୍ମିତ ଘରେ ରହିବାକୁ ମନା କରିଦେଇଥିବାରୁ ଶହେରୁ ଅଧିକ କିଲୋମିଟର ଦୂରରେ ତାଙ୍କ ପାଇଁ ଘର ନିର୍ମାଣ କରାଯାଉଛି। ଏଥିପାଇଁ ବ୍ୟବସାୟୀଜଣଙ୍କ ସମ୍ପୂର୍ଣ୍ଣ ଖର୍ଚ୍ଚ ବହନ କରୁଛନ୍ତି।