ନୂଆଦିଲ୍ଲୀ,୧୮ା୯:ଭାରତ ସରକାର ୨୦୨୫ ମାର୍ଚ୍ଚ ଶେଷ ସୁଦ୍ଧା ପ୍ରଧାନମନ୍ତ୍ରୀ ଭାରତୀୟ ଜନଔଷଧୀ କେନ୍ଦ୍ର(ପିଏମ୍ବିଜେକେ) ସଂଖ୍ୟାକୁ ୧୦୫୦୦ରେ ପହଞ୍ଚାଇବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି। କେନ୍ଦ୍ର ରସାୟନ ଓ ସାର ମନ୍ତ୍ରୀ ଡି.ଭି. ସଦାନନ୍ଦଗୌଡ଼ା ଗୁରୁବାର ପାର୍ଲାମେଣ୍ଟରେ କହିଛନ୍ତି ଯେ, ସାଧାରଣ ଜନତା ବିଶେଷକରି ଗରିବ ଲୋକମାନଙ୍କୁ ସୁଲଭ ମୂଲ୍ୟରେ ଗୁଣାତ୍ମକ ଔଷଧ ଯୋଗାଇ ଦେବା ନିମନ୍ତେ ଏହି କେନ୍ଦ୍ରଗୁଡ଼ିକର ସଂଖ୍ୟାକୁ ବଢ଼ାଇବାକୁ ଚିନ୍ତା କରିଛନ୍ତି। ୨୦୨୦ ଅଗଷ୍ଟ ୧୫ ତାରିଖ ସୁଦ୍ଧା ଦେଶରେ ମୋଟ ୬୬୦୩ଟି ଜନଔଷଧୀ କେନ୍ଦ୍ର ଥିଲା। ୨୦୨୦ ମାର୍ଚ୍ଚଠାରୁ ଜୁନ ମଧ୍ୟରେ କୋଭିଡ୍ ମହାମାରୀ ଯୋଗୁ ଲକ୍ଡାଉନ୍ ପରିସ୍ଥିତି ଦୃଷ୍ଟିରୁ (ପିଏମ୍ବିଜେକେ) ଅନେକ ଆହ୍ବାନର ସାମ୍ନା କରିଛି। ସକ୍ରିୟ ଔଷଧୀୟ ଉପାଦାନ (ଏପିଆଇ)ର ଅଭାବ ଏବଂ ଔଷଧ ପ୍ରସ୍ତୁତି ପାଇଁ ଅନ୍ୟାନ୍ୟ କଞ୍ଚାମାଲର ଅଭାବ ସହିତ ପରିବହନ ସମସ୍ୟା ଯୋଗୁ କେନ୍ଦ୍ରୀୟ ଭଣ୍ଡାର କିମ୍ବା କ୍ଷେତ୍ରୀୟ ଓ୍ବେୟାର ହାଉସରୁ ଖୁଚୁରା ଦୋକାନ ପର୍ଯ୍ୟନ୍ତ ଔଷଧପତ୍ର ଯୋଗାଣରେ ଅସୁବିଧା ଦେଖାଦେଇଛି। ବର୍ତ୍ତମାନ ଦେଶର ୪ଟି ସ୍ଥାନରେ ଜନଔଷଧୀ କେନ୍ଦ୍ର କ୍ଷେତ୍ରୀୟ ଓ୍ବେୟାର ହାଉସ ରହିଛି। ସେଗୁଡ଼ିକ ହେଲା ଗୁରୁଗ୍ରାମ, ଚେନ୍ନାଇ, ବେଙ୍ଗାଲୁରୁ ଓ ଗୌହାଟି। ଏବେ କେନ୍ଦ୍ର ସରକାର ଆଉ ୨ଟି କ୍ଷେତ୍ରୀୟ ଓ୍ବେୟାର ହାଉସ ସ୍ଥାପନ ପାଇଁ ଯୋଜନା ପ୍ରସ୍ତୁତ କରୁଛନ୍ତି ବୋଲି ମନ୍ତ୍ରୀ ଗୌଡ଼ା କହିଛନ୍ତି।