କେନ୍ଦୁଝର, ୮।୨ (ସ୍ବ.ପ୍ର./ ଡି.ଏନ.ଏ.) କେନ୍ଦୁଝର ଜିଲାରେ ଚନ୍ଦନ ତସ୍କରୀ ଉପରେ ପ୍ରଶାସନର ଅଙ୍କୁଶ ଲାଗିପାରୁନାହିଁ। ଫଳରେ ଜିଲାରେ ଚନ୍ଦନ ଗଛ ଚୋରି ବଢ଼ିବାରେ ଲାଗିଛି। ଏବେ ଚନ୍ଦନଗଛ ଉପରେ ନଜର ପଡ଼ିଥିବା ବେଳେ ଜିଲାପାଳଙ୍କ କାର୍ଯ୍ୟାଳୟ ମଧ୍ୟ ଏଥିରୁ ବାଦ୍ ପଡ଼ିନାହିଁ। ରବିବାର ରାତିରେ ଜିଲାପାଳଙ୍କ କାର୍ଯ୍ୟାଳୟ ପରିସରରୁ ଚନ୍ଦନ ଗଛ ଚୋରି ହେବା ଘଟଣା ଚର୍ଚ୍ଚାର ବିଷୟ ହୋଇଛି। ଏଠାରେ ଥିବା ଜିଲା ଯୋଜନା ଓ ପର୍ଯ୍ୟବେକ୍ଷଣ କାର୍ଯ୍ୟାଳୟ ପରିସରରୁ ଏକ ପୁରୁଣା ଚନ୍ଦନ ଗଛକୁ ଦୁର୍ବୃତ୍ତମାନେ କାଟି ନେଇଛନ୍ତି। ସେହିପରି ଦୁର୍ବୃତ୍ତମାନେ ଜିଲାପାଳଙ୍କ କାର୍ଯ୍ୟାଳୟକୁ ଲାଗିଥିବା ଡିଆର୍ଡିଏ ଅଫିସ ନିକଟ ପୂର୍ବତନ ଅତିରିକ୍ତ ଜିଲାପାଳ (ରାଜସ୍ବ)ଙ୍କ ସରକାରୀ ଆବାସ ଗୃହ ପରିସରରୁ ଏକ ଚନ୍ଦନ ଗଛକୁ କାଟି ଚୋରି ଉଦ୍ୟମ କରିଛନ୍ତି। ତେବେ ଉକ୍ତ କ୍ୱାର୍ଟର୍ସରେ ରହୁଥିବା ପୂର୍ବତନ ଏଡିଏମ୍ଙ୍କ ସମ୍ପର୍କୀୟ ଶବ୍ଦ ଶୁଣି ବାହାରକୁ ଆସିବା ଦେଖି ଦୁର୍ବୃତ୍ତମାନେ କଟା ଗଛକୁ ଛାଡ଼ି ପଳାଇଛନ୍ତି। ସମ୍ପୃକ୍ତ ୨ଜଣ ଦୁର୍ବୃତ୍ତ ଟେକା ପଥର ଫିଙ୍ଗି ସେମାନଙ୍କୁ ଭୟଭୀତ କରିବାକୁ ଚେଷ୍ଟା କରିଥିଲେ ହେଁ ଗଛ ନେଇପାରି ନାହାନ୍ତି। ତେବେ ତିନିଦିନ ମଧ୍ୟରେ ସହରରୁ ୫ଟି ଚନ୍ଦନ ଗଛକୁ କାଟି ନେଇଛନ୍ତି। ଏନେଇ ଅଭିଯୋଗ ପାଇବା ପରେ ମାମଲା ରୁଜୁ କରି ତଦନ୍ତ ଜାରି ରହିଥିବା ସଦର ରେଞ୍ଜ ଟାଉନ ଫରେଷ୍ଟର କାଳନ୍ଦୀ ସାମଲ କହିଛନ୍ତି। ସେହିପରି ପୋଲିସ ତନାଘନା ଆରମ୍ଭ କରିଛି।
ପ୍ରକାଶ ଯେ, କେନ୍ଦୁଝର ପୁରୁଣା ସହର ଶ୍ରୀ ଶ୍ରୀ ବଳଦେବଜୀଉ ମନ୍ଦିର ପରିସରରୁ ଶନିବାର ରାତିରେ ୩ ଚନ୍ଦନ ଗଛ ଚୋରି ହୋଇଥିଲା। ଟାଉନ ପୋଲିସ ତଦନ୍ତ ଚଳାଇଥିବା ବେଳେ ସବିଶେଷ ଯାଞ୍ଚ ପରେ ସବୁ କିଛି ଜଣାପଡ଼ିବ ବୋଲି ଉପଜିଲାପାଳ ତଥା ଦେବୋତ୍ତର ବିଭାଗ ନିର୍ବାହୀ ଅଧିକାରୀ ରାମଚନ୍ଦ୍ର କିସ୍କୁ କହିଥିଲେ। ସେହିପରି କିଛିଦିନ ତଳେ ଆନନ୍ଦପୁର ଥାନା ଅଞ୍ଚଳର ଦୁଇ ମନ୍ଦିର ପରିସରରୁ ୪ ଏବଂ ଚମ୍ପୁଆ ଥାନା ଅଧୀନ ନିକଲସନ ଫରେଷ୍ଟ ଟ୍ରେନିଂ ସ୍କୁଲ ପରିସରରୁ ୧୧ ମୋଟ ୧୫ ଚନ୍ଦନ ଗଛ ଚୋରି ହୋଇଥିଲା। ୧୫ ଦିନ ମଧ୍ୟରେ ମୋଟ ୨୦ ଗଛ ଚୋରି ହୋଇଛି।
