ବାରିପଦା ଅଫିସ,୨୬ା୧୧: ମୟୂରଭଞ୍ଜ ଜିଲା ବେତନଟୀ ବଜାରରୁ ବ୍ୟବସାୟୀଙ୍କ ନିକଟରୁ ଗୁରୁବାର ଅପରାହ୍ନରେ ଦୁଇ ଦୁର୍ବୃତ୍ତ ଅଢେଇଲକ୍ଷ ଟଙ୍କା ନେଇଯାଇଛନ୍ତି। ୪୬ବର୍ଷୀୟ ବ୍ୟବସାୟୀ ଘନଶ୍ୟାମ ଖଣ୍ଡେଲୱାଲ ନିଜର ସ୍କୁଟିରେ ବେତନଟୀ ଏସବିଆଇ ଶାଖାରୁ ଏକଲକ୍ଷ ଟଙ୍କା ଏବଂ ବ୍ୟାଙ୍କ ଅଫ ଇଣ୍ଡିଆ ଶାଖାରୁ ଦେଢ଼ଲକ୍ଷ ଟଙ୍କା ଏହିପରି ମୋଟ ଅଢେଇଲକ୍ଷ ଟଙ୍କା ଏକ ବ୍ୟାଗରେ ଭର୍ତ୍ତି କରି ନିଜର ସ୍କୁଟି ଯୋଗେ ଘରକୁ ଫେରୁଥିଲେ। ଯୁବକ ମୁହଁରେ ଗାମୁଛା ବାନ୍ଧି ଏକ କଳାରଙ୍ଗର ବାଇକରେ ଆସି କଙ୍କାକାଳିଆ ଛକ ରେଳଧାରଣା ନିକଟରେ ଟଙ୍କାବ୍ୟାଗକୁ ଝାମ୍ପିନେଇ ଆଖିପିଛୁଳାକେ ଫେରାର ହୋଇଯାଇଥିଲେl ଘଟଣାକୁ ନେଇ ବେତନଟୀ ଅଞ୍ଚଳର ବ୍ୟବସାୟୀଙ୍କ ମଧ୍ୟରେ ଭୟ ସଞ୍ଚରିତ ହୋଇଥିବା ବେଳେ ସମସ୍ତେ ନିଜକୁ ଅସୁରକ୍ଷିତ ମଣିବା ଆରମ୍ଭ କରିଦେଲେଣି l ଏ ନେଇ ଲୁଟର ଶିକାର ହୋଇଥିବା ଘନଶ୍ୟାମ ଖଣ୍ଡେଲୱାଲ ବେତନଟୀ ଥାନାର ଦ୍ୱାରସ୍ଥ ହୋଇଛନ୍ତି l