କଟକ,୩ା୯(ସୁପ୍ରିୟା ପ୍ରିୟଦର୍ଶିନୀ)କଟକ ମହାନଗର ନିଗମ(ସିଏମ୍ସି) ମେୟର ସୁବାସ ସିଂ ମୋତେ ମାରିବାକୁ ଷଡଯନ୍ତ୍ର କରୁଛନ୍ତି। ଗତ ସ୍ବାୟତ୍ତ ଶାସନ ଦିବସରେ ମୋତେ ଦୁର୍ବ୍ୟବହାର କରିବା ସହ କହିଲେ ଯା ତୁ ଗାଡ଼ି ଧକ୍କା ହୋଇ ମରିବୁ। ମୁଁ ମରିଗଲେ ମେୟର କ’ଣ ମୋ ପରିବାରକୁ ଚଳାଇବେ? ଶନିବାର କଟକ ବିଜୁଭବନ ପରିସରରେ ଅନୁଷ୍ଠିତ ସିଏମ୍ସି କାଉନ୍ସିଲ ବୈଠକ ଆରମ୍ଭରେ ମେୟର ସିଂଙ୍କୁ ୩୫ ନମ୍ବର ଓ୍ବାର୍ଡର କଂଗ୍ରେସ କର୍ପୋରେଟର ଜେ. କାମେଶ୍ୱର ରାଓ ପ୍ରଶ୍ନ ପଚାରିଛନ୍ତି। ଏଥିସହ ସେ ହାତରେ ବ୍ୟାନର ଧରି ବିକ୍ଷୋଭ ପ୍ରଦର୍ଶନ କରିଥିଲେ। ତେବେ କର୍ପୋରେଟରଙ୍କ ଏଭଳି ପ୍ରଶ୍ନର ଉତ୍ତର ନ ଦେଇ ମେୟର ନୀରବ ରହିଥିଲେ। ପରେ ଉପସ୍ଥିତ ଅନ୍ୟ କର୍ପୋରେଟର ରାଓଙ୍କୁ ବୁଝାଶୁଝା କରିବା ପରେ ବୈଠକ ଆଗକୁ ବଢିଥିଲା।
ଆସନ୍ତା ଗଣେଶ ପୂଜା ପୂର୍ବରୁ ରାସ୍ତାଘାଟ ମରାମତି ସମ୍ପର୍କରେ ଆଲୋଚନା ହୋଇଥିଲା। ବିଭିନ୍ନ ସ୍ଥାନରେ ଜାଇକା ଏବଂ ୱାଟ୍କୋ କାର୍ଯ୍ୟକୁ ନେଇ କର୍ପୋରେଟରମାନେ ଅସନ୍ତୋଷ ପ୍ରକାଶ କରିଥିଲେ। ପ୍ରକଳ୍ପ କାର୍ଯ୍ୟ ପାଇଁ ରାସ୍ତା ଖୋଳା ଯାଇଥିଲେ ମଧ୍ୟ ମରାମତି କରାଯାଉନାହିଁ। ପୂର୍ତ୍ତ ବିଭାଗ ଅଧୀନରେ ଥିବା ରାସ୍ତାଗୁଡିକ ଖାଲଖମାରେ ଭର୍ତ୍ତି ହୋଇଛି। ବାରମ୍ବାର କହିବା ସତ୍ତ୍ବେ ରାସ୍ତା ମରାମତି କରାଯାଉନାହିଁ ବୋଲି କର୍ପୋରେଟରମାନେ ଅଭିଯୋଗ କରିଥିଲେ। ପୂଜା ଓ ଭସାଣି ସମୟରେ ଯେଭିଳି ସମସ୍ୟା ଦେଖା ନ ଦେବ ସେ ଦିଗରେ ଆଲୋଚନା ହୋଇଥିଲା। ପ୍ରତ୍ୟେକ ବିଭାଗକୁ ଡାକି ଏକ ମିଳିତ ବୈଠକ କରିବାକୁ ପ୍ରସ୍ତାବ ଦିଆଯାଇଥିଲା। ଏଥିସହ ୧୦ ଦିନ ମଧ୍ୟରେ ସମସ୍ତ କାର୍ଯ୍ୟ ସାରିବାକୁ କର୍ପୋରେଟରମାନେ ମେୟରଙ୍କୁ କହିଥିଲେ। ଏହାପରେ ବହୁ କର୍ପୋରେଟର ନିଜ ୱାର୍ଡର ସମସ୍ୟା ଉପସ୍ଥାପନ କରିଥିଲେ। ସିଏମ୍ସି ଅଧିକାରୀମାନଙ୍କ ପାଇଁ ଘରୋଇ ସଂସ୍ଥା ଦ୍ୱାରା ଗାଡିଗୁଡିକ ନିୟୋଜିତ କରାଯାଇଛି। ହେଲେ ଆବଶ୍ୟକତା