ଢେଙ୍କାନାଳ ଅଫିସ,୨୪ା୧୧: କୋଟି କୋଟି ଓଡ଼ିଆଙ୍କ ପ୍ରାଣର ଦେବତା ଜଗତରନାଥ ଶ୍ରୀଜଗନ୍ନାଥଙ୍କୁ ପୁଣି ଅପମାନ କରାଯାଇଛି। ଏହି ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜବାହର ଚୌକ ଅଞ୍ଚଳରେ। ଜବାହର ଚୌକ ଅଞ୍ଚଳରେ ସହରର ପ୍ରମୁଖ ରାସ୍ତାକଡ଼ରେ ଖରା,କାକର, ଧୂଳିରେ ଆଜକୁ ପ୍ରାୟ ଦେଢ଼ ମାସ ହେବ ପରିତ୍ୟକ୍ତ ଅବସ୍ଥାରେ ପଡ଼ି ରହିଛନ୍ତି ମହାପ୍ରଭୁ । ଏଥି ପ୍ରତି ବଜାର କମିଟି ସଦସ୍ୟ , କର୍ମକର୍ତ୍ତା କିମ୍ବା ଏହି ରାସ୍ତା ଦେଇ ଯାଉଥିବା ଲୋକମାନଙ୍କର ମଧ୍ୟ ଦୃଷ୍ଟି ପଡ଼ୁନାହିଁ ।
ଗତ କୁମାର ପୂର୍ଣ୍ଣିମା ପରଠାରୁ ୧୧ ଦିନ ବ୍ୟାପି ଢେଙ୍କାନାଳ ପ୍ରସିଦ୍ଧ ଲକ୍ଷ୍ମୀପୂଜା ମହୋତ୍ସବ ସହରରେ ମହାସମାରୋହରେ ଅନୁଷ୍ଠିତ ହୋଇଥିଲା। ଚଳିତବର୍ଷ ଜବାହର ଚୌକ ପୂଜା କମିଟି ପକ୍ଷରୁ ପୌରାଣିକ କଥା ବସ୍ତୁକୁ ନେଇ ଅନନ୍ତ ନାଗଙ୍କ ମଝିରେ ମା’ ଲକ୍ଷ୍ମୀ ମହାପ୍ରଭୁ ଶ୍ରୀ ଜଗନ୍ନାଥଙ୍କ ସହ ବିଜେ କରିଥିବା ମୂର୍ତ୍ତି ନିର୍ମାଣ କରି ପୂଜା ମଣ୍ଡପରେ ଆକର୍ଷଣୀୟ ଭାବେ ସାଜ ସଜା କରାଯାଇ ୧୧ ଦିନ ବ୍ୟାପି ପୂଜାର୍ଚ୍ଚନା କରାଯାଇଥିଲା। ଅକ୍ଟୋବର ୧୯ରେ ମା’ ଙ୍କ ଭସାଣି ଉତ୍ସବ ଅନୁଷ୍ଠିତ ହୋଇଥିଲା। ଏହା ପର ଠାରୁ ରାସ୍ତାକଡ଼ରେ ମହାପ୍ରଭୁ ଶ୍ରୀଜଗନ୍ନାଥଙ୍କ ମୂର୍ତ୍ତି ଧୁଳି ଧୂସର ହୋଇ ଖରା, କାକରରେ ପଡ଼ିରହିଛି।
