ଆନନ୍ଦପୁର,୮।୧୧(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ପୌରପରିଷଦ ୧୨ ନଂ ଓାର୍ଡ଼ ଶାଳପଡା ନୂଆ କଲୋନୀ ସାହିର ସୁରେଶ ସ୍ବାଇଁ ଓ ପ୍ରମିଳା ସ୍ବାଇଁଙ୍କ ନିଖୋଜ ପୁଅ ପିଣ୍ଟୁ ଗତ ୬ ବର୍ଷ ପରେ ଘରକୁ ଫେରିଛନ୍ତି। ସୂଚନାଯୋଗ୍ୟ, ଗତ ୪.୧୧.୨୦୧୬ରେ ପିଣ୍ଟୁ ଘରୁ ବାହାରକୁ ଯାଇ ଆଉ ଫେରି ନ ଥିଲେ। ସେତେବେଳେ ପିଣ୍ଟୁଙ୍କୁ ୧୦ ବର୍ଷ ବୟସ ହୋଇଥିଲା। ବହୁ ଖୋଜାଖୋଜି ପରେ ପରିବାର ଲୋକେ ନିରାଶ ହେବା ପରେ ଆନନ୍ଦପୁର ଚାଇଲ୍ଡଲାଇନ୍ ସହାୟତାରେ ଘସିପୁରା ଥାନାରେ ଲିଖିତ ଅଭିଯୋଗ କରିଥିଲେ। ଘସିପୁରା ଥାନା କେସ୍ ନଂ ୨୮୧/୨୦୧୬ରେ ଏକ ମାମଲା ରୁଜୁ ହୋଇଥିଲା। ହେଲେ ପିଣ୍ଟୁଙ୍କର କୌଣସି ସନ୍ଧାନ ମିଳିପାରି ନ ଥିଲା। ଏହା ପରେ ପିଣ୍ଟୁ ଚନ୍ଦକାସ୍ଥିତ ଚାଇଲ୍ଡ ହେଲ୍ପଲାଇନଠାରେ ଆଶ୍ରୟ ନେଇଥିଲେ। ଏ ସମ୍ପର୍କରେ ଜାଣିପାରି ପରିବାର ଲୋକେ ସ୍ଥାନୀୟ ଚାଇଲ୍ଡଲାଇନ୍ର ସହାୟତାରେ ସେଠାରେ ପହଞ୍ଚି ଆବଶ୍ୟକ ପ୍ରମାଣ ପତ୍ର ଦେଖାଇ ପିଣ୍ଟୁଙ୍କୁ ଫେରିପାଇଥିଲେ। ତେବେ ପିଣ୍ଟୁଙ୍କୁ ଆନନ୍ଦପୁର ମୁଖ୍ୟ ଚିକିତ୍ସାଳୟରେ ଆବଶ୍ୟକ ଚିକିତ୍ସା ସେବା ଯୋଗାଇବା ପରେ ତାଙ୍କ ପରିବାରକୁ ହସ୍ତନ୍ତର କରାଯାଇଥିଲା। ପିଣ୍ଟୁ ଘରକୁ ଫେରିବା ପରେ ପରିବାରରେ ଖୁସିର ଲହରୀ ଖେଳିଯାଇଛି।