ପୁରୀ ଅଫିସ,୧୮ା୧୨: ଶୀତ ଜୋର୍ ଧରିବା ଆରମ୍ଭ କଲାଣି। ତେଣୁ ମହାପ୍ରଭୁଙ୍କୁ ଶୀତ ପ୍ରକୋପରୁ ସୁରକ୍ଷିତ ରଖିବା ପାଇଁ ଘୋଡ଼ ଲାଗି କରାଯିବ। ଦରଜି ସର୍ଦ୍ଦାର ପ୍ରକାଶ ମହାପାତ୍ର ଏହି ଘୋଡ଼ (ଶୀତବସ୍ତ୍ର) ତିଆରି କରିସାରି ଗୁରୁବାର ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର କରିଛନ୍ତି। ଆସନ୍ତା ୨୦ ତାରିଖରେ ଓଢ଼ଣି ଷଷ୍ଠୀ। ଏହି ନୂତନ ଘୋଡ଼ ମହାପ୍ରଭୁଙ୍କ ସେବାରେ ଲାଗିବ। ଏହାକୁ ତିଆରି କରିବା ପାଇଁ ୧୬ ହାତିଆ ୪ ପଟିଆ କନା ୪ଟି, ୧୧ ହାତିଆ ୪ ପଟିଆ ୨ଟି, ୭୨ ହାତିଆ ଗୋଟିଏ, ୩୬ ହାତିଆ ୨ଟି, ଧୋଡ଼ ପାହାଡ଼ିଆ ୩ଟା, ଖଟ ପାଛୁଡ଼ି ୩ଟି, ଫୁଲଛେଦା ୨ଟି ଆବଶ୍ୟକ ହୋଇଥିଲା। କେବଳ ଚତୁର୍ଦ୍ଧାମୂର୍ତ୍ତି ନୁହେଁ, ଅନେକ ପାର୍ଶ୍ୱ ଦେବଦେବୀଙ୍କ ପାଇଁ ମଧ୍ୟ ଘୋଡ଼ ପ୍ରସ୍ତୁତ ହୋଇଛି। ମହାପ୍ରଭୁ ଶ୍ରୀଜଗନ୍ନାଥ ଓ ପ୍ରଭୁ ବଳଭଦ୍ରଙ୍କ ସେବାରେ ଲାଗୁଥିବା ଘୋଡ଼ ଗୀତଗୋବିନ୍ଦ ପାଟ ଏବଂ କୁସୁମି (ଅଳତା ରଙ୍ଗର କପଡ଼ା)ରେ ସୁଭଦ୍ରା ଓ ସୁଦର୍ଶନଙ୍କ ବସ୍ତ୍ର ପ୍ରସ୍ତୁତ କରାଯାଇଛି। ସେହିଭଳି ସୂର୍ଯ୍ୟ, ଗରୁଡ଼, ମନ୍ଦିର ଭିତର ନୃସିଂହ, ଗୁଣ୍ଡିଚା ମନ୍ଦିର ପାଖ ନୃସିଂହ ଏବଂ କାକୁଡ଼ିଖାଇଙ୍କ ଲାଗି ତିଆରି ହୋଇଥିବା ଘୋଡ଼ରେ ପତନୀ କନା, ସୂତାପଟକୁ ବ୍ୟବହାର କରାଯାଇଛି।
ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର ହୋଇଥିବା ଘୋଡ଼କୁ ଦେଉଳକରଣମାନେ ଦେଖିବେ। ଏହାର ଲମ୍ବ ଓ ଚଉଡ଼ା ମାପ କରିବା ସହ କାରୁକାର୍ଯ୍ୟ ଉପରେ ଧ୍ୟାନ ଦେବେ। ଏହା ଦାରୁଦିଅଁଙ୍କ ସେବାରେ ଲାଗିପାରିବା ନେଇ ନିଶ୍ଚିତ ହେବା ପରେ ଶ୍ରୀମନ୍ଦିର ପ୍ରଶାସନକୁ ସୂଚନା ଦିଆଯିବ। ଏହାପରେ ତାହାକୁ ମହାପ୍ରଭୁଙ୍କ ସେବାରେ ଲାଗି ପାଇଁ ସ୍ବୀକୃତି ମିଳିବ। ଉଲ୍ଲେଖଯୋଗ୍ୟ, ଏଥର ନିର୍ଦ୍ଧାରିତ ସମୟ ପୂର୍ବରୁ ଘୋଡ଼ ପ୍ରସ୍ତୁତି ସରିଛି।