ଖଲ୍ଲିକୋଟ,୮ା୧୧(ଡି.ଏନ୍.ଏ.)-ଖଲ୍ଲିକୋଟ ଥାନା ବିକ୍ରମପୁର ଖମାରସାହିର ଜଣେ ଅସହାୟ ମହିଳାଙ୍କଠାରୁ ଶନିବାର ଅଭିନବ ଉପାୟରେ ସୁନାହାର ଲୁଟ ହୋଇଛି। ସ୍ବାମୀଙ୍କ ମୃତ୍ୟୁକାଳୀନ ସହାୟତା ଦେବା ପାଇଁ ଜାଲ୍ ବ୍ୟାଙ୍କ ଚେକ୍ ଦେଖାଇ ଅସହାୟା ସୁଚିତ୍ରା ଜେନାଙ୍କଠାରୁ ଜଣେ ଦୁର୍ବୃତ୍ତ ୩ ଭରି ଓଜନର ସୁନାହାର ଧରି ଚମ୍ପଟ ମାରିଛନ୍ତି। ଏ ନେଇ ସୁଚିତ୍ରା ଥାନାରେ ଏତଲା ଦେଇଥିଲେ ମଧ୍ୟ ପୋଲିସ କୌଣସି ପଦକ୍ଷେପ ନେଇଥିବା ସେ କହିଛନ୍ତି।
୨୦୧୭ରେ ସୁଚିତ୍ରାଙ୍କ ସ୍ବାମୀ ରଞ୍ଜନ ଜେନାଙ୍କ ବିଦେଶରେ ମୃତ୍ୟୁ ହୋଇଥିଲା। ଶନିବାର ମଧ୍ୟାହ୍ନରେ ଦୁର୍ବୃତ୍ତ ଜଣକ ବାଇକରେ ସୁଚିତ୍ରାଙ୍କ ଘର ନିକଟକୁ ଆସି ସ୍ବାମୀଙ୍କ ମୃତ୍ୟୁକାଳୀନ ସହାୟତା ୩ ଲକ୍ଷ ୨୦ ହଜାର ଟଙ୍କା ଆସିଛି କହି ଫେଡେରାଲ ବ୍ୟାଙ୍କର ଏକ ଜାଲ୍ ଚେକ୍ (ନଂ.୨୨୧୭୯୨୬୫) ଦେଇଥିଲେ। ବ୍ୟାଙ୍କ ଖାତାରେ ୨୪ ହଜାର ଟଙ୍କା ଡିପୋଜିଟ କଲେ ଉକ୍ତ ସହାୟତା ଟଙ୍କା ଟ୍ରାନ୍ସଫର ହେବ ବୋଲି ସେ କହିଥିଲେ। ତେବେ ସୁଚିତ୍ରାଙ୍କ ପାଖରେ ଟଙ୍କା ନ ଥିବାରୁ ସୁନା ବନ୍ଧକ ରଖି ଟଙ୍କା ଡିପୋଜିଟ କର ବୋଲି କହିଥିଲେ। ଝିଅର ୩ ଭରି ଓଜନର ଏକ ସୁନାହାର ପେଡିରୁ ବାହାର କରି ବ୍ୟାଙ୍କରେ ବନ୍ଧକ ରଖି ଟଙ୍କା ଡିପୋଜିଟ କରିବାକୁ ସୁଚିତ୍ରା ପ୍ରସ୍ତୁତ ହେଉଥିବା ବେଳେ ଦୁର୍ବୃତ୍ତ ତାହା ଧରି ଚମ୍ପଟ ମାରିଥିଲେ।
