ନୟାଗଡ଼ ଅଫିସ,୨୬।୮: ନୟାଗଡ଼ ଏନଏସି ମ୍ୟୁନିସିପାଲିଟି ହେଲା । ଏବେ ବଜାର ପରିସୀମା ବଢ଼ୁଥିବାବେଳେ ସହରର ଲୋକସଂଖ୍ୟା ବଢ଼ିବାରେ ଲାଗିଛି। ଜିଲା ସଦର ମହକୁମା ହୋଇବି ନୟାଗଡ଼ ସହରରେ ପାର୍କିଂ ବ୍ୟବସ୍ଥା ନାହିଁ । ଫଳରେ ବିପର୍ଯ୍ୟସ୍ତ ଟ୍ରାଫିକ ବ୍ୟବସ୍ଥାର ନିରାକରଣ କରାଯାଇ ପାରୁନାହିଁ । ଏଭଳି ସ୍ଥଳେ ନୟାଗଡ଼ ସବ୍ଜେଲ ଖୁଣ୍ଟୁବନ୍ଧକୁ ସ୍ଥାନାନ୍ତରିତ ପରେ ୨୦୦୯ରୁ ପୁରୁଣା ଜେଲ ଜମିରେ ପାର୍କିଂ ବ୍ୟବସ୍ଥା କରିବା ପାଇଁ ଦାବି ହୋଇ ଆସୁଛି । ତେବେ ପ୍ରଶାସନ ପକ୍ଷରୁ ପୁରୁଣା ଜେଲ ଜମିରେ କ’ଣ କରାଯିବ ଘୋଷଣା କରାଯାଇନାହିଁ । ୨୦୦୯ରେ ସେହି ଜମିରେ ମାର୍କେଟିଂ କମ୍ପ୍ଲେକ୍ସ କରିବା ପାଇଁ ପ୍ରଶାସନର ଉଦ୍ୟମ ପରେ ସାଧାରଣରେ ପ୍ରତିବାଦ କରାଯାଇଥିଲା । ଏପରି କି ନୟାଗଡ଼ ଓକିଲ ସଂଘ କୋର୍ଟର ଦ୍ୱାରସ୍ଥ ହୋଇଥିଲା । ଏବେ କେଶ କୋର୍ଟରେ ନାହିଁ। ଏଣୁ ସେହି ଜମିରେ ପ୍ରଶାସନ ମାର୍କେଟ କମ୍ପ୍ଲେକ୍ସ କରିବା ପାଇଁ ଉଦ୍ୟମ କରୁଥିବା ଜଣାପଡିବା ପରେ ସାଧାରଣରେ ବିରୋଧ ଆରମ୍ଭ ହୋଇଛି । ଅପରପକ୍ଷେ ପୁରୁଣା ଜେଲ ଜମିରେ କେତେକାଂଶରେ ପରିବା ମାର୍କେଟ ହୋଇଛି । ପୁଣି ଅଳ୍ପ ସ୍ଥାନରେ ପୂଜା ମଣ୍ଡପ ନିର୍ମାଣ ହୋଇଛି ା ଅବଶିଷ୍ଟ ଜମିରେ ଯାନବାହାନ ପାର୍କିଂ ପାଇଁ ବ୍ୟବସ୍ଥା କରିବାକୁ ଦାବି ହୋଇଛି ା
ଏନେଇ କଂଗ୍ରେସ ସେବା ଦଳ ଷ୍ଟିୟରିଂ କମିଟି ସଦସ୍ୟ ମନୋଜ ସାହୁ କୁହନ୍ତି, ପୁରୁଣା ଜେଲ ଜମି ମୂଲ୍ୟବାନ । ଏହି ଜମି ଉପରେ ସମସ୍ତଙ୍କ ନଜର ରହିଛି। ସେଠାରେ ମାର୍କେଟ କମ୍ପ୍ଲେକ୍ସ କରାଗଲେ ଭଲ ହେବ ଦର୍ଶାଯାଇ ଲବି ଚାଲିଛି । ହେଲେ ପାର୍କିଂ ଚିନ୍ତାକୁ କେହି ଗୁରୁତ୍ୱ ଦେଉ ନାହାନ୍ତି । ଜିଲା ସଦର ମହକୁମା ହେଲେ ବି ନୟାଗଡ଼ରେ ପାର୍କିଂ ବ୍ୟବସ୍ଥାକୁ ଗୁରୁତ୍ୱ ଦିଆଯାଉ ନାହିଁ । ସେଠରେ ପ୍ରଥମେ ପାର୍କିଂ ବ୍ୟବସ୍ଥା କରାଯାଇ ପରେ ଯାହା କରାଯାଉଛି ହେଉ । ଭାଜପା ଯୁବନେତା ସନ୍ତୋଷ ପ୍ରଧାନ କୁହନ୍ତି, ସହରରେ ପାର୍କିଂ ବ୍ୟବସ୍ଥା ନ ଥିବାରୁ ଲୋକମାନେ ଗାଡ଼ି ରଖିବାକୁ ସବୁବେଳେ ହଇରାଣ ହେଉଛନ୍ତି। ଏଣୁ ଗ୍ରାଉଣ୍ଡ ଫ୍ଲୋର ଓ ପ୍ରଥମ ମହଲାକୁ ପାର୍କିଂ ବ୍ୟବସ୍ଥା ରଖି ଅତ୍ୟାଧୁନିକ ମଲ କରାଗଲେ ଚଳିବ । ସିପିଆଇ(ଏମ) ନେତା ବିଶ୍ୱନାଥ ମହାପାତ୍ର କୁହନ୍ତି, ସହରରେ ମ୍ୟୁନିସିପାଲିଟି ବିଜୁ ମାର୍କେଟ, ଜୁବୁଲି ମାର୍କେଟ, ରାଜୀବ ମାର୍କେଟ କରିଛି । ହେଲେ କେଉଁ ମାର୍କେଟରେ ପାର୍କିଂ ବ୍ୟବସ୍ଥା ନାହିଁ । ଏଣୁ ପୁରୁଣା ଜେଲ ଜମିରେ ଖୋଲା ପାର୍କିଂ ବ୍ୟବସ୍ଥା କରାଯିବା ନିହାତି ଦରକାର । ସେଠାରେ ସହରର ବିଭିନ୍ନ ପୂଜା ମଣ୍ଡପ, ସାଧାରଣ ସଭା, ସାଂସ୍କୃତିକ କାର୍ଯ୍ୟକ୍ରମ କରାଯାଇ ପାରିବ । ବିଜେଡି ନେତା ଶ୍ରୀକାନ୍ତ ପଟ୍ଟନାୟକ କୁହନ୍ତି, ଜେଲ ଜମିରେ ମାର୍କେଟ କମ୍ପ୍ଲେକ୍ସ ଯଦି କରାଯାଏ ଗ୍ରାଉଣ୍ଡ ଫ୍ଲେରରେ ପାର୍କିଂ ବ୍ୟବସ୍ଥା କରାଯାଉ । ସହର ଭିତରେ ଟୁ ହୁଇଲର ଓ ଫୋର ହୁୁଇଲର ରଖିବା ପାଇଁ ସ୍ଥାନ ନାହିଁ । ସେଠାରେ ଉପରୋକ୍ତ ବ୍ୟବସ୍ଥା କରାଗଲେ ସହରରୁ ଟ୍ରାଫିକ ପାର୍କିଂ ସମସ୍ୟାର ସମାଧାନ ହୋଇ ପାରିବ।