ପୁରୀ ଅଫିସ,୭।୫: ପୁରୀ ଜିଲାରେ କୋଭିଡ୍ ଟିକାକରଣରେ ଅବ୍ୟବସ୍ଥା ଦେଖିବାକୁ ମିଳିଛି। ଗୋଟିଏ ପଟେ ଜିଲାରେ ଦ୍ୱିତୀୟ ପର୍ଯ୍ୟାୟ ଟିକାକରଣ ବିଳମ୍ବ ଘଟୁଛି। ଅନ୍ୟପଟେ ଜନସାଧାରଣ ଟିକା ପାଉ ନ ଥିବା ଅଭିଯୋଗ ହେଉଛି। ଗୁରୁବାର ପ୍ରଶାସନର ଅବହେଳା ପଦାରେ ପଡ଼ିଛି। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ପୁରୀର ସଂଯୁକ୍ତା ଦାଶ (୫୭) କୋଭିଡ୍ ଟିକା ନେଇ ନ ଥିବାବେଳେ ତାଙ୍କ ପାଖକୁ ଟିକା ନେଇଥିବାର ମେସେଜ ଆସିଛି। ସ୍ବାସ୍ଥ୍ୟ ବିଭାଗ ପକ୍ଷରୁ ଆସିଥିବା ଏହି ମେସେଜ୍ ସମ୍ପର୍କରେ ସେ ପୁରୀ ଜିଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷଙ୍କୁ ଅଭିଯୋଗ ଜଣାଇଛନ୍ତି। ତେବେ ଚିକିତ୍ସାଳୟ କର୍ତ୍ତୃପକ୍ଷ କିଛି କରିପାରିବେ ନାହିଁ ବୋଲି କହିଛନ୍ତି। ସଂଯୁକ୍ତା ଅନ୍ଲାଇନରେ ଫର୍ମ ପୂରଣ କରିଥିବାରୁ ଆପ୍ରେ ଏପରି ତ୍ରୁଟି ଘଟିଥାଇପାରେ ବୋଲି ଚିକିତ୍ସାଳୟ କର୍ତ୍ତୃପକ୍ଷ ସଫେଇ ଦେଇଛନ୍ତି। ତେବେ ଏହାକୁ ନେଇ ସଂଯୁକ୍ତା ଚିନ୍ତାରେ ରହିଛନ୍ତି। ସଂଯୁକ୍ତା କହିଛନ୍ତି, କୋଭିଡ୍ ଟିକା ନେବା ନିମନ୍ତେ କେନ୍ଦ୍ର ସରକାରଙ୍କ ପକ୍ଷରୁ ଜାରି ହୋଇଥିବା ଅନ୍ଲାଇନ ଆପ୍ରେ ସେ ନିଜ ନାମ ପଞ୍ଜୀକରଣ କରିଥିଲେ। ତେବେ ଟିକା ନେଇ ନ ଥିଲେ ମଧ୍ୟ ଗୁରୁବାର ସେ ଟିକା ନେଇଥିବା ତାଙ୍କ ମୋବାଇଲ ଫୋନକୁ ମେସେଜ ଆସିଥିଲା। ଏହା ତାଙ୍କୁ ଯେତିକି ଆଶ୍ଚର୍ଯ୍ୟ କରିଛି ସେତିକି ଚିନ୍ତାରେ ପକାଇଛି। ସେହିପରି ସୂଚନା ଅଧିକାର କର୍ମୀ ଜୟନ୍ତ କୁମାର ଦାସ କହିଛନ୍ତି, ପୂର୍ବରୁ ମଧ୍ୟ ଏଭଳି ଅଭିଯୋଗ ଆସିଛି, ମାତ୍ର ଜିଲା ପ୍ରଶାସନ କୌଣସି ପଦକ୍ଷେପ ଗ୍ରହଣ କରିନାହିଁ। ଏହା ଦୁର୍ଭାଗ୍ୟର ବିଷୟ। ପ୍ରଶାସନର ଦାୟିତ୍ୱହୀନତା ଯୋଗୁ ଟିକାକରଣରେ ଅବ୍ୟବସ୍ଥା ଘଟୁଥିବା ସେ ଅଭିଯୋଗ କରିଛନ୍ତି।
