ଆଳି,୫ା୧୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଆଳି ଥାନା ଅନ୍ତର୍ଗତ ନାଗପଡା ଗଁାର ଗୋଟିଏ ବୋଲେରୋ ସମେତ ୨ ଜଣଙ୍କ ଘରକୁ ଦୁର୍ବୃତ୍ତମାନେ ଜାଳି ଦେଇଥିବା ନେଇ ଅଭିଯୋଗ ହୋଇଛି। ଏପରି କି ଏହି ଘଟଣାକୁ ନେଇ ନାଗପଡ଼ା, ବାଳକାଟୀ ଓ ରାଣୀପୋଖରୀ ଗଁାରେ ଆତଙ୍କ ଖେଳି ଯାଇଛି।
ସୂଚନା ମୁତାବକ, ଗୁରୁବାର ରାତି ୧ଟାରେ ଗଁାରେ ସୁଧାକର ନାୟକଙ୍କ ବୋଲେରୋରେ ଦୁର୍ବୃତ୍ତମାନେ ନିଆଁ ଲଗାଇଦେବା ପରେ ଗ୍ରାମବାସୀ ଓ ଦମକଳ ବାହିନୀ ଆୟତ୍ତ କରୁଥିଲେ। ଏହି ସମୟରେ ଦୁର୍ବୃତ୍ତମାନେ ଗଁାରେ ଦିବାକର ବାରିକ ଓ ବିଦ୍ୟାଧର ବାରିକଙ୍କ ଚାଳଛପର ଘରେ ନିଆଁ ଲଗାଇ ଦେଇଥିଲେ। ଗ୍ରାମବାସୀ ଆଳି ଦମକଳ ସହାୟତାରେ ନିଆଁ ଲିଭାଇଥିଲେ। ଅଗ୍ନିକାଣ୍ଡରେ ଦିବାକର ଓ ବିଦ୍ୟାଧରଙ୍କ ଘରେ ଥିବା ଆସବାବପତ୍ର ସମେତ ସମସ୍ତ ସାମଗ୍ରୀ ଜଳିପୋଡ଼ି ଛାର୍ଖାର ହୋଇଯାଇଛି। ପିନ୍ଧା ବସ୍ତ୍ର ବ୍ୟତୀତ ସେମାନଙ୍କ ନିକଟରେ ଆଉ କିଛି ନାହିଁ। କ୍ଷତିଗ୍ରସ୍ତ ପରିବାରକୁ ସହାୟତା ଦେବାକୁ ଗ୍ରାମବାସୀ ଦାବି କରିଛନ୍ତି। ଅପରପକ୍ଷରେ ଗତ ବର୍ଷେ ମଧ୍ୟରେ ବାରମ୍ବାର ଏପରି ଘଟଣା ଘଟୁଥିବାରୁ ଆଳି ଥାନାର ଦ୍ୱାରସ୍ଥ ହୋଇଛନ୍ତି ନାଗପଡା, ବାଳକାଟୀ ଓ ରାଣୀପୋଖରୀ ଗ୍ରାମବାସୀ। ସେମାନଙ୍କ ଅଭିଯୋଗ ଅନୁଯାୟୀ, ୨୦୨୧ ନଭେମ୍ବର ୪ ରାତିରେ ଦୁର୍ବୃତ୍ତମାନେ ସୁଧାକରଙ୍କ ଗାଡ଼ି ଜାଳିଥିବା ବେଳେ ଚଳିତବର୍ଷ ସମାନ ସମୟରେ ସେହି ଗାଡ଼ିକୁ ପୁନର୍ବାର ଜାଳି ଦେଇଛନ୍ତି। ଅପରପକ୍ଷରେ ଜାନୁୟାରୀରେ ବାଳକାଟୀ ପଞ୍ଚାୟତର ପୂର୍ବତନ ସରପଞ୍ଚ ଦିବାକର ନାୟକଙ୍କ ଘରକୁ ଦୁର୍ବୃତ୍ତମାନେ ଜାଳି ଦେଇଥିଲେ। ବାରମ୍ବାର ଏପରି ଘଟଣା ଘଟୁଥିବାରୁ ମୁକ୍ତିକାନ୍ତ ଦାସ, ଦିବାକର ନାୟକ, ନବକିଶୋର ପରିଡା, ସନାତନ ବେହେରା, ବ୍ରହ୍ମାନନ୍ଦ ବେହେରା, ବବ୍ରୁବାହନ ସାହୁ, ଭୀମସେନ ବାରିକଙ୍କ ସମେତ ଗ୍ରାମବାସୀ ଆତଙ୍କିତ ହୋଇ ପୋଲିସ ପ୍ରଶାସନ ନିକଟରେ ଏହି ଘଟଣା ଘଟାଉଥିବା ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରିଛନ୍ତି।