ଅଶୋକନଗର, ୧୦ା୨:ଭାରତୀୟ ଜନତା ପାର୍ଟିର ବିକାଶ ଯାତ୍ରାରେ ଯୋଗ ଦେବା ଅବସରରେ ମଧ୍ୟପ୍ରଦେଶ ଅଶୋକନଗର ଜିଲା ମୁଙ୍ଗୋଓଲି ବିଧାୟକ ତଥା ମନ୍ତ୍ରୀ ବ୍ରିଜେନ୍ଦ୍ର ସିଂ ଯାଦବଙ୍କୁ ହଟହଟା ହେବାକୁ ପଡ଼ିଛି। ମଙ୍ଗଳବାର ମନ୍ତ୍ରୀ ନିଜ ବିଧାନସଭା ନିର୍ବାଚନ ମଣ୍ଡଳୀ ମୁଙ୍ଗୋଓଲିର ଏକ ଗ୍ରାମରେ ବିକାଶ ଯାତ୍ରାର ଆୟୋଜନ କରିଥିଲେ। ମନ୍ତ୍ରୀଙ୍କୁ ସ୍ବାଗତ ଜଣାଇ କେତେଜଣ ବ୍ୟକ୍ତି ତାଙ୍କୁ ଫୁଲମାଳ ପିନ୍ଧାଇଥିଲେ। କିଛି ସମୟ ପରେ ହଠାତ୍ ବ୍ରିଜେନ୍ଦ୍ରଙ୍କ ଦେହ କୁଣ୍ଡାଇ ହେବା ଆରମ୍ଭ ହୋଇଥିଲା। ବିକାଶ ଯାତ୍ରା ସମୟରେ ମନ୍ତ୍ରୀ ନିଜ ସମର୍ଥକଙ୍କ ସହ ଚାଲିଯାଉଥିବା ବେଳେ ତାଙ୍କ ଦେହ ଅଧିକ କୁଣ୍ଡେଇ ହୋଇଥିଲା, ଯାହାପରେ ମନ୍ତ୍ରୀଙ୍କୁ ଯାତ୍ରାକୁ ଅଧାରେ ରଖି ଗାଧୋଇବାକୁ ପଡ଼ିଥିଲା। ତେବେ ଯାତ୍ରା ସମୟରେ ମନ୍ତ୍ରୀ ନିଜ ଶରୀରକୁ କୁଣ୍ଡାଉଥିବାର ଭିଡିଓ ଏବେ ସୋସିଆଲ ମିଡିଆରେ ବହୁଳ ପ୍ରସାର ହେବାରେ ଲାଗିଛି। ସ୍ଥାନୀୟ ଗଣମାଧ୍ୟମ ସୂଚନା ଅନୁସାରେ, ବିକାଶ ଯାତ୍ରାରେ ମନ୍ତ୍ରୀଙ୍କୁ ସ୍ବାଗତ କରିବା ସମୟରେ କେତେଜଣ ଖଳ ପ୍ରକୃତିର ଲୋକ ମନ୍ତ୍ରୀଙ୍କ ଗଳାରେ ଫୁଲମାଳ ଦେବାବେଳେ ଇଚିଂ (କୁଣ୍ଡେଇ ହେବା) ପାଉଡର୍ ଢାଳି ଦେଇଥିଲେ। ଫଳରେ ମନ୍ତ୍ରୀଙ୍କୁ ହଟହଟା ହେବାକୁ ପଡ଼ିଥିବା କୁହାଯାଉଛି। ମୁଙ୍ଗାଓଲି ସହରର ଦେବର୍ଚି ଗ୍ରାମରେ ବିକାଶ ଯାତ୍ରାର ଆୟୋଜନ ସାଙ୍ଗକୁ ଏକାଧିକ ପ୍ରକଳ୍ପର ଶିଳାନ୍ୟାସ କାର୍ଯ୍ୟକ୍ରମରେ ଯୋଗ ଦେବା ଲାଗି ମନ୍ତ୍ରୀ ବ୍ରିଜେନ୍ଦ୍ର ସେଠାକୁ ଯାଇଥିଲେ।