କୋରାପୁଟ, ୫ା୨: କୋରାପୁଟ ଜିଲା ନାରାୟଣପାଟଣା ଥାନା ଅନ୍ତର୍ଗତ ବୋରିଗି ଅଞ୍ଚଳରୁ ମାଓବାଦୀମାନେ ଲୁଚାଇ ରଖିଥିବା ବିପୁଳ ପରିମାଣର ବିସ୍ଫୋରକ ସାମଗ୍ରୀକୁ ପୋଲିସ ଜବତ କରିଛି। ଶୁକ୍ରବାର ଜିଲା ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ବରୁଣ ଗୁଣ୍ଟିପାଲି ଏହି ସୂଚନା ଦେଇଛନ୍ତି। ଗତ ୨ ଦିନ ଧରି କୋରାପୁଟ ଜିଲା ଡିଭିଏଫ ଫୋର୍ସ ଓ ବିଡିଡି ସ୍କ୍ବାର୍ଡ ମିଳିତ ଭାବେ ନାରାୟଣପାଟଣା ଥାନା ଅନ୍ତର୍ଗତ କେନ୍ଦବୋରିଗି, ମଙ୍ଗଳପୁର ଓ ଆତ୍ମାକୋଣ୍ଡା ଅଞ୍ଚଳରେ ମାଓବାଦୀ ବିରୋଧୀ ଅଭିଯାନ ଚଳାଇଥିଲେ। ସୁରେଶି ଗ୍ରାମ ଜଙ୍ଗଲରୁ ମାଓବାଦୀଙ୍କ ଦ୍ୱାରା ଲୁଚାଇ ରଖାଯାଇଥିବା ବିପୁଳ ପରିମାଣର ବିସ୍ଫୋରକ ସାମଗ୍ରୀ ଜବତ କରାଯାଇଛି। ଜବତ ସାମଗ୍ରୀ ମଧ୍ୟରେ ୬ଟି ଏସ୍ବିଏମ୍ଏଲ୍ ବନ୍ଧୁକ, ୩ଟି ଟିଫିନ ବୋମା, ୫୦ଟି ଜିଲେଟିନ ଷ୍ଟିକ, ଏସ୍ବିଏମ୍ଏଲ୍ ବନ୍ଧୁକ ପାଇଁ ବ୍ୟବହୃତ ଲୁହା ପାଇପ ୨୦୫ଟି, ୨ଟି କ୍ଲେମର ମାଇନ, ୨୦ଟି ଟିଫିନ ବାକ୍ସ, ବୋମାରେ ବ୍ୟବହୃତ ହେଉଥିବା ୩ କେଜି ଲୁହା ଖଣ୍ଡ, ଗୋଟିଏ ଲୁହାଖଣ୍ଡ, ଲୁହାର ଜାର, ୩ଟି ବ୍ଲାକବେଲଟ ଆଦି ସାମଗ୍ରୀ ଜବତ ହୋଇଛି।