ସୋନପୁର,୩।୮(ନି.ପ୍ର.)-ସୁବର୍ଣ୍ଣପୁର ଜିଲା ବୀରମହାରାଜପୁର ଥାନା ଅଞ୍ଚଳର ଜଣେ ନାବାଳିକାଙ୍କୁ ଘରୁ ଉଠାଇ ନେଇ ବଳାତ୍କାର କରାଯାଇଛି। ପୀଡିତାଙ୍କ ବାପା ଏ ସମ୍ପର୍କରେ ବୀରମହାରାଜପୁର ଥାନାରେ ସୋମବାର ଲିଖିତ ଅଭିଯୋଗ କରିଛନ୍ତି। ପୋଲିସ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ ଧରିବା ପାଇଁ ତନାଘନା ଚଳାଇଛି। ଏହି ଘଟଣାରେ ସେହି ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ା
ଅଭିଯୋଗ ଅନୁଯାୟୀ , ନାବାଳିକା ନିଜ ମା’ ଓ ବାପାଙ୍କ ସହିତ ଘରେ ଥିଲେ। ଗୁରୁବାର ରାତି ୯ଟାରେ ଥାନା ଅଞ୍ଚଳର ଦିଲ୍ଲୀପ କୁମାର ମିଶ୍ର ଓରଫ ଟୁକୁ(୪୬) କବାଟ ଭାଙ୍ଗି ତାଙ୍କ ଘରେ ପଶିଥିଲେ । ଏହାପରେ ଟୁକୁ ଏକ ଭୁଜାଲି ଧରି ମା’ ବାପାଙ୍କୁ ଭୟଭୀତ କରିବା ସହ ତାଙ୍କ ୧୭ବର୍ଷୀୟା ଝିଅଙ୍କୁ ଜୋରଜବରଦସ୍ତ ନିଜ ବାଇକ୍ରେ ବସାଇ ନେଇ ଯାଇଥିଲେ। ବହୁ ଖୋଜାଖୋଜି କରିଥିଲେ ମଧ୍ୟ ଏହି ଦମ୍ପତି ଝିଅକୁ ପାଇ ନ ଥିଲେ । ଅଭିଯୁକ୍ତ ନାବାଳିକାଙ୍କୁ ନିଜ ରୁଗୁଡିପାଲିସ୍ଥିତ ଘରକୁ ନେଇ ବଳାତ୍କାର କରିଥିଲେ । ଲୋକେ ଏ ସଂକ୍ରାନ୍ତରେ ସୂଚନା ପାଇବା ପୂର୍ବରୁ ଭୋର ୪ଟାରେ ଅଭିଯୁକ୍ତ ନାବାଳିକାଙ୍କୁ ଆଣି ତାଙ୍କ ଘରେ ଛାଡିଥିଲେ। ଏ ସମ୍ପର୍କରେ ଥାନାରେ ଅଭିଯୋଗ କଲେ ତୁମ ମା ବାପାଙ୍କୁ ଜୀବନରୁ ମାରିଦେବି ବୋଲି ପୀଡିତାଙ୍କୁ ଟୁକୁ ଧମକ ଦେଇଥିଲେ। ପୀଡିତା ଘରେ ପହଞ୍ଚତ୍ବା ପରେ କାନ୍ଦିକାନ୍ଦି ମା ବାପାଙ୍କୁ ସବୁ କଥା କହିଥିଲେ। ହେଲେ ଅଭିଯୁକ୍ତ ରାସ୍ତାରେ ଜଗି ରହିଥିବାରୁ ପୀଡିତାଙ୍କ ବାପା ଘଟଣାର ୩ ଦିନ ପରେ ବି ଥାନାରେ ଅଭିଯୋଗ କରିପାରି ନ ଥିଲେ । ସୋମବାର ସୁଯୋଗ ଦେଖି ପୀଡିତାଙ୍କ ବାପା ଥାନାରେ ଅଭିଯୋଗ କରିଛନ୍ତି । ଅଭିଯୁକ୍ତ ସେହି ଅଞ୍ଚଳର ଜଣେ ପ୍ରଭାବଶାଳୀ ବ୍ୟକ୍ତି ହୋଇଥିବାରୁ ଏହି ଘଟଣାକୁ ଚାପି ଦେବାକୁ ଉଦ୍ୟମ ଆରମ୍ଭ ହୋଇଛି ା ତାଙ୍କୁ ଗିରଫ ନ କରିବା ପାଇଁ ଯୋଜନା ଚାଲିଥିବା ଅଭିଯୋଗ ହୋଇଛି ା