ଭୁବନେଶ୍ୱର, ୨୦।୧୦(ବ୍ୟୁରୋ): କେନ୍ଦୁଝର ଏମ୍ପି ଚନ୍ଦ୍ରାଣୀ ମୁର୍ମୁଙ୍କ ଏକ ଫେକ୍ ଭିଡିଓ ଭାଇରାଲ ନେଇ ଓଟିଭି ସାମ୍ବାଦିକଙ୍କୁ ପୋଲିସ ଉଠାଇନେଇ ଜେରା କରିବା ପରେ ଟୁଇଟର ଯୁଦ୍ଧ ଜୋର ଧରିଛି। ଏହାକୁ ନିନ୍ଦାକରି ଓଡ଼ିଶା ଏବଂ ମହାରାଷ୍ଟ୍ର ପୋଲିସ ପାକିସ୍ତାନ ଭଳି ଆଇନକାନୁନ ନ ମାନି ସାମ୍ବାଦିକଙ୍କୁ ଉଠାଇନେଇ ଜେରା କରୁଥିବା ପୂର୍ବତନ ଏମ୍ପି ବୈଜୟନ୍ତ ପଣ୍ଡା ଟୁଇଟ୍ କରି ସମାଲୋଚନାର ଶିକାର ହେଉଛନ୍ତି। ଏହା ଉପରେ କଡା ପ୍ରତିକ୍ରିୟା ପ୍ରକାଶକରି ପୂର୍ବତନ ବିଧାୟକ ଦେବାଶିଷ ସାମନ୍ତରାୟ କହିଛନ୍ତି, ପାକିସ୍ତାନରେ ବାକ୍ ସ୍ବାଧୀନତା ନାହିଁ। ହେଲେ ଓଡ଼ିଶାରେ ବାକ୍ ସ୍ବାଧୀନତାକୁ ସବୁବେଳେ ସମ୍ମାନ ଦିଆଯାଉଛି। ଓଡ଼ିଶାରେ ଏଭଳି ବ୍ୟବସ୍ଥା ଅଛି ବୋଲି ରାଜ୍ୟର ସବୁଠାରୁ କମ୍ ବୟସ୍କ ମହିଳା ଏମ୍ପିଙ୍କୁ ଦୁର୍ବ୍ୟବହାର ପରେ ସେଭଳି କିଛି ଘଟିନାହିଁ। ପାକିସ୍ତାନ ଭଳି ବ୍ୟବସ୍ଥା ଓଡ଼ିଶାରେ ଥିଲେ କେବେଠାରୁ ବେକ କାଟି ଦିଆଯାଇ ଥାଆନ୍ତା। ଭାଜପା ଶାସିତ ରାଜ୍ୟରେ କିଭଳି ହେଉଛି ବୈଜୟନ୍ତ ବାବୁ ତାହା ଦେଖୁଥିବେ। ବୈଜୟନ୍ତବାବୁଙ୍କ ମନ୍ତବ୍ୟରୁ ଯାହା ଜଣାପଡୁଛି ସେ ଅସହିଷ୍ଣୁ ହୋଇପଡିଛନ୍ତି। ଜଣେ ଖବରଦାତା ହେଲେ କ’ଣ ଓଡ଼ିଆ ଝିଅ ତଥା ଏମ୍ପିଙ୍କୁ ଦୁର୍ବ୍ୟବହାର କରିବାପରେ ତାଙ୍କୁ ଛାଡି ଦିଆଯିବ କି ବୋଲି ଦେବାଶିଷ ପ୍ରଶ୍ନ ଉଠାଇଛନ୍ତି। ବୈଜୟନ୍ତବାବୁଙ୍କ ମନ୍ତବ୍ୟ ସାରା ଗଣମାଧ୍ୟମ ଜଗତ ମୁହଁରେ କଳା ବୋଳି ଦେଇଛି। ଜଣେ ଖବରଦାତା ହୋଇ କିପରି ଏମିତି କରିପାରନ୍ତି ବୋଲି ଦେବାଶିଷ ପ୍ରଶ୍ନ ଉଠାଇଛନ୍ତି। ଭାଜପା ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି, ବୈଜୟନ୍ତଙ୍କ ଟୁଇଟ୍ରେ କୌଣସି ଅପମାନସୂଚକ କଥା ନାହିଁ। ଯେଉଁମାନେ ରାଜନୀତି କରୁଛନ୍ତି ସେମାନେ ଶାଳୀନତା ରକ୍ଷା କରିବା ଦରକାର। ଭଲରେ ଟୁଇଟ୍ ପଢିବା ପରେ ଯଦି କିଛି ଅପମାନ ସୂଚକ କଥା ଅଛି ତା’ପରେ ପ୍ରତିକ୍ରିୟା ରଖନ୍ତୁ ବୋଲି ପୃଥ୍ବୀରାଜ କହିଛନ୍ତି।