ଆର.ଉଦୟଗିରି,୯ା୫: ଗଜପତି ଜିଲା ଆର.ଉଦୟଗିରି ଥାନା ଛେଳିଗଡ଼ ଖ୍ରୀଷ୍ଟିଆନ ସାହିରେ ବାହାଘର ବନ୍ଦ କରିବାକୁ ଯାଇଥିବା ତହସିଲଦାରଙ୍କୁ ଆକ୍ରମଣ ଘଟଣାର ମୁଖ୍ୟ ଅଭିଯୁକ୍ତ ରବିବାର ଗିରଫ ହୋଇଛନ୍ତି। ସେ ହେଲେ ଉକ୍ତ ସାହିର ଜାନୁଏଲ ବୀର। ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଆର.ଉଦୟଗିରି ଏସଡିପିଓ ଦିଲୀପ କୁମାର ନାୟକ ସୂଚନା ଦେଇଛନ୍ତି।
କୋଭିଡ୍ ନିୟମ ଉଲ୍ଲଂଘନ କରି ଖ୍ରୀଷ୍ଟିଆନ ସାହିରେ ଏକ ବାହାଘର ଶୋଭାଯାତ୍ରା ଚାଲିଥିବା ଖବରପାଇ ଆର୍. ଉଦୟଗିରି ତହସିଲଦାର ସ୍ମୃତି ରଞ୍ଜନ ଶତପଥୀ ପୋଲିସ ସହ ଯାଇଥିଲେ। ସେମାନେ ବର ପରିବାରର ଲୋକଙ୍କୁ କୋଭିଡ୍ ନିୟମ ଉଲ୍ଲଂଘନ ସମ୍ପର୍କରେ ପଚାରିବାରୁ ଉଭୟ ପକ୍ଷରୁ କଥା କଟାକଟି ହୋଇଥିଲା। ସେହି ସମୟରେ ବିଦ୍ୟୁତ କଟିଯାଇଥିବା ବେଳେ ତହସିଲଦାର, ତାଙ୍କ ଡ୍ରାଇଭର ଓ ପୋଲିସ କର୍ମଚାରୀଙ୍କ ଉପରକୁ କେତେକ ଲୋକ ପଥର ମାଡ କରିଥିଲେ। ଏପରିକି ବିବାହ ଆୟୋଜନ କରୁଥିବା ପରିବାର ଲୋକେ ତହସିଲଦାରଙ୍କ ଗାଡିକୁ ଭଙ୍ଗାରୁଜା କରିଥିଲେ। ଆହତ ତହସିଲଦାର, ଡ୍ରାଇଭର ଓ ପୋଲିସ କର୍ମଚାରୀ ଆହତ ହୋଇ ଆର.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହୋଇଥିଲେ। ସେବେଠୁ ଗିରଫ ଭୟରେ ଖ୍ରୀଷ୍ଟିଆନ ସାହି ପୁରୁଷଶୂନ୍ୟ ହୋଇଛି। ଘଟଣାଦିନ ରାତିରେ ଉପଜିଲାପାଳ ସଂଗ୍ରାମ ଶେଖର ପଣ୍ଡା ଖ୍ରଷ୍ଟିଆନ ସାହିରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। ଏହି ଘଟଣାକୁ ଗଜପତି ଜିଲାପାଳ ଅନୁପମ ସାହା ନିନ୍ଦା କରିବା ସହ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। ପୋଲିସ ୯ ଜଣଙ୍କ ନାମରେ ମାମଲା (ନଂ.୫୮/୨୧) ରୁଜୁ କର ତଦନ୍ତ ଜାରି ରଖିଛି।