କାମାକ୍ଷାନଗର, ୨୮ା୧୨(ଡି.ଏନ୍.ଏ.) ଢେଙ୍କାନାଳ ଜିଲାରେ ସୋମବାରଠାରୁ ଆନୁଷ୍ଠାନିକ ଭାବେ ଆରମ୍ଭ ହୋଇଛି ଖରିଫ୍ ଧାନ କିଣା। କାମାକ୍ଷାନଗର ବ୍ଲକ ରାୟନୃସିଂହପୁର ପଞ୍ଚାୟତ ଗୋଦରିବିଲିରେ ଜିଲାପାଳ ସରୋଜ କୁମାର ସେଠୀ ଧାନ କିଣାବିକା ଲାଗି ମଣ୍ଡିର ଶୁଭାରମ୍ଭ କରିଛନ୍ତି। ଏହି ଅବସରରେ ସେ ସୂଚନା ଦେଇ କହିଲେ, ଜିଲାରେ ପ୍ରଥମ ପର୍ଯ୍ୟାୟରେ ୧୧ ଲକ୍ଷ ୫୦ ହଜାର କୁଇଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଛି। ୪୯ ହଜାର ଚାଷୀ ନାମ ପଞ୍ଜୀକରଣ କରିଛନ୍ତି। ଚଳିତ ବର୍ଷ ୧୬ ମିଲରଙ୍କ ଜରିଆରେ ଧାନ କିଣାଯିବ। ଏଥିଲାଗି ମୋଟ ୮୫ ମଣ୍ଡି ଖୋଲାଯାଇଛି। ତନ୍ମଧ୍ୟରୁ ୫୭ଟିର ପରିଚାଳନା ଦାୟିତ୍ୱ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ ଦିଆଯାଇଛି। ଗତବର୍ଷ ଧାନ ଉଠାଣରେ ବିଭ୍ରାଟ ଉପୁଜିଥିଲା। ଚଳିତ ବର୍ଷ ଟୋକନ ବ୍ୟବସ୍ଥା, କଟ୍ନୀ ଛଟ୍ନୀରେ ଯେପରି କୌଣସି ସମସ୍ୟା ନ ହୁଏ ସେଥିଲାଗି ପ୍ରଶାସନ, ଯୋଗାଣ ବିଭାଗ ସତର୍କ ରହିଥିବା ଜିଲାପାଳ ସୂଚନା ଦେଇଛନ୍ତି। ଆୟୋଜିତ କାର୍ଯ୍ୟକ୍ରମରେ ଜିଲା ଯୋଗାଣ ଅଧିକାରୀ ନୀରୋଦ ରଞ୍ଜନ ଦାସ, ଜିଲା ସମବାୟସମିତି ସମୂହ ଉପନିବନ୍ଧକ ସଂଗ୍ରାମ କେଶରୀ ରାଉତ, ସହକାରୀ ଉପ ନିବନ୍ଧକ ଅନିଲ ରଥ, ସହକାରୀ ଯୋଗାଣ ଅଧିକାରୀ ସଞ୍ଜୟ କୁମାର ରଥ, ନିୟନ୍ତ୍ରିତ ବଜାର କମିଟି ସମ୍ପାଦକ ରବିନାରାୟଣ ସାହୁ, ଯୋଗାଣ ନିରୀକ୍ଷକ ସାରଦା ଦଳେଇ ପ୍ରମୁଖ ଉପସ୍ଥିତ ଥିଲେ। ପ୍ରଥମ ଦିନରେ ୮ ଚାଷୀ ୩୫୨ କୁଇଣ୍ଟାଲ ଧାନ ବିକ୍ରି କରିଛନ୍ତି।
