ବନ୍ତ,୧୧।୭(ସ୍ବ.ପ୍ର.)-ଏକଦା ମହାପ୍ରଭୁ ଶ୍ରୀଜଗନ୍ନାଥଙ୍କୁ ରଥରେ ଦର୍ଶନ ବେଳେ ‘ମୋତେ ଦୟା କରନ୍ତନ୍ତି, ମୁଁ ବି ତୁମ ମୂର୍ତ୍ତି ଗଢ଼ନ୍ତି’ ବୋଲି ଗୁହାରି ଜଣାଇଥିଲେ। ଭାବର ଠାକୁର ସେଦିନ ଭକ୍ତର ଭାବ ବୁଝିଲେ। ତାଙ୍କ ଆଶୀର୍ବାଦରୁ ଦାରୁ ଦିଅଁଙ୍କ ମୂର୍ତ୍ତି ଗଢ଼ିବାର ସୌଭାଗ୍ୟ ମିଳିଛି। ଏ ହେଉଛି ଭଦ୍ରକ ଜିଲା ବନ୍ତ ବ୍ଲକ ଆଗରପଡ଼ା ନିକଟସ୍ଥ ବିଟିପୁର ଗ୍ରାମର ଯୁବ ଚିତ୍ରଶିଳ୍ପୀ ପଦ୍ମନାଭ ସେଠୀଙ୍କ ମନର କଥା। ତାଙ୍କ ହାତର ସ୍ପର୍ଶ ପାଇ ପଥର ଓ ମାଟି ଦେହରେ ଫୁଟି ଉଠେ ଜୀବନ୍ତ ଛବି। ଚିତ୍ରକଳା ହେଉ କି କାରୁ କଳା ସବୁଥିରେ ସେ ସିଦ୍ଧହସ୍ତ।
ପଦ୍ମନାଭ କହନ୍ତି, ପିଲାବେଳେ ମାଟିରେ ମୂର୍ତ୍ତି ଗଢ଼ିବା ସହ ଚିତ୍ରକଳା ପ୍ରତି ତାଙ୍କର ବିଶେଷ ଆଗ୍ରହ ଥିଲା। ପରେ ବିଭିନ୍ନ ଦେବଦେବୀଙ୍କ ମୃଣ୍ମୟୀ ମୂର୍ତ୍ତି ଗଢ଼ିବା ଓ ଛବି ଆଙ୍କିବା ଆରମ୍ଭ କରିଥିଲେ। ପରବର୍ତ୍ତୀ ସମୟରେ ଏହା ତାଙ୍କର ନିଶାରେ ପରିଣତ ହୋଇଥିଲା। ଭଦ୍ରକ ଚାରୁକଳା ମହାବିଦ୍ୟାଳୟରେ ସ୍ନାତକ ହାସଲ ପରେ ସ୍ବର୍ଗତ ରବିନାରାୟଣ ନାୟକଙ୍କ ପ୍ରେରଣାରେ ଆଗକୁ ବଢ଼ି ଚାଲିଲେ। ରଥଯାତ୍ରା ପୂର୍ବରୁ ସ୍ଥାନୀୟ ଅଞ୍ଚଳର ବିଭିନ୍ନ ଜଗନ୍ନାଥ ମନ୍ଦିରରେ ଦେବସ୍ନାନ ପୂର୍ଣ୍ଣିମାଠାରୁ ନେତ୍ରୋତ୍ସବ ପର୍ଯ୍ୟନ୍ତ ନୀତି ନିୟମରେ ରହି ମହାବାହୁଙ୍କ ମୂର୍ତ୍ତିରେ ରଙ୍ଗ ଦେଇଥାନ୍ତି। ଭଦ୍ରକ ଜିଲାସ୍ତରୀୟ ସାଂସ୍କୃତିକ ମହୋତ୍ସବ କିମ୍ବା ଅନ୍ୟ ଉତ୍ସବରେ ବାଲୁକା କଳାରେ ଜଗନ୍ନାଥ ମହାପ୍ରଭୁଙ୍କ ମୂର୍ତ୍ତି ଗଢ଼ି ସେ ପ୍ରଶଂସିତ ଓ ସମ୍ବର୍ଦ୍ଧିତ ହୋଇଛନ୍ତି। ବିଭିନ୍ନ ବିଦ୍ୟାଳୟର ପିଲା ଓ ସ୍ବୟଂସହାୟିକା ଗୋଷ୍ଠୀର ମହିଳାମାନଙ୍କୁ ଟେରାକୋଟା ତାଲିମ ପ୍ରଦାନ ସହ ମହାପ୍ରଭୁଙ୍କ ବିଭିନ୍ନ ବେଶ କଳା ମାଧ୍ୟମରେ ପ୍ରଦର୍ଶିତ କରି ନିଜର ପରିଚୟ ସୃଷ୍ଟି କରିପାରିଛନ୍ତି। ଏସବୁରେ ତାଙ୍କୁ ଆତ୍ମତୃପ୍ତି ମିଳିଥାଏ ବୋଲି ପଦ୍ମନାଭ କହିଛନ୍ତି।