ଚିତ୍ରକୋଣ୍ଡା,୧୦ା୩,(ଡି.ଏନ୍.ଏ.): କେନ୍ଦ୍ରୀୟ କମିଟି ମାଓବାଦୀଙ୍କ ମା’ଙ୍କ ଅକାଳ ବିୟୋଗ ହୋଇଥିବା ବେଳେ ମାଓବାଦୀ ନେତା ଜଗନ୍ନ ଖବର ପାଇଥିଲେ ମଧ୍ୟ ମା’ଙ୍କୁ ଶେଷ ଦର୍ଶନ କରିପାରି ନ ଥିଲେ। ମାଓବାଦୀ ନେତାଙ୍କ ମା’ଙ୍କ ପରଲୋକ ଖବର ପାଇ ସିଲେରୁ ଥାନା ଏସିଆଇ, ରାମକୃଷ୍ଣ ସଙ୍ଗେ ସଙ୍ଗେ କମୁଲୁଓ୍ବାଡା ଗାଁରେ ପହଞ୍ଚିଥିଲେ। ପୋଲିସ ସହକର୍ମୀଙ୍କ ସହ ନିଜେ ବୃଦ୍ଧାଙ୍କ ମୃତଦେହକୁ କାନ୍ଧରେ ବୋହି ମଶାଣିକୁ ନେଇଥିଲେ। ସେଠାରେ ରୀତିନୀତି ଅନୁଯାୟୀ ସମସ୍ତ କାର୍ଯ୍ୟ ସମ୍ପନ୍ନ ହୋଇଥିଲା। ଗ୍ରାମବାସୀଙ୍କ ଉପସ୍ଥିତିରେ ଏହି କାର୍ଯ୍ୟ ପାଇଁ ପରିବାରର ଅନ୍ୟମାନଙ୍କୁ ୧୦ ହଜାର ଟଙ୍କା ସହାୟତା ରାଶି ପ୍ରଦାନ କରାଯାଇଥିଲା। ଶେଷ ସମୟରେ ସୀତାଙ୍କ ନିକଟରେ ଦୁଇ ପୁଅ ନ ଥିବା ବେଳେ ପୋଲିସର ଏଭଳି ମହତ କାର୍ଯ୍ୟକୁ ଅଞ୍ଚଳବାସୀ ପ୍ରଶଂସା କରିଛନ୍ତି।
ମା’ଙ୍କ ଦେହାନ୍ତ ପରେ ମିଳିଲାନି ଚାରି କାନ୍ଧ। ଗ୍ରାମବାସୀ ଭୟଭୀତ ହୋଇ ପଡିଥିଲେ। ମା’ଙ୍କ ଶେଷ ଦର୍ଶନ ପାଇଁ ମାଓବାଦୀ ନେତା ବି ଆସିପାରିଲେନି। କିନ୍ତୁ ମାନବିକତା ଦେଖାଇ ପୋଲିସ ବାବୁ ପୁଅ ହୋଇ ବୃଦ୍ଧାଙ୍କ ଶେଷକୃତ୍ୟ ସମ୍ପନ୍ନ କରିଛନ୍ତି। ଏଭଳି ଘଟଣା ଦେଖିବାକୁ ମିଳିଛି ଆନ୍ଧ୍ର ଓଡ଼ିଶା ଚିତ୍ରକୋଣ୍ଡା ସୀମାନ୍ତ ସିଲେରୁ ଥାନା କମୁଲୁଓ୍ବାଡା ଗାଁରେ। ଆନ୍ଧ୍ରର ମୋଷ୍ଟ ଓ୍ବାଣ୍ଟେଡ ମାଓବାଦୀ ନେତା କାଜୁରି ପାଣ୍ଡାନା ଓରଫ (ଜଗନ୍ନ)ଙ୍କ ମା’ ସୀତାଙ୍କ ଶୁକ୍ରବାର ଦେହାନ୍ତ ଘଟିଛି।