ଠାରୁ ଅଧିକ ଗାଡି ନିୟୋଜିତ କରାଯାଇଥିବା ୫୪ ନମ୍ବର ୱାର୍ଡର କର୍ପୋରେଟର ତାପସ ରଞ୍ଜନ ସାମନ୍ତରାୟ ଅଭିଯୋଗ କରିଥିଲେ। ଏଦିଗରେ ଆସନ୍ତା କାଉନସିଲ ବୈଠକରେ ସମସ୍ତ ତଥ୍ୟ ରଖିବାକୁ ସେ କମିଶନର ନିଖିଲ ପଓ୍ବନ କଲ୍ୟାଣଙ୍କୁ କହିଥିଲେ। ମେୟର ସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଡେପୁଟି କମିଶନର ଶ୍ୱେତପଦ୍ମା ଡି. ଶତପଥୀ, ସଞ୍ଜୀବିତା ରାୟଙ୍କ ସହ କର୍ପୋରେଟରମାନେ ଉପସ୍ଥିତ ଥିଲେ।
ଅପବ୍ୟବହାର ହେଉଛି ସିଏମ୍ସିର ଟଙ୍କା
ପୂର୍ବରୁ ସିଏମ୍ସିର କଲ୍ ସେଣ୍ଟର ବାବଦକୁ ୬୦ ଲକ୍ଷ ଟଙ୍କା ଖର୍ଚ୍ଚ କରାଯାଉଥିଲା। ହେଲେ ଏବେ ଘରୋଇ ସଂସ୍ଥା ଦ୍ୱାରା ଏହି ସେଣ୍ଟର ପରିଚାଳିତ ହେଉଛି। ଏ ବାବଦକୁ ୨ କୋଟି ୬୦ଲକ୍ଷ ଟଙ୍କା ଖର୍ଚ୍ଚ ହେବ। ଅଧିକ ଅର୍ଥ ବ୍ୟୟ ସତ୍ତ୍ବେ ଲୋକମାନଙ୍କ କାମରେ ଏହା ଆସିପାରୁନାହିଁ। ବାସ୍ତବରେ ଏହାର କାର୍ଯ୍ୟକାରିତା କ’ଣ ରହିଛି ବୋଲି ୪୪ ନମ୍ବର ୱାର୍ଡ କର୍ପୋରେଟର ପ୍ରଦୀପ୍ତ କିଶୋର ଖୁଣ୍ଟିଆ ଅଭିଯୋଗ ଉଠାଇଥିଲେ।
ଗୃହ ତ୍ୟାଗ କଲେ ଭାଜପା କର୍ପୋରେଟର
ସିଏମ୍ସି ପକ୍ଷରୁ ଅଳିଆ ସଂଗ୍ରହ ପାଇଁ ଭଡାରେ ଆସିଥିବା ୬୦ଟି ନୂଆ ବ୍ୟାଟେରି ଚାଳିତ ଗାଡି (ବିଓଭି) କୁ ନେଇ ୨୬ ନମ୍ବର ୱାର୍ଡ କର୍ପୋରେଟର ଗଗନ ଓଝା ପ୍ରଶ୍ନ ଉଠାଇଥିଲେ। ଉକ୍ତ ଗାଡି ପ୍ରତି ସିଏମ୍ସି ମାସକୁ ୨୪ ହଜାର ଟଙ୍କା ଲେଖାଏଁ ଭଡା ଦେବ। ଏବାବଦରେ ବର୍ଷକୁ କୋଟିଏରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହେବ। ହେଲେ ଗାଡି କିଣିଥିଲେ ପ୍ରାୟ ୮୪ ଲକ୍ଷ ଟଙ୍କା ଖର୍ଚ୍ଚ ହୋଇଥାନ୍ତା। କିନ୍ତୁ ତାହା କରା ନ ଯାଇ ଜନସାଧାରଣ ଟିକସ ଅର୍ଥର ଅପବ୍ୟବହାର କରାଯାଉଥିବା ଜେନା ଅଭିଯୋଗ କରିଛନ୍ତି। ହେଲେ ଏ ବାବଦରେ ସିଏମ୍ସି ଅଧିକାରୀଙ୍କ ନିକଟରୁ ତାଙ୍କୁ କୌଣସି ଉତ୍ତର ମିଳି ନ ଥିଲା। ଏପରି କି ମେୟରଙ୍କ ସହ ଏ ବିଷୟ କଥା କଟାକଟି ହେବାରୁ ସେ ଗୃହ ତ୍ୟାଗ କରିଥିଲେ।